لیژنەی بۆندستاگ، تایبەت بە کاروباری بودجە لە پەرلەمانی ئەڵمانیا رەزامەندی نیشانداوە بۆ دامەزراندنی دوو هەزار کەس لە نووسینگەی فیدراڵی بۆ کاروباری کۆچ و کۆچبەران، بەئامانجی پەلەکردن لە کاروباری داواکانی کۆچبەران بۆ وەرگرتنی مافی پەنابەریێتی.
بەپێی ئەو پلان و بودجەیەی بۆ ساڵی ٢٠١٦ تەرخانکراوە، بەڵێن بە فرانک یۆرگن بەڕێوەبەری نووسینگەی فیدراڵی بۆ کاروباری کۆچ و کۆچبەران دراوە، پێش کۆتایی ئەمساڵ هەزار کەس بۆ نووسینگەکەی دابمەزرێنن.
ئەمە لە کاتێکدایە تسایۆر کاسار، ئەندامی پەرلەمانی ئەڵمانیا لەسەر پارتی مەسیحی و دیموکراتی سەر بە پارتەکەی ئەنگێلا مێرکل ئاماژەی بەوە کردووە، کە کۆی ئەو کەسانەی بۆ نووسینگەی فیدراڵی دادەمەزرێن دەگاتە سێ هەزار کەس.
تسایۆر دەڵێت ''هەریەکە لە فرانک یۆرگن، بەڕێوەبەری نووسینگەی فیدراڵی و تۆماس دی میزێر، وەزیری ناوخۆ داوای زیادکردنی ئەو ژمارەیان کردووە''.