ئامینە جەبار یاریزانی یانەی سیروانی هەڵەبجە

هەوڵدەدەم زیاتر ئاستی خۆم بەرەوپێش ببم
پارێزگای كەركووك یەكێك لەم پارێزگایانەی كوردستانە كەخاوەنی چەندین كچە یاریزانی بەهرەمەندە لە یارییە جۆراوجۆرەكان، كە و ئاست و توانایان تایبەتە لە وەرزشە جۆراوجۆرەكان، لەم شارەش گرنگی زۆر بە یاریی تۆپی پێی كچان دەدرێت، یەكێك لە كچە یاریزانەبەتواناكانی شارەكەش كە خاوەنی چەندین ئەنجامی باشە لەگەڵ یانەكان لەسەر ئاستی كوردستان و عێراقی ئەویش كچە یاریزان ئامینە جەبار-ە ناوبراو لەدایك بووی ساڵی 2002ی پارێزگای كەركووكە و یاریزانی یانەی سیروانی هەڵەبجەیە لە خولی نایابی كچانی یانەكانی كوردستان، پێشووتریش یاری بۆ یانەكانی نەوتی باكوور و گازی باكوور و سۆلاڤی نوێ وشەباب وەتەن و سەحە و قوە جەوییە و سەورە و ئافرەتانی نەینەوا كردوە لە هەردوو خولی عێراق و كوردستان، ئێمەش لەنزیكەوە ئەم دیمانەیەمان لەگەڵی ئەنجامدا.
* بۆچی یاری تۆپی پێت هەڵبژارد؟
- چونكە خولیاییەكی منداڵیم بوو دەمزانی كە تێدا سەركەوتوو دەبم.
*هەست ناكەی وەرزشێكی قورست هەڵبژاردوە زیاتر كێبڕكییە؟
- ڕاستە وەرزشێكی قورسە، بەڵام حەزو خولیام وای كردووە ئاسان بێت بەڵامەوە.
* بۆچی یاری تۆپی پێی لە ئاستی پێویست دا نییە؟
- لە ڕاستیدا یاری تۆپی پێی لە هەموو دونیا ئێستا گرنگی پێ دەدرێت، بەڵام چونكە وەكو پێویست پاڵپشتی ناكرێت لەلایەن هیچ لایەنێكەوە، بۆیە ئاستەكەی بەم شێوەیە.
* هەست ناكەی ئەم یارییە بۆ ئاستی كچان لە شارەكانی كوردستان پێشوازی باشی لێ نەكراوە ؟
- بەڵێ‌ بەداخەوە لە كوردستان بە گشتی وە بەتایبەت كچان هیچ پاڵپشتەیەك و پشتگیرییەكی لێ نەكراوە .
*ئاستی یاری تۆپی فوتساڵ چۆن دەبینی لە كوردستان بە شێوەیەكی گشتی؟
- تاڕادەیەك باشە ئێستا ساڵانە خولێك دەكرێتەوە بۆ ئاستی كچان ئەوەش هەر باشە.
*چی بكرێت باشە بۆ هێنانە پێشەوەی ئافرەتی وەرزشكار بۆ نێو ئەم یارییە؟
- گرنگی زیاتریان پێ بدرێت و خولی زۆرتریان بۆ بكرێتەوە، پاڵپشتی كچان بكرێت لە ڕووی ماددی و مەعنەوییەوە ئەمانە هەمووی دەبنە هۆكار بۆ بەرز بوونەوەی ئاستی ئەم یارییە.
*بەرنامەت چیە بۆ داهاتووی خۆت وەكو كچە وەرزشكارێك؟
-هەوڵدەدەم زیاتر ئاستی خۆم بەرەوپێش ببم و و لە خولەكانی ناوەوەی عێراق و پاڵەوانێتیەكانی دەرەوە بەشداری بكەم.
*لە دوو خول بەشداری دەكەی لە كوردستان و عێراق كامەیان بەهێزترە؟
-بە دڵنیاییەوە هەردووكیان بۆ من بەهێزە، تاڕادەیەك ئاستیان نزیكن لەیەكەوە.
*گرفتی ئەم یارییە لە چی دەبینی؟
- نەبوونی یارمەتی پێویست و پاڵپشتی یانەكان بۆمان لە ڕووی مادییەوە.
*خەونی وەرزشیت چیە وەكو وەرزشكارێك؟
-خەونم ئەوەیە بگەمە ئاستێكی بەرزی یاری كردن.
*هیچ گرێبەستێكت پێشكەش كراوە لەلایەن یانەكانی تری عێراقی؟
-بەلێ لە چەندین یانە گرێبەستم پێشكەش كراوە.
*یاری كردن لە ریزی هەڵبژاردەی عێراقی چ هەستێكت پێ دەبەخشێ‌؟
- هەستێكی خۆش و تایبەتە وە خەونی سەدان یاریزان كەیاری بۆ هەڵبژاردەی ووڵاتەكەی بكات.
*ئەگەر شتێكت ماوە لە كۆتایدا؟
- زۆر سوپاس بۆ گوڵانی پێشەنگ، هیوادارم لە كوردستان و عێراق پشتگیری كچە وەرزشوانان بكرێت لە هەموو ڕوویەكەوە.