هیچ سەرژمێرییەك لەم بارودۆخە نالەبارە لە بەرژەوەندیی كورد و كوردستانییەكان نییە، ئەوانیش لە بەغدا بۆیە لەم كات و ساتەدا سەرژمێریی گشتیی دانیشتووان ئەنجام دەدەن، چونكە باش دەزانن، ئەم سەرژمێرییە لە بەرژەوەندیی دانیشتووانە كوردستانییەكەی ناوچە جێناكۆكەكان نابێت، پێناچێت لەم بارودۆخەشدا شتێك كە لە بەرژەوەندی كورد بێت، بەغدا ئەنجامی بدات، یان بە حەماسەوە هەنگاو بۆ جێبەجێكردنی هەڵبگرێت. كورد لە ئێستادا برسییە و بۆ مووچە و بوودجە پشت بە بەغدا دەبەستێت. كورد لە ئێستادا بە ئاستێك ناكۆك و ناتەبایە، كە كەسانی وا هەن، هەرچی زانیاری و داتای دژ بە كورد هەیە، دەیبەنە بەغدا بۆ لاوازكردنی هەرێمی كوردستان و بەهێزكردنی دەسەڵاتی حكومەتی ناوەندی. بەداخەوە هەندێك جار بە حزب و هەندێك جار بە كەسایەتی ئەم دژایەتییەی هەرێمی كوردستان دەكرێت. ئەوەتا باس لەوە دەكرێت، 300 هەزار كەس لە نەتەوەی كورد لەپارێزگای كەركووك نەماون و بەپێچەوانەوە 300 هەزار عەرەبی ناوچەكانی باشووری عێراق هێنراون بۆ كەركووك و بە دەیان گەڕەك بۆ عەرەبەكان دروست كراون. ئەو كوردانەی كەركووك كە چەندین ساڵە لە پارێزگاكانی هەولێر و سلێمانی ئاوارە بوون، ئەو ڕۆحییەت و توانایەیان تێدایە كە بگەڕێنەوە بۆ كەركووك و وزەیەك و ژیانەوەیەك بدەن بە كەركووك، بەڵام من هەرگیز بڕوا ناكەم، ئەو كوردە زۆرەی ئاوارە و دەربەدەر بوون و لە ئێستادا لە شارەكانی هەولێر و سلێمانین بگەڕێنەوە بۆ كەركووك، خۆ ئەگەر بگەڕێنەوەش ئەوا ڕێژەیەكی زۆر كەم دەگەڕێنەوە، بە ناهەقیشیان نازانم كە ناگەڕێنەوە. لەلایەكی دیكەوە كە ئێمە سوور بزانین، لە پرۆسەیەكدا شكست دەهێنین و زیانمان پێ دەگات، باشتر وایە نەیكەین.

گرنگە دانیشتووانە كوردەكەی ناوچە جێناكۆكەكان هەست بەم بەرپرسیارێتییە بكەن، بۆ ئێستای خۆیان نا، بەڵكو دڵنیا بن، نەوەكانی خۆیان ڕۆژ لە دوای ڕۆژ زۆر لەدەست دەدەن. ئەوەتا دیالە و گوندەكانی بە تەواوەتی چۆڵ كراون. لەلایەكی دیكەوە ئەوانەی زۆر لە بەغدا نزیك دەبنەوە و بۆ بەرژەوەندیی خۆیان شكستمان پێ دەهێنن، بیر لەوە ناكەنەوە، كە لە سەردەمی ساڵانی شەستەكانەوە چ ئازار و كۆمەڵكوژییەكمان دەرهەق ئەنجام دراوە. لە ساڵی 1963 چی بە كورد نەكرا؟ بە سەدان گەنج خرانە ناو تەوێڵەكەی حامییەوە، دەنكە جۆیان لەناو تەپاڵەی حەیواندا دەرهێناوە و خواردوویانە و بە سەدان كەس گوللەباران كران. (مامۆستا یاسین)یان لە یاریگاكەی سلێمانی كوشت، تەنانەت حاكم ئەحمە و باوكی دكتۆر بەرهەم دەستگیر كرابوون. پێشمەرگە شەهید دەكرا و تەرمە پیرۆزەكەیان دەسووتاند و لە پشتەوەی زیلی سەربازی ڕایاندەكێشا. دەبێت گەنجەكانمان بیری هەموو ئەمانەیان هەبێت، ئێمەش دەبێت بۆ نەوەكانی دوای خۆمان باسی بكەین و دەستبەرداری مافە نەتەوەیی و نیشتمانییەكانی خۆمان نەبین.