لە تێکهەڵچوونی نێوان دوو گرووپ لە کەمپی پەنابەرانی فەلەستینی لە لوبنان، پێنج کەس کوژران و سەربازێکی لوبنانیش بریندار بوو.

لە ئەنجامی ململانێی نێوان دوو گرووپی فەلەستینی لە کەمپی عەین ئەلحلوە لە باشووری لوبنان کە پەنابەرانی فەلەستینی تێیدا نیشتەجێن، ٥ کەس کوژران و سەربازێکی لوبنانیش بریندار بوو.

بەپێی میدیاکانی لوبنان، ئەبو ئەشرەف ئەلعرموشی ئەندامی بزووتنەوەی فەتح و ٤ پاسەوانەکەی لەم شەڕەدا کوژراون.

هەروەها سوپای لوبنان لە هەژماری تایبەتی خۆی لە تۆڕی کۆمەڵایەتی تویتەر سەبارەت بەم پێکدادانانە کە لە شەوی ڕابردووەوە بەردەوامە نووسیویەتی: لە ئەنجامی گوللە هاوەنێک کە لەم کەمپەوە تەقێندرا، سەربازێک بریندار بوو.

هەروەها ڕۆژنامە ناوخۆییەکان ڕایانگەیاند کە ململانێکان لەم کەمپەدا بەردەوامە و سوپای لوبنان بۆ داخستنی دەروازەکانی هاتن و چوون ڕێوشوێنە ئەمنییەکانی زیاد کردووە.

تا ئێستا هیچ بەیاننامەیەک لە لایەن حکومەتی لوبنان و گروپە فەلەستینیەکانەوە سەبارەت بەم ململانێیە بڵاونەکراوەتەوە.

 

 

 

 

گوڵان: سەردار خەلیل