د.سالار عوسمان جیا لەوەی ئەندامی كۆمیتەی ناوەندی و بەرپرسی بەشی ڕۆشنبیری و ڕاگەیاندنی پارتی دیموكراتی كوردستانە، لە هەمان كاتدا ڕۆژنامەنووس و نووسەر و توێژەرێكی دیاری كوردستانە و، قەناعەتی بەوەیە كە خەمی سەرەكیی میدیا و ڕاگەیاندن دەبێت خەمی نیشتمان بێت و لە پەنجەرەی خەڵكەوە سەیری كۆی كێشەكانی كۆمەڵگە بكرێت و، بیر و بۆچوونە جیاوازەكانی لە دەوری خەمەكانی خەڵك كۆبكرێنەوە و هەوڵ بدرێت كە هەموو پێكەوە بە جیاوازیی ئایدیۆلۆژیەتی سیاسی و بە جیاوازیی ئایین و نەتەوە، بە دەستەجەمعی خەمی خەڵك بە خەمی خۆمان بزانین و پێكەوە بە یەكگرتوویی چارەسەری گونجا و بۆ كێشەكان بدۆزینەوە. لە بازنەی گفتوگۆی ئەمجارە «ماددەی هۆشبەر و مەترسییەكانی»، قسەكردن و گفتوگۆی لەسەر ئەم بابەتە هەستیارە بۆ میوانەكان بەجێهێشت و پێی گوتن: «ئێمە حەزدەكەین گوێ لە داتا و زانیاری و پێشنیار و چارەسەرەكانی ئێوە بگرین»، بەڵام لە پەیڤێكی كورتدا بەمجۆرە باسی لە ئامانجەكانی بازنەی گفتوگۆ بۆ میوانەكان كرد:

«خۆشحاڵین لە ئەڵقەیەكی دیكەی بازنەی گفتوگۆ پێكەوە گفتوگۆ لەسەر پرسێكی زۆر هەستیار دەكەین كە ئەویش «پرسی ماددەی هۆشبەر و مەترسییەكانی»یەتی، ئەم پرسە پێش ئەوەی بڵێم پەیوەندی بە ئاسایشی نەتەوەیی هەرێمی كوردستانەوە هەیە، لە هەمان كاتدا پەیوەندی بە ئاسایشی تاك بە تاك و پەیوەندی بە ئاسایشی تەواوی كۆمەڵایەتی ئێمەوە هەیە، ئەوجا لە حزووری ئێوەی پسپۆڕ و تایبەتمەند و پەیوەندیدار بەم پرسە هەستیارە، من قسەیەكم نییە بیكەم و حەز دەكەم گوێ لە پێشنیار و بۆچوون و زانیارییە بەرزەكانی ئێوە بگرین، بۆیە زیاتر لەسەر ئامانجی بازنەی گفتوگۆ قسە دەكەم.

ئەم بازنەی گفتوگۆیە كە مانگانە گفتۆگۆیەكی جددی لەسەر پرسێكی گرنگی كۆمەڵگە بەڕێوە دەبات، ئامانجی سەرەكیی بازنەی گفتوگۆ ئەوەیە بیروبۆچوونە جیاوازەكان پێكەوە كۆبكاتەوە و ڕاستەوخۆ و ڕاشكاوانە لەسەر خەمی خەڵك قسە بكەین و، پێشنیار و چارەسەری گونجاویان بۆ بدۆزینەوە، زۆر خۆشحاڵیشم لەم ئەڵقەیەدا بیروبۆچوونە جیاوازەكان پێكەوە دەبینم و پێكەوە گفتوگۆ لەسەر خەم و ئاریشەكانی كۆمەڵگەی خۆمان دەكەین.

نەریتی ئەم گفتوگۆیە بەو جۆرەیە، پێش ئەوەی ئێمە گفتوگۆ بكەین، ڕاپرسییەك، یان ڕاپۆرتێكی مەیدانی لەگەڵ خەڵك ئەنجام دەدەین و دوای نمایشكردنی داتا و قسەكانی خەڵك، ئینجا ئەو پسپۆڕ و تایبەتمەندانەی ئاماددە بوون، ڕاستەوخۆ گفتوگۆی ڕاشكاوانە لەسەر خەمەكانی خەڵك دەكەن، ئەمەش واتە «بازنەی گفتوگۆ» هەم خەم و ناڕەزاییەكانی خەڵك بە ڕاستگۆیی بڵاو دەكاتەوە، هەمیش كۆمەڵێك ڕاسپاردە و بۆچوون و میكانیزمی چارەسەركردنی كێشەكان بڵاو دەكاتەوە و دەیگەیەنێتە ئەو شوێنانەی كە ئێستا ئەم وڵاتە بەڕێوە دەبەن، ڕاشكاوانەتر ئامانجی بازنەی گفتوگۆ ئەوەیە ببێتە پانتاییەكی كراوە بۆ لێكتێگەشتنی نێوان خەڵك و دەستەبژێری نیشتمانپەروەری ئەم وڵاتە لە بوارە جیاوازەكاندا، ئەمەش لە پێناوی ئەوەیە كە دەبێت و پێویستیشە ئێمە هاوكاریی حكومەتی خۆمان بكەین لە چۆنیەتی چارەسەكردنی كێشەكانی خەڵك و كۆمەڵگەدا.

لە شەش مانگی ڕابردوودا، گفتوگۆمان لەسەر شەش پرسی گرنگی كۆمەڵگە لە بازنەی گفتوگۆدا بەڕێوە بردووە، ئەو پرسە گرنگانەی گفتوگۆمان لەسەر كردوون، بریتی بوون لە «گەنج و ڕەخنە سیاسییەكانی، ئافرەت و ڕۆڵ و پێگەی لە كایەی سیاسیدا، ئینتیمای نیشتمانی پرس و گەنگەشە، میدیای كوردی قۆناغ و بەرپرسیاریەتی، خەڵك و ئاستی پێشكەشكردنی خزمەتگوزاری، سەروەریی یاسا و ئاڵنگارییەكانی لە هەرێمی كوردستاندا».

پوختەی گفتوگۆكانی ئەم شەش بازنەیەمان هەموو مانگێك لە گۆڤاری گوڵان بڵاو كردووەتەوە، ئێستاش دوای تەواوبوونی ئەو گفتوگۆیانە، كراوە بە دوو كتێب بە هەر دوو زمانی كوردی و عەرەبی، بۆ ئەوەی وەك دیكیۆمێنت و پێكەوە ئەو شەش پرسە گرنگە لەبەر دەستی خوێنەران و بەرپرسانی ئەم وڵاتە هەبن.

لێرەوە دەمەوێت هەڵوەستەیەكی جددی لەسەر بایەخ و گرنگیی گفتوگۆ بكەم. بە داخەوە لە كوردستان بە هۆی ململانێی ناتەندروستی سیاسی و لە یەكتری تێنەگەیشتن، بایەخی گفتوگۆ و بەرهەمداریی گفتوگۆ بە ئاراستەیەكی باش تێناپەڕێت، لەوانەیە ژینگەی سیاسی و پۆپۆلیستی كوردستان تا ڕاددەیەكی گەورە نەیهێشتبێت گفتوگۆ ببێتە ئەو هێزەی كە ببێتە پشتگر و یاریدەدەر بۆ ئەوەی حكومەت و دامەزراوە شەرعییەكانی هەرێمی كوردستان باشتر بتوانن خزمەتی خەڵك بكەن، هێزی گفتوگۆ، لێكتێگەیشتن و هاریكاریكردن لە نێوان خەڵك و حكومەتی خۆی دروست دەكات، هەر بۆیە بیرمەندان ڕایان وایە هەموو سیستمێكی سیاسی «دیموكراتی پەرلەمانی» پێویستی بەوەیە لێكتێگەیشتن و هاریكاری لەگەڵ خەڵك دروست بكات، ئەم لێكتێگەیشتن و هاریكارییەش بە گفتوگۆ دروست دەبێت، بەرهەمی ئەم گفتوگۆیەش دەبێتە كۆمەڵێك ڕاوێژی بە سوود كە حكومەت سوودی لێ وەردەگرێت، بۆیە ئەو بیرمەندانە پێیان وایە «ئەگەر سیستمی دیموكراتی پەرلەمانی نەگۆڕێت بۆ سیستمی دیموكراتی ڕاوێژكاری، نە دەتوانرێت هەنگاو بۆ حوكمڕانیی باش هەڵبگیرێت، نە بریارەكانی حكومەتیش لە ئاستی خواستی خەڵك و داوكارییەكانی شەقام دەبێت».

لەبەر ڕۆشنایی ئەم ئاراستەیەی بازنەی گفتوگۆ كاری لەسەر دەكات، تكا و داوای من لە بەڕێزتان ئەوەیە زۆر بە ڕاشكاوی هەموو ڕاستییەكان باس بكەن و خاترمان نەگرن، ئامانجمان ئەوەیە ئاكامی ئەم گفتوگۆیە ببێتە ئەو هێزەی بتوانین بەرەنگاری ئەو پرسە هەستیار و مەترسیدارە ببینەوە كە ئەمڕۆ گەنگەشەی لەسەر دەكەین، ئەویش پرسی ماددەی هۆشبەر و مەترسییەكانییەتی.

قسەی كۆتاییم ئەوەیە كە بە ناوی بەشی ڕۆشنبیری و ڕاگەیاندنی پارتی دیموكراتی كوردستان و هەڤاڵانم لە بازنەی گفتوگۆ زۆر سوپاستان بكەین بۆ بەدەنگەوە هاتنی بانگهێشتنامەی ئێوەی بەڕێز و هاتنتان بۆ بەشی ڕۆشنبیری و ڕاگەیاندن بۆ سازدانی ئەم گفتوگۆیە. دووبارە سوپاستان دەكەین.