ئه‌مه‌ریكا هۆشداریی ده‌داته‌ هاوولاتیانی كه‌ گه‌شت بۆ لوبنان نه‌كه‌ن به‌هۆی مه‌ترسییه‌ ئه‌منییه‌كان. ئه‌م هۆشدارییه‌ دوای ئه‌و ته‌قینه‌وانه‌ دێت كه‌ له‌ مانگی تشرینی دووه‌می رابردوو روویاندا و كوژرانی چل و چوار كه‌س و بریندار بوونی دووسه‌دی دیكه‌یان لێكه‌وته‌وه‌ كه‌ رێكخراوی تیرۆریستی داعش به‌رپرسیاریه‌تی خۆی له‌ ته‌قینه‌وه‌كان راگه‌یاند .

له‌ به‌یاننامه‌یه‌كی وه‌زاره‌تی ده‌ره‌وه‌ی ئه‌مه‌ریكا هاتووه‌ كه‌ ئه‌گه‌ر هه‌یه‌ كرده‌وه‌ی توندو تیژی له‌ هه‌ر كاتێكدا له‌ لوبنان رووبدات و پێشتریش له‌ چه‌ند شارێكی گه‌وره‌ی ئه‌م وڵاته‌ رووبه‌رووبوونه‌وه‌ی چه‌كداری روویانداوه‌ .

هۆشداریشی دایه‌ ئه‌و هاوولاتییه‌ ئه‌مه‌ریكییانه‌ی كه‌ ئێستا له‌ لوبنانن، مه‌ترسی له‌ سه‌ر ژیانیان ده‌بێت ئه‌گه‌ر له‌و وڵاته‌ بمێننه‌وه‌ .