سعودیە و توركیا داوای لە ئێران دەكەن لە هەڵوێستە تائیفییەکانی لە دژی وڵاتانی ناوچەکە پاشگەزبێتەوە
رۆژی یەکشەممە ”ئەحمەد داودئۆغڵو“، سەرۆک وەزیرانی تورکیا و وەزیری دەرەوە و شاندێکی تورکیا لەگەڵ ”شا سەلمان بن عەبدولعەزیز“، شای سعودیە و ژمارەیەک بەرپرسی باڵای سعودیە کۆبوونەتەوە و تاوتوێی توندوتۆڵکردنی پەیوەندییەکانی نێوانیان و پرسە هەرێمی و ناوچەییەکانیان کردووە.
”عادل ئەلجوبەیر“، وەزیری دەرەوەی سعودیە رایگەیاندووە، کە لە کۆبوونەوەیدا لەگەڵ ”مەولود چاوشئۆغڵو“، وەزیری دەرەوەی تورکیا باسیان لە دامەزراندنی ئەنجومەنی هەماهەنگیی ستراتیژی لە نێوان وڵاتەکانیاندا کردووە و چاوشئۆغڵو جەختی لەسەر مافی سعودیە بۆ بەرگری لەخۆکردن کردووەتەوە.
مەولود چاوشئۆغڵو داوای لە ئێران کردووە لە هەڵوێستە تائیفییەکانی لە دژی وڵاتانی ناوچەکە پاشگەزبێتەوە و رایگەیاندووە، کە وڵاتەکەی دژی ئەو سیاسەتەیە و پشتگیریی هەڵوێستەکانی سعودیە دەکات، دژی ”دوژمنکارییەکانی“ ئێران لە ناوچەکە بەتایبەت لە وڵاتانی عێراق، سوریا، یەمەن و لوبنان.
باسنیوز