ده‌سته‌ی باڵای دانوستانه‌كانی سه‌ر به‌ ئۆپۆزسیۆنی سوریا رایگه‌یاند كه‌ بڕیاریان داوه‌ به‌شداری وتووێژه‌كانی جنێڤ بكه‌ن كه‌ وا بڕیار بوو رۆژی هه‌ینی ده‌ستپێبكات. به‌ڵام ده‌سته‌كه‌ روونیكرده‌وه‌ كه‌ ئه‌وان ناچن بۆ جنێڤ بۆ تاوتۆیكردنی پرۆسه‌ی سیاسی له‌ گه‌ڵ شاندی رژێمی سوریا به‌ڵكو رۆیشتنیان بۆ دیداری ستیڤان دیمستۆرا نێرده‌ی نێوده‌وڵه‌تییه‌ . ته‌ئكیدیشی كرده‌وه‌ كه‌ ئه‌وان به‌شداری دانوستانه‌كانی جنێڤ ده‌كه‌ن بۆ تاوتوێكردنی مه‌سه‌له‌ مرۆییه‌كان نه‌ك پرۆسه‌ی سیاسی له‌ گه‌ڵ شاندی رژێمی سوریا .

ئه‌سعه‌د زوعبی سه‌رۆكی شاندی دانوستكارى ئۆپۆزسیۆنى سوریا روونیكرده‌وه‌ كه‌ شانده‌كه‌یان به‌ ته‌واوی پێكهاته‌كه‌ی كه‌ رۆژی یه‌كشه‌ممه‌ی رابردوو ئاشكرای كرد به‌شداری كۆبوونه‌وه‌كان ده‌كات .

ئۆپۆزسیۆنی سوریا پێشتر رایگه‌یاندبوو كه‌ به‌شداری دانوستانه‌كان ناكات ته‌نها دوای ئه‌وه‌ نه‌بێت كه‌ حكومه‌تی سوریا گه‌مارۆی سه‌ر شاره‌ گه‌مارۆدراوه‌كان هه‌ڵبگرێت و رێگه‌ بدات یارمه‌تی مرۆیی بگاته‌ ئه‌م شارانه‌ . به‌ڵام دواتر ده‌سته‌ی باڵای دانوستانه‌كانی ئۆپۆزسیۆن رای خۆی گۆڕی به‌وه‌ی به‌شداری دانوستانه‌كان بكات ، دوای ئه‌وه‌ی دڵنیایی له‌ ئه‌مه‌ریكا وه‌رگرت به‌وه‌ی دانوستانه‌كان له‌ سه‌ر هه‌مان رێچكه‌ی جنێڤ یه‌ك به‌رێوه‌ ده‌چێت .