فەرماندەیی هێزی ئاسمانی سوپای تورکیا رایگەیاند كە دوای فڕۆکە روسییەکە، فڕۆکەیەکی دیکەی نەناسراو سنووری ئاسمانی ئەو وڵاتەی بەزاندووە.

لەراگەیێندراوێكدا رۆژی سێشەممە 6 ی تشرینی یەكەمی 2015، فەرماندەیی هێزی ئاسمانی سوپای تورکیا رایگەیاند كە فڕۆکەیەک لە جۆری MIG-29 سنووری ئاسمانی تورکیای بەزاندووە، چوار خولەک و 15 چرکەش لە ئاسمانی تورکیادا ماوەتەوە.

دوێنێ دووشەمە 5ی تشرینی یەکەمی 2015، لە راگەیێندراوێکدا وەزارەتی دەرەوەی تورکیا رایگەیاند، كە فڕۆکەیەکی جەنگی رووسیا لە نزیک سنووری سووریا، ئاسمانی تورکیای بەزاندووە و ھێزی ئاسمانی وڵاتەکەشیان دوو فڕۆکەی جۆری F16ی بۆ دوورخستنەوەی فڕۆکە رووسییەکە رەوانەکردوون. ئەم رووداوەش كاردانەوەی تووندی توركیا و ئەمریكای لێكەوتەوە.

لە روونكردنەوەیەكیشدا وەزارەتی بەرگریی رووسیا رایگەیاند، كە فڕۆکەیەکیان لە جۆری سوخۆی-30 بۆ ماوەیەکی کەم بەدرێژایی سنووری سووریا چووەتە نێو ئاسمانی تورکیا، بەڵام تەنها چركەیەك ماوەتەوە و هۆكارەكەش خراپی كەشوهەوا بووە و هیچ مەبەست و هۆكارێكی دیكەی نادیار نەبووە.

































رووداو