کەنەدا، یەکیک لە وڵاتەکانی هاوپەیمانیی نێودەوڵەتی لەدژی داعش بڕیار دەدات هێرشە ئاسمانییەکانی دژ بە رێکخراوی داعش لە عێراق و سووریا رابگرێت.

جەستن ترودۆ، سەرۆکوەزیرانی کەندا لە دیدارێکی رۆنامەڤانیدا رایگەیاند "کەنەدا دەزانێت ئێمە پێویستیمان بە کاردانەوەیەکی نێودەوڵەتی هەیە لە شەڕی تیرۆر، هاوکات کەنەدا رۆڵی گرنگ دەگێڕێت لە رووی مرۆیی و پێویستییەکانی پەنابەرانەوە، لە رووی سەربازییشەوە وەکو بەشێک لە هاوپەیمانیی نێودەوڵەتی بەردەوام دەبین".

ترودۆ، ئاماژە بەوە دەدات "لە بەرامبەر پێشکەشکردنی رۆڵی سەربازیی دیکە، کە خۆی دەبینێتەوە لە مەشقپێکردن و هاوکاریکردنی دیکەی هێزە ناوخۆییەکان لە شەڕی دژ بە داعش، هێرشە ئاسمانییەکانمان دژ بە رێکخراوەکە رادەگرین".

سەرۆکوەزیرانی کەنەدا باس لەوەش دەکات کە لۆژیک لە پشتی ئەم بڕیارەوە ئەوەیە و "کەنەدا وەک وڵاتانی دیکە لەسەریەتی چاوەڕوانی دۆخەکە بکات و، بزانێت دەتوانێت بەشێوەیەکی باشتر یارمەتییەکانی پێشکەش بکات".

جەستن ترودۆ، لە پارتی لیبراڵە کە سێ مانگ لەمەوپێش لە هەڵبژاردنی وڵاتەکەی بردییەوە و بووە سەرۆکوەزیرانی کەنەدا. ئەو، بەڵێنی ئەوەی دا کە وڵاتەکەی بەشداریی سەربازی لە شەڕی دژی داعشدا نەکات و، لە کەمپەینەکانی هەڵبژاردنیشدا باسی ئەوەی دەکرد کە کەنەدا زیاتر هاوکاریی مرۆیی ئاوارە و قوربانیانی دەستی داعش دەکات.

كەنەدا یەكێكە لەو وڵاتانەی رۆڵی كاریگەری لە هاوپەیمانیێتی نێودەوڵەتی دژی داعش بە سەرۆكایەتی ئەمریكا هەبووە و، هاوكاریی سەربازی زۆری هەرێمی كوردستانی كردووە، ئێستاش 69 راوێژكار و راهێنەری مەشق بە هێزەكانی پێشمەرگە دەكەن.









رووداو