ئه‌مرۆ له‌ بریتانیا پرۆسه‌ى ده‌نگدان بۆ هه‌ڵبژاردنى گشتى و هه‌ڵبژاردنى ئه‌نجوومه‌نه‌ ناو خۆییه‌كان ده‌ستیپێكرد كه‌ نزیكه‌ى په‌نجا ملیۆن كه‌س مافى ده‌نگدانیان هه‌یه‌ . له‌ هه‌ردوو هه‌ڵبژاردندا كێبڕكێ له‌سه‌ر شه‌شسه‌د و په‌نجا كورسیى ئه‌نجوومه‌نى گشتى واتا په‌رله‌مان و هه‌روه‌ها هه‌زاران كورسیى ئه‌نجوومه‌نه‌ ناوخۆییه‌كان ده‌كرێت . بڕیاریشه‌ ناوه‌نده‌كانى ده‌نگدان كاتژمێر ده‌ى شه‌و به‌ كاتى بریتانیا دابخرێن و پێشبینیش ده‌كرێت سبه‌ى هه‌ینى ئه‌نجامه‌كانى رابگه‌یه‌نرێت .

جێى باسه‌ له‌ هه‌ڵبژاردنى ساڵى دووهه‌زار و ده‌ بۆ یه‌كه‌م جار دواى جه‌نگى جیهانیى دووه‌م، حكوومه‌تى هاوپه‌یمانى پێكهات ، هه‌ر پارتێكیش زۆرترین كورسیى په‌رله‌مان به‌ده‌ستبهێنێت، سه‌رۆك وه‌زیران له‌و پارته‌ ده‌بێت و حكوومه‌ت پێكده‌هێنێت . هه‌ر كاتێكیش هیچ حزبێك نه‌یتوانى زۆربه‌ى كورسییه‌كان به‌ده‌ستبهێنێت، ئه‌وا ئه‌و پارته‌ى ژماره‌ی كورسییه‌كانى زۆرترینه‌، حكوومه‌تى كه‌مینه‌ یان حكوومه‌تى ئیئتیلافى پێكبهێنێت.