شانازیی گشت تاکێکی کوردستان، ئەو پێکەوەژیانەی نێو تاکەکانی کوردستانە، کە بێ جیاوازیی رەنگ و ئایدیا و بۆچوونەکان، بە تەبایی بەیەکەوە دەژین، ئەو پێکەوەژیانیش وەکوو خوێن لەنێو دەمارەکانی هەموو کوردێکدایە و شتێک نییە دروستکراوبێ، بەڵکوو شتێکی ئیلاهییە، کە تاکی کورد لە هەر شوێنێکی ئەو جیهانە هەبێ، بە قبووڵکردنی بەرامبەرەكەی خۆی و بە تەبایی ژیان لە خەڵکی دیكە جیادەکرێتەوە.

شانازییە کە دەبینی لە کوردستان تاکی کورد و تورکمان و عەرەب و موسڵمان و ئاشووری و کلدان و نەتەوە و فەرهەنگە جیاوازەکان دراوسێی یەکترن و بەبێ کێشە لەگەڵ یەکتر دەژین و یەکتریان قبووڵە، کاتێ شەڕی تائیفی لە عێراق لە لوتکەدا بووە، لە کوردستان عەرەبی سوننە و شیعە بەبێ کێشە دراوسێی یەکتر بوون، کاتێ كریستیانەکان لە عێراق دووچاری ئازار و دەرکردن هاتن، کوردستان و شارەکانیان بۆ ژیان هەڵبژارد و زانییان لێرە لەژێر سایەی سەرکردە دڵسۆزەکانمان پارێزراون. کاتێ داعش شارەکانی ناوەڕاستی عێراقی وێران کرد و ئێزدییەکانی زیندەبەچاڵ کرد، لێرە بەوپەڕی شانازییەوە دەرگای ماڵ و مزگەوتەکانیان بۆ لەسەر پشت بوون و پارێزراو بوون.

بەڵام پرسیار لێرەدا ئەوەیە، ناشرینکردن و سڕینەوە و کاڵکردنەوەی ئەو فەرهەنگە کێ سوودی لێدەبینێ؟ ئایا لەو چواردەورەی کوردستان چ نموونەیەکت هەیە، تا بتەوێ چاوی لێ بکەی لەوەی خۆمان باشتر و جوانتر، تا شانازیی پێوە بکەین؟ ئایا وەک شارەکانی عێراق بین؟ یا سیاسییەکانمان هەمان سیاسەتی ئەوان پەیڕەو بکەن؟

خۆشگوزەرانی و بەرەوپێشچوونی تاکی کورد، کە ئێستا سەرەڕای ئەو هەموو قەیرانە سیاسی و ئابوورییەی کوردستان تیایدایە، کامە شوێن و ناوچەی عێراق و دەوروبەرمان باشترە لە ئێمە، تا تاکی کورد نائومێد بکەین و هەوڵ بدەین وەکوو ئەوانمان لێبێت.

ئەوانەی بە بڕیاری دادگای بەناو فیدراڵ دڵخۆش و خۆشحاڵن، نابێ بپرسن، ئەو جاشایەتی و نۆکەری و بێگانەپەرستییەی دەیکەن، کێ سوودی لێ دەبینێ؟ ئایا هیچ سوود بە ئێستای ئێمە دەگەیەنێت؟ ئایا سوود بە ئەوانیش دەگەیەنێ؟ كە دەزانن هەوڵە نەزۆکەکانیان بۆ لاوازکردنی قەوارەی هەرێمی كوردستان تەنیا و تەنیا خەیاڵە و مێژوو ئەو رووڕەشییەیان بۆ تۆمار دەکات.

حکوومەتی هەرێمی كوردستان بەوپەڕی شانازییەوە هەوڵەکانی دیارە و روونە، کە بە چ ئامانج و مەبەستێکە، دیدگا و رۆڵی مەسرور بارزانی بۆ حکوومەتداری گەواهی ئەو راستییەیە، کە شۆڤێنییەکانی عێراق پێیان هەرس ناکرێت، کە لە چوارچێوەی کارنامەی کابینەی نۆیەم کوردستانێکی بەهێزتر و خۆڕاگرتر هاتوەەتە کایەوە و تیایدا ئاسۆیەکی روون و پڕشنگدار چاوەڕێی کوردستانییان دەکات.

کوردستانییان بە هەموو ئایدیا و بۆچوونە جیاوازەکانەوە، دەبێت ئەو راستییەیان لا روون بێت، کە ئەوانەی لەژێر دەمامک و ناوی جیا جیا کار لەسەر لاوزکردن و نەهێشتنی ئینتما لای تاکی کورد دەکەن، مەبەستیان گڵاوە، چونکە ئەوڕۆی کوردستان بەرهەمی خوێنی شەهیدان و شۆڕش و بەرخودانی سەدان ساڵەیە، نەک رەیان کلدانی هەوڵی بۆ دابێت و جاشایەتیی بۆ بکرێت.

قەتیسکردنی مافی کورد تەنیا و تەنها لە بودجە و مووچە، هەوڵێکی دیكەی نەزۆکە بۆ لاوازکردنی کوردستان و بۆ لەبیربردنەوەی مافە سەرەکییەکانی دیكەمان، کێشەی ئێمە كێشەی خاک و قبووڵکردنی کوردە وەک هاوبەش لە چوارچێەوەی عێراقێکی فیدراڵ، کاری سەرەکیمان گەڕاندنەوەی خاک و راستکردنەوەی دیمۆگرافیایە، سەندنی مافە کە لێمان زەوت کراوە، هەوڵی سەرەکیمان پاراستنی کوردستان و تاکی کوردە لە میلیشیا مەزهەبییەکان، کە بوونەتە بەڵا بەسەر عێراقەوە.

سیاسییەکانی عێراق باش ئەو راستییە دەزانن، بەهۆی ئەو هەموو گەندەڵی و بەهدەرادنی سامانی گشتییەی کە بیست ساڵە لە عێراق کردوویانە، بە لاوازکردنی قەوارەی هەرێم پێیان راست نابێتەوە، خەڵکی خۆشیان باش دەزانن ئەوان چییان بۆ خەڵکی خۆیان کردووە و حکوومەتی کوردستانیش چی بۆ کوردستانییان کردووە، سەرکردایەتیی و حکوومەتی کوردی لەگەڵ کەموکورتییەکانیشەوە، سەد قاتی ئەوان بۆ شکۆ و خۆشگوزەرانیی ئێمە دڵسۆزتر و خەمخۆرترن.

تاکی کورد دەبێ بوێریی ئەوەی هەبێت، بە جاش و خۆفرۆشەکان بڵێت ئیدی بەسە یاریکردن بە هەست و کەرامەتی ئێمە، سیاسییەکانمان با لەگەڵ حکوومەتی هەرێمیش ناکۆکییان هەبێت، بەڵام دەبێ بوێرییان هەبێ و دان بەو راستییەدا بنێن، ئەوە بە هەوڵ و بوێریی سەرۆک بارزانییە، کە سەر و ماڵ و سنوورەکانمان پارێزراون و کەرامەت و شکۆی تاکی کورد لەژێر سایەی حکوومەتی هەرێمی کوردستان پارێزراوتر و شکۆمەندترە.