ئه‌مڕۆ ئاژانسی هه‌واڵی ئه‌نادۆڵی توركیا رایگه‌یاند, له‌به‌ر به‌رزبوونه‌وه‌ی كوشتار له‌ وڵاته‌كه‌یان, چوار سه‌د په‌نابه‌ری سوریا سنوری په‌نایان بۆ توركیا هێناوه‌, ئاشكراشیكرد, ژماره‌ی په‌نابه‌رانی سوری بۆ 24 هه‌زار و 500 كه‌س به‌رزبۆته‌وه‌.
ئاژانسه‌كه‌ ئاماژه‌یدا كه‌ 396 په‌نابه‌ر له‌ پارێزگای ئه‌دله‌ب, كه‌ پێگه‌ی راپه‌رینه‌ و 14 مانگه‌ ناره‌زاییه‌كان دژی به‌شار ئه‌سه‌د له‌و شاره‌ به‌رده‌وامه‌, هاتوونه‌ته‌ هه‌رێمی هاتای توركی و ناوی خۆیان له‌ گونده‌كانی كاوالجیك و كۆساكلی و بۆكۆلمیز تۆماركردووه‌.

به‌پێی هه‌واڵه‌كه‌ی ئه‌و ئاژانسه‌, چوار له‌و په‌نابه‌رانه‌ به‌ هۆی برینداربوونیان بۆ نه‌خۆشخانه‌ گوازراونه‌ته‌وه‌.
ژماره‌ی په‌نابه‌رانی سوریا له‌ چوار وڵاتی دراوسێی ئه‌و وڵاته‌ گه‌یشتۆته‌ 73 هه‌زار كه‌س, كه‌ نه‌ته‌وه‌ یه‌كگرتووه‌كان هاوكاریان ده‌كه‌ن, بۆچوونه‌كانیش ئه‌وه‌ نیشان ده‌ده‌ن كه‌ ئاواره‌كانی ناوخۆی سوریا به‌ 500 هه‌زار مه‌زه‌نده‌ ده‌كرێت.