پەرلەمانی دانیمارک رەزامەندیی لەسەر پرۆژەیەک لە دژی رێکخراوی توندڕەوی داعش دەدات و هێزێکی تایبەت دەنێرێت.



بەپێی بڕیارەکە، کە زۆرینەی پەرلەمانتارانی دانیمارک دەنگیان پێدا، ئەو وڵاتە 400 سەربازی دیکە دەنێرێتە رۆژهەڵاتی ناوەڕاست لە چوارچێوەی هاوپەیمانیی نێودەوڵەتی دژی داعش.



بڕیارەکەی پەرلەمانی دانیمارک لە ناوەڕاستی ئەم مانگە دەچێتە بواری جێبەجێکردن، کە وێڕای ناردنی 400 سەرباز و راوێژکاری سەربازی، کە 60یان لە هێزی تایبەتی ئەو وڵاتەن، حەوت فڕۆکەی جەنگیی جۆری F16 و فڕۆکەیەکی گواستنەوەی کەلوپەل لە جۆری G130 لەخۆدەگرێت.



ئێستا 120 سەرباز و راوێژکاری دانیمارکی مەشق بە هێزەکانی پێشمەرگە و هێزە عێراقییەکان دەکەن، لە چوارچێوەی شەڕی دژی داعش و بەشداریی شەڕی راستەوخۆ ناکەن، بەڵکو تەنیا مەشق بە هێزە شەڕکەرەکان دەکەن.



دوای هێرشی داعش بۆ سەر کوردستانی باشوور لە مانگی حوزەیرانی 2014، ژمارەیەک وڵاتی رۆژئاوایی بە سەرکردایەتیی ئەمریکا هاوپەیمانییەکیان پێکهێنا، کە ئەرکیان بۆردومان کردنی بنکە و بارەگاکانی داعشە لە کوردستانی باشوور و رۆژئاوا و سوریا و عێراق لە رێی فڕۆکە جەنگییەکانەوە.



ئێستا راوێژکاری سەربازیی چەند وڵاتێک، لەوانە ئیتاڵیا، فەرەنسا، هۆڵەندا، هەنگاریا، ئەمریکا و بەریتانیا مەشق بە هێزەکانی پێشمەرگەی کوردستان دەکەن.








باسنیوز