ئومێد خۆشناو پارێزگاری هەولێر بۆ گوڵان: جێبەجێكردنی دەیان پڕۆژە لە پارێزگای هەولێر دەستی پێ كردووە
لە ئەمساڵدا 130 پڕۆژە ئەنجام دراون و ژمارەیەكی دیكەش چوونەتە قۆناغی جێبەجێكردنەوە
چەندین پڕۆژە و ڕێوشوێن گیراوەتە بەر بۆ كەمكردنەوەی شوێنەوارەكانی لافاو
بە سێ قۆناغ هەڵمەتی دروستكردنی ئاوەڕۆی قورس و ڕیسایكلین دەستی پێ كردووە
لە هەولێر و دەوروبەری 11 پڕۆژەی تۆڕی ئاو و دروستكردنی ئاوەڕۆ جێبەجێ دەكرێن
لە بەشی دووەمی شەقامی150 مەتری (شەقامی شەقڵاوە –كۆیە) بە درێژیی 7.6 كیلۆمەتر تا كۆتایی ئەمساڵ دەكرێتەوە
11 قوتابخانە لەلایەن بەخشەرانەوە دروست دەكرێن و 240 قوتابخانەش لەلایەن دەزگای خێرخوازیی بارزانی نۆژەن كرانەوە
دروستكردنی شەقامێكی 30 مەتری لە گەڕەكی ژیان و 20 مەتری بۆ شاری شیاو و 20 مەتری لە گەڕەكی پێنجی حەسارۆك
دروستكردنی شەقامە ناوخۆییەكانی گردجووتیار و سەڵاحەددین و فەرمانبەران و نەسیج و ڕۆشنبیری و ژیان.
ئومێد خۆشناو پارێزگاری هەولێر لەم دیدارەی گۆڤاری گوڵاندا تیشكی خستەسەر دوا پڕۆژەكانی حكومەتی هەرێمی كوردستان، كە لە بواری پڕۆژە خزمەتگوزارییەكانی ڕێگەوبان و شەقام و ئاو و ئاوەڕۆ و كارەبا و پەروەردە و چەندین بواری دیكە جێبەجێ كراون و، وەرچەرخانێكی گەورەی لە بواری فراوانكردنی پڕۆژە خزمەتگوزارییەكاندا لێ كەوتووەتەوە، هەروەها باس لە جێبەجێكردنی دەیان پڕۆژەی نوێ دەكات. لێرەدا پوختەی دیمانەكەی گۆڤاری گوڵان لەگەڵ ئومێد خۆشناو پارێزگاری هەولێر بڵاودەكەینەوە.
* هەولێر وەكو پایتەختی هەرێمی كوردستان و ناوەندێكی گەورەی بازرگانی و نیشتەجێبوون و گەشتیاری، تا چەند لە توانادا هەیە پڕۆژە خزمەتگوزارییەكان و شەقام و كەرتەكانی پەروەردە و تەندروستی لە ئاست ئەم گەورەبوون و فراوانبوونەی پایتەختی هەرێمی كوردستاندا بن؟
- هەولێر وەكو پایتەختی هەرێمی كوردستان و ناوەندێكی گەورە و گرنگی ئابووری و كۆمەڵایەتی و چەق و بڕیاری سیاسی لە هەرێمی كوردستان، تادێت زیاتر فراوانتر و گەشەكردن بەخۆیەوە دەبینێت، لە تەمەنی كابینەی نۆیەمی حكومەتی هەرێمی كوردستاندا هەولێر لە ڕووی فراوانی و گەورەبوونەوە گۆڕانكاریی باشی بەخۆوە بینیوە، لە ڕووی پرۆسەی چاكسازی و دەستپێكردنەوەی پڕۆژەكان و زیادكردنی داهات و كەمكردنەوەی خەرجییەكانیشەوە وەرچەرخانێكی گەورەی بەخۆوە بینیوە، بۆ كەمكردنەوەی پاڵەپەستۆ لەسەر دامودەزگا خزمەتگوزارییەكان و باشتر خزمەتكردنی خەڵكی خەباتگێڕی دەڤەری سۆرانیش، پێش ساڵێك لەمەوبەر ئیدارەی سەربەخۆی سۆران ڕاگەیەندرا و چەند قەزاو ناحیەیەكی نوێیشی بۆ دامەزرا، من وەكو پارێزگاری هەولێر لەو كاتەی دەستبەكار بووم، لە دوای خوالێخۆشبوو دكتۆر فرسەت سۆفی، ئەركی پارێزگاریكردنی ئەم گەشە و ئارامی و پێشكەوتنانە و دابینكردنی زۆرترین خزمەتگوزاری و پڕۆژەم لەسەر شانە، نەك تەنیا بۆ ناو سەنتەری شاری هەولێر كە بە شێوەیەكی زۆر خێرا و پێوانەیی لە گەورەبوون و گەشەدایە، بەڵكو لە دابینكردنی خزمەتگوزاری و پڕۆژە بۆ تەواوی پارێزگای هەولێر بە هەموو قەزاو ناحیەكانیەوە. من گەشبین و دڵنیام كە لە ئاست خواست و ویستی دانیشتووانی پارێزگای هەولێردا دەبم، چونكە لە سەرەتای كابینەی نۆیەمی حكومەتی هەرێمی كوردستانەوە ئامانج لە كابینەكە و دیدگای ڕێزدار مەسرور بارزانی سەرۆك وەزیران بۆ حوكمڕانی تاكە میحوەر هاووڵاتییانە، هەر لە ڕاكێشانی خزمەتگوزاری بۆ زەوییەكان و دابینكردنی ئاو و كارەبا و دروستكردنی ئاوەڕۆ و پارك و پەرەپێدانی كەرتەكانی پەروەردە و تەندروستی و پێشخستنی ژێرخانی پارێزگای هەولێر و، دواتر بووژانەوەی سێكتەرەكانی كشتوكاڵ و پیشەسازی و بازرگانی و گەشتیاری و بەدواداچوونی داواكاری و پێشنیارەكانی چین و توێژەكانەوە، ساڵانی 2021 و 2022 هەر چەندە ساڵێكی سەختی دارایی بوو بەراورد بەو هەموو پڕۆژە و كارانەی هەولێر پێویستیەتی، بەڵام بە تەرخانكردنی بودجە و پاڵپشتیی جەنابی سەرۆكی حكومەتی هەرێم توانرا تەنیا لە ساڵی ڕابردوودا بە بەهای زیاتر لە 28 ملیار دینار پڕۆژە ئەنجام بدرێت، لەسەرجەم سنوورەكە بەپێی ژمارەی دانیشتووان و ڕیزبەندی گرنگیی پڕۆژەكان كاری باش كراوە، لە بیرمە تەنیا لە سنووری قەزای مەخموزور لە ساڵێكدا 56 پڕۆژە ئەنجام دراون و لە ئەمساڵیشدا زیاتر لە 130 پڕۆژە لە پارێزگای هەولێر جێبەجێ دەكرێن. بە شێوەیەكی گشتی وێڕای هەڕەشە و گرفتی كەمیی سیولە و ئاستەنگەكان، لە پڕۆژە و كارە خزمەتگوزارییەكان بەردەوامین، بەڵام بە ڕێژەیەكی باش بە پاڵپشتیی سەرۆكی حكومەت و پشتگیریی دانیشتووانی سەر بەرزی هەولێر، توانیومانە بەسەر زۆربەی گرفت و كێشەكاندا زاڵ بین، جوانترین نموونەش لە هاوینی ئەمساڵ بوو كە مەترسیدارترین كێشەی كەمیی ئاو و وشكەساڵیمان بەسەركەوتوویی تێپەڕاند. كاروانی ئاوەدانی و ئارامی بە هیچ شێوەیەك ڕاناوەستێت و بەردەوام دەبێت.
* وەكو ئاماژەت پێ دا، لە وەرزی هاوین و وشكەساڵیدا لە ئەگەری كەوتنەوەی قەیرانێكی سەختی كەمئاوی سەركەوتوو بوون، ئایا بە هەمان شێوە بۆ وەرزی زستان و بارانبارین لە هەڵمەتی ڕووبەڕووبوونەوەی ئەگەری دروستبوونی لافاو سەركەوتوو دەبن؟
- وشكەساڵی و كەمئاوی و دروستبوونی لافاو دوو بابەتی مەترسیداری جیهانییە، لە كابینە یەك لە دوای یەكەكانی حكومەتدا كار كراوە بۆ چارەسەركردنی كێشەی ئاوی خواردنەوەی هەولێر و، بەشێكی باشی چارەسەر كراوە، بەڵام فراوانبوون و گەورەبوونی شار و شارۆچكە و ناوەندی قەزا و ناحیەكان و بەرزبوونەوەی داواكاریی خەڵك بۆ ئاوی خواردنەوە و وشكەساڵی و وشكبوونی هەندێك لە بیرەكانی ئاوی خواردنەوە، هەمووی وا دەكەن بەردەوام بین لە دروستكردنی پڕۆژەی نوێی ئاو، من لە ماوەی دەستبەكاربوونم كاری جددیم كردووە لەسەر چارەسەركردنی كەموكورتییەكان، جوانترین نموونەش هاوینی ئەمساڵ بوو كە وێڕای وشكەساڵی و دابەزینی ئاستی ئاوی ژێرزەوی بە ڕاددەیەك هەموو پێشبینییەكان بەرەو ئەوە دەچوون كە قەیرانێكی توندی ئاوی خواردنەوە ڕوو بدات، بەڵام ئەوە پاڵپشتیی بەڕێزان جەنابی سەرۆكی حكومەت و وەزیرەكان و تیمەكەی بوون كە ڕێگە نەدرا ئەم كێشەیە ئاڵۆز بێت، سەرۆكی حكومەتی هەرێمی كوردستان لە سەرەتای دەستپێكی كاركردنمەوە دڵنیای كردمەوە كە بە هەموو شێوەیەك لە خزمەتی خەڵكدا دەبین، بۆ ئەم مەبەستە نەخشەی كارمان و دیدگامان بۆ خزمەتكردنی خەڵكی هەولێر و پارێزگاكە بۆ بەڕێزیان ڕوون كردووەتەوە و پابەندم بە جێبەجێكردنی و سوپاس بۆ خودای گەورە و میهرەبان و خەڵكی هەولێریش كە پاڵپشتم بوون.
هەر سەبارەت بە تێكچوونی ژینگە و گۆڕانكاریی خراپ لە ڕیتمی بارانبارین، ئەگەرێكی كراوەی دروستبوونی لافاو هەبووە و هەیە، تەنانەت ئەم حاڵەتە لە ئاسیا و ئەوروپا و وڵاتانی پێشكەوتوو ڕوو دەدات، بەتایبەتی لە شارە گەورەكان، لە شاری هەولێریش بەسەركەوتووانە توانیمان قەرەبووی زیانلێكەوتووانی لافاوی ساڵی ڕابردوو بكەینەوە، لەگەڵ ئەمەشدا لە هەڵمەتێكی گەورەی پارێزگا و وەزارەتی شارەوانی و بەڕێوەبەرایەتییە خزمەتگوزارییەكاندا كە بە سەدان ئامێر و كرێكار تێیدا بەشداربوون، هەڵمەتی پاككردنەوەی ئاوەڕۆ و مەنهۆڵەكان و پاككردنەوەی ڕێڕەوە سرووشتییەكان ئەنجام درا، تاوەكو تووشی مەترسیی كۆبوونەوەی ئاوی زیادە و دروستبوونی لافاو نەبین. جگە لە پاككردنەوەی مەنهۆڵ و ڕێرەوە سرووشتییەكان، هەڵمەتێكی دیكەی دروستكردنی ئاوەڕۆی قورس و ڕیسایكلینكردنی ئاوی هەولێر بە سێ قۆناغ دەست پێ دەكات، بۆ ئەوەی ئاوی ماڵان بەفیڕۆ نەچێت و، جارێكی دیكە دوای خاوێنكردنەوە بۆ پارك و پاخچەكان بەكار بهێنرێتەوە، هەر لەم چوارچێوەیەدا لە شاری هەولێر لە دوو ڕۆژدا كۆنفرانسی لافاوی شاری هەولێر بەڕێوەچوو، تێیدا هۆكار و چارەسەرەكان خرانە ڕوو، بەدواداچوونێكی جددی دەكەم بۆ جێبەجێكردنی ڕاسپاردەكانی كۆنفرانسەكە، بە شێوەیەكی گشتی لە هەولێر 11 پڕۆژەی خزمەتگوزاری لە بواری تۆڕی ئاو و دروستكردنی ئاوەڕۆ و پەرەپێدانی پرۆسەی دابەشكردنی ئاوی خواردنەوە لە نێو شاری هەولێر و دەوروبەری جێبەجێ دەكرێت، لە ناویدا پڕۆژەی ئاوەڕۆی گەڕەكی بێتواتە و دانانی تۆڕی ئاوی خواردنەوەی گەڕەكی گەڕەسۆر و تەعجیل درێژكردنەوەی تۆڕی ئاو و بەستانی ئاوی ئیفراز لە گەڕەكی قەڵای نوێ و دانانی تۆڕی ئاو لە گوندی شێخەشەل و چەندین پڕۆژەی بەستانی بیر و ئاوەڕۆی لوولەیی لە بەختیاری و گۆڕینی بۆریی ئاو لە گوندی حوجران و ناحیەی باسرمە و دروستكردنی ئاوەڕۆی لوولەیی لە ناحیەی بەحركە هەیە.
ئەمساڵ هەر لە وەرزی هاویندا كۆمەڵێك ڕێكارمان دەست پێ كرد بۆ كەمبوونەوەی لافاو لە هەولێر و لەو پێناوەشدا چەند پڕۆژەیەكی دیكەش لە ڕێگەی پیرمام و بنەسەڵاوە و نزیك ئەو شارانەی كە ساڵی ڕابردوو لافاویان تێدا ڕووی داوە جێبەجێ دەكرێن، بۆیە لە ڕێگەی گۆڤارەكەتانەوە ستایشی ڕۆڵ و ماندووبوونی فەرمانبەرانی خزمەتگوزاری و تیمەكانیان دەكەم.
* پارێزگای هەولێر و ناو سەنتەری شاری هەولێر بە ڕێگەوبانی باش و شەقام و ڕێگەوبانە نێوخۆییەكانی ناسراوە، بەڵام كاری نۆژەنكردنەوە و فراوانبوونیش هەر لە زیادبووندایە، بۆ پارێزگاری لەم دەستكەوتە چ پڕۆژەیەكتان لە بەردەستدایە؟
- رێگەوبانەكان بوونەتە پێداویستییەكی ئەم سەردەمەی هاووڵاتیان و داواكارییەكی زۆری لەسەرە، تەنانەت پەیوەندی بە سەلامەتی و ژیان و بژێوی هاووڵاتیانیشەوە هەیە، لەم ڕوانگەیەوە خۆشبەختانە بە پاڵپشتیی ئەنجومەنی وەزیران و لەسەر داهاتی ناوخۆی پارێزگاكە، بە دوو ئاراستە كاری گەورە و جوان كراون.
یەك: لەسەر ئاستی پارێزگا و ڕێگەكانی نێوان هەولێر و قەزاو ناحیەكان و بەدووسایدكردنی زۆربەی ڕێگەوبانەكان، كە لەم دواییەدا ڕێگەی خەلیفان بوو بەردی بناغەی بۆ دانرا لە ئیدارەی سەربەخۆی سۆران و، دروستكردنی تونێل و نۆژەنكردنەوەی ڕێگەوبانەكان، هەموو ئەمانە نموونەیەكی جوان و مۆدێرنی ڕێگەوبانن، بەتایبەتی لە نێوان پارێزگای هەولێر و پارێزگای دهۆك كە شادەماری بازرگانی و ئابووری و گەشتیاری و هاتووچۆی هاووڵاتیانە، لە ساڵی داهاتووش وەزارەتی ئاوەدانكردنەوە و نیشتەجێبوون كۆمەڵێك پڕۆژەی گەورە و ستراتیژیی دیكەی لە بەردەمدایە بۆ بەدووسایتكردنی ڕێگەوبانەكان.
دوو: لەسەر ئاستی ناو سەنتەری شاری هەولێر، دروستكردنی شەقامەكانی 120 و 150 و چەند شەقامێكی دیكەی 60 مەتری و بە سەدان كیلۆمەتر قیرتاوكردنی ڕێگەوبان و شەقامە نێوخۆییەكان لە سەرتاسەری پارێزگاكە، بەڵگەی ڕوون و ئاشكران، كە تیمەكانی شارەوانی بەردەوامن لە گەیاندنی خزمەتگوزاری بۆ گەڕەك و شەقامەكانی ناو شاری هەولێر پێش دەستپێكردنی بارانبارین، بە دەیان پڕۆژەی قیرتاو و نۆژەنكردنەوە و كار لە گەڕەكەكانی كوێستان و (پێنچ و هەشتی حەسارۆك) و تەیراوە و فەرمانبەران و بازاڕی تەیراوە و قیرتاوكردنی پاركی پێشمەرگە و، لە كەسنەزان و لە پێشانگای ئۆتۆمبێل و دەیان گەڕەكی دیكەی ناو شاری هەولێر ئەنجام دەدرێت، وابزانم شەقامی 120 مەتریی هەولێر و نزیكبوونەوەی تەواوبوونی بەشی دووەمی شەقامی 150 مەتری شەقامی (شەقڵاوە –كۆیە) تا كۆتایی ئەمساڵ دەكرێتەوە و لە 95%ی كارەكانی بە درێژیی 7.6 كیلۆمەتر تەواو بووە، هەروەها قیرتاوكردنی شەقامێكی 60 مەتری لە نێوان شەقامی خێرای 120 مەتری و كەندی كۆرنیش لە گەڕەكی كوێستان و زیلان و پێنچی حەسارۆك.
لەسەر بودجەی پڕۆژەكانی پەرەپێدانی پارێزگای هەولێر شەقامی چەند گەڕەكێكی ناوخۆی شارمان دەست پێ كردووە، ژمارەیەكیشیان تەواو بوون، لەوانە بە گوژمەی 785 ملیۆن دینار دەست كرا بە قیرتاوكردنی شەقامە ناوخۆییەكانی گەڕەكی سیمی خاتووناوا و، بە گوژمەی 214 ملیۆن دینار چەند شەقامێكی گەڕەكی ڕۆشنبیری كۆتایی هات، بە گوژمەی زیاتر لە یەك ملیار و 700 ملیۆن دینار پڕۆژەی قیرتاو و ئاوەڕۆی گەڕەكی ئاسوودە دەستی پێ كرد.
* پێش ئەوەی پۆستی پارێزگار وەربگریت، لەگەڵ ڕێكخراوەكانی قوتابیان و لاوان كارت كردووە، لە زۆربەی چالاكییەكانی لاوانیشدا بەشداریت، پرسیار ئەوەیە تا چەند پارێزگاری هەولێر بەردەوامە لە پاڵپشتی و هاندانی لاوان و دۆزینەوەی هەلی كار بۆیان؟
- بێكاری لە نێو گەنجان و دۆزینەوەی هەلی كار، خەمی سەرەكیی كابینەی نۆیەمی حكومەتی هەرێمی كوردستانە، سەرۆك وەزیران بەردەوام پاڵپشتی دۆزینەوەی هەلی كارە بۆ گەنجان لە ناو كەرتی تایبەت، بۆ ئەم مەبەستەش لە كۆبوونەوەی ئەنجومەنی وەزیراندا تەوەرێكی كۆبوونەوەكە تایبەت بوو بە بەرزكردنەوەی ڕێژەی بەكارخستنی خەڵكی هەرێمی كوردستان لە نێو كۆمپانیا و پڕۆژەكاندا بۆ سەرووی 70%، لەسەر ڕاسپاردەی جەنابیان لە سەرجەم دیدار و كۆبوونەوەكانیشمدا جەخت لەسەر ئەم بابەتە دەكەمەوە، من خۆم بە خەمخۆری ئەم توێژە دەزانم و سوپاس بۆ خودا گەنجان لە ئاستێكی بەرزی نیشتمانپەروەری و دڵسۆزیدان بۆ خاك و شارەكەیان، منیش لە هەوڵی بەردەوامدام بۆ دەستپێكردنەوەی قەرزی بچووك بۆ گەنجان، هەر لەبواری گەنجان ئێمە لە پارێزگا دەرگامان واڵایە بۆ پاڵپشتی و پشتگیریی هەموو چالاكییەكی نەتەوەیی و ڕۆشنبیری و هونەری و وەرزشی، هەر لەسەر بودجەی پارێزگای هەولێر گەلەری میدیا كە ڕەمزێكی هونەرییە لە شاری هەولێر بە دیزاینێكی نوێ و سەردەمییانە نۆژەن دەكەینەوە، لە هەولێر ژمارەیەكی زۆری كارگە و كۆمپانیا و بەڵێندەر كار دەكەن، خۆ ئەگەر ژمارەی ئەو كرێكارانەی كار دەكەن لە خەڵكی خۆماڵی بن و ڕێك بخرێنەوە هەلی باش بۆ گەنجان دەستەبەر دەكەین، حكومەتی هەرێمی كوردستان گرنگی بە گەنجان و تواناكانیان دەدات، ئێمەش لە هەموو كار و پڕۆژەكانی گەنجاندا پاڵپشتیان دەبین.
* شار لە گەورەبووندایە و بینایە و پڕۆژەی زۆر گەورە جێبەجێ دەكرێن و شەقام و ڕێگەوبانەكانیش لە زیادبووندان. ئایا ئەمە مەترسیی كەمبوونەوەی ڕێژەی سەوزایی و پیسبوونی ژینگەی لێ ناكرێت؟
- هەموو ساڵێك تیمەكانی هەڵمەتی چاندنی نەمام و سەوزكردنی هەولێر بە سوودوەرگرتن لە نەمامگەكانی بەڕێوەبەرایەتیی ئەندازەی پارك و باخچەكانی سەر بە سەرۆكایەتیی شارەوانیی هەولێر، هەڵمەتێكی نەمام و سەوزكردنی هەولێر ئەنجام دەدەن، هەر لە دواكۆبوونەوەماندا یەكێك لە تەوەرەكانی كۆبوونەوەكە تایبەت بوو بە گرنگیی پاراستنی ڕێژەی سەوزایی، بەڵام ئەمە پێویستی بە بەشداریی هاووڵاتیان و هەڵمەتێكی فراوانی هوشیاری و ژینگەپارێزی هەیە، لە ئێستادا سەرقاڵی ئەوەین هەر پڕۆژەیەكی وەبەرهێنان و بازرگانی و پیشەسازی و گەشتیاری پابەند بكەین بە سەوزكردن و ڕواندنی ژمارەیەكی زۆری نەمام و بەخێوكردنی و پاراستنی، بەڵێ منیش لەگەڵ ئێوەدا هاوڕام، كار وا بڕوات بە دەستی خۆمان ژینگەی جوانی هەولێر تێك دەدەین و پانتایی سەوزایی كەم دەكەینەوە، بەمەش فلتەری خاوێنكردنەوەی شار لەو هەموو دووكەڵ و پیسی و ژەهرە لەدەست دەدەین. هیوادارم وەزارەتی شارەوانی ژمارەیەكی زۆر لە باخچەی ناو گەڕەكەكان ئاوەدان بكاتەوە و هەڵمەتی نەمام ڕواندن لەو باخچانەدا دەست پێ بكات، هەروەها پڕۆژەی ستراتیژیی پشتێنەی سەوزایی پایتەخت جێبەجێ بكرێت، من لێرەدا داواكارییەكم لە سەرجەم وەزارەتەكان هەیە، ئەویش ئەوەیە كە هەر پڕۆژە و كارێك ئەنجام دەدەن، با لە ناو تەندەری پڕۆژەكەدا با بەشێكی كەمی بودجەی پڕۆژەكەش بێت، بۆ سەوزكردن و نەمام چاندن تەرخان بكەن، ناكرێت پڕۆژەیەكی كارەبا و ئاو و بینایە و باڵەخانەیەك بە سەدان ملیۆن دینار جێبەجێ بكەن، كەچی شوێنی باخچە و پاركەكەی بیابان بێت و كاری لەسەر نەكەن، من نامەوێت هەموو كارێك بە سزا و بە زۆر بسەپێنم، دەبێت هاونیشتمانیانیش بەم ئەركە ئایینی و نەتەوەیی و مرۆڤایەتییە هەڵسن و هاوكارمان بن.
* پرسیارەكانمان زۆرن و بوارمان كەمە، دەكرێت بە كورتی باسی بارودۆخی كەرتی پەروەردە لە سنووری پارێزگای هەولێر بكەن؟
- ژمارەی قوتابیان لە زیادبووندایە و خواست لەسەر كەرتی پەروەردە لە هەڵكشاندایە، بە خۆشخاڵییەوە سەرۆكی حكومەتی هەرێمی كوردستان كاركردن لەسەر كەرتی پەروەردەی لە ڕیزبەندی پێشەوەی كارەكانی داناوە، لە چوارچێوەی بەرنامە و كارەكانی وەزارەتی پەروەردە و بەڕێوەبەرایەتیی گشتیی پەروەردەی هەولێر، كاری باش ئەنجام دراوە، كە جگە لە دروستكردنی چەندین قوتابخانەی 18 پۆلی، لەم دواییەدا لە كۆمەڵگەی پیرزین بە گوژمەی یەك ملیار و 841 ملیۆن دینار قوتابخانەیەكی 18 پۆلی دروست كرا و چەندین پڕۆژەی دیكەی بینایەی قوتابخانە كەوتوونەتە بواری جێبەجێكردنەوە، دڵخۆشین بەوەی 11 قوتابخانە لە لایەن بەخشەرانەوە دەستی پێ كردووە و 240 قوتابخانەی دیكە لە لایەن دەزگای خێرخوازیی بارزانی نۆژەن كرانەوە، سیاسەت و بەرنامەی ئێمە ئەوەیە زیاتر گرنگی بەو ناوچانە بدەین كە خەڵك و توێژێكی مامناوەند و هەژارنشینن، لە بواری قوتابخانەشدا لەو گەڕەكە هەژارنشینانە كاری باشمان كردووە و قوتابخانەی زۆرمان نۆژەن كردەوە، لە ساڵی داهاتووشدا چەندین پڕۆژەی دیكە دەچنە بواری جێبەجێكردنەوە. لە كۆتایی ئەم هەفتەیەشدا ڕێزدار مەسرور بارزانی سەرۆكی حكومەتی هەرێمی كوردستان بەشداری لە ئاهەنگی دەرچووانی خولی چل و یەكەمینی زانكۆی سەڵاحەدین كرد و، لە وتەیەكیدا جەختی لەسەر گرنگی و ڕۆڵی زانكۆی سەڵاحەدین كردەوە، كە بە زانكۆی دایكی ناوبرد لە پرۆسەی پێگەیاندنی لاوان و بونیاتنانی هەرێمی كوردستان، بەڕێزیان ئەوەشی خستە ڕوو كە هەموو هەوڵ و كۆششێك دەخەنەگەڕ بۆ چاكسازی و پەرەپێدانی خوێندن و فێربوون، لەمپەر و ئاستەنگ و هێرش و دەستدرێژییەكانیش نابنە لەمپەر لە بەردەم كاروانی ئاوەدانیدا.
من حەزم كرد لە بواری كارەباشدا پرسیار بكەن، چونكە پێشتر پارێزگای هەولێر بەراورد بە پارێزگاكانی دیكە زۆر پڕۆژەی هێڵ و دروستكرنی وێستگەی گۆڕین و تەنانەت وێستگەی بەرهەمهێنانی ئیش و كاری تێدا ڕاوەستا بوو، ئەوەتا وێستگەی 300 مێگاواتی خەبات و بە دەیان وێستگەی گەورە و مۆبایلی گواستنەوە و دابەشكردنی كارەبا و ڕاكێشانی فیدەر بۆ گەڕەك و ناوچەكان لە پارێزگاكە تەواو كراون و بارگرانییەكی زۆری لەسەر هەولێر كەم كردەوە، زۆرترین ڕێژەی بەستنی پێوەری زیرەكیش لە پارێزگای هەولێر تۆمار كرا، كە ڕۆڵی لە كەمبوونەوەی بەرچاوی سووتانی موحاویلە و سەرپێچی و بێسەروبەری كەرتی دابەشكردنی كارەبا هەبووە، بەم نزیكانەش وێستگەی گەورەی گواستنەوەی كارەبای شاوەیس لە مەراسیمێكدا دەكرێتەوە، ئەم پڕۆژە و كارانە بونیاتنانی ژێرخانی هەولێرە، بە خۆشحاڵییەوە كەرتی تایبەت و وەزارەتی كارەبا دەستی كردووە بە گرنگیدان و هاندانی بەرهەمهێنانی كارەبا بە وزەی خۆر، كە وزەیەكی دۆستی ژینگەیە و سووتەمەنی ناوێت و پاك و خاوێنە، ئێمەش لە پارێزگای هەولێر پاڵپشتی دەكەین و لەم نزیكانەدا بەردی بناغە بۆ چەند پڕۆژەیەكیش دادەنێین. هەولێر خاوەنی چەندین شاكار و پڕۆژەی گەورە و بونیاتنانی ژێرخانە، كە بە پاڵپشتیی سەرۆكی حكومەت و پشوودرێژی و پشتگیریی خەڵكە دڵسۆزەكەی ڕۆژ لە دوای ڕۆژ لە گەشە و بووژانەوەی بەردەوامدایە.
* سەبارەت بە ئیدارەی سەربەخۆی سۆران، تاچەند هەماهەنگی و هاوكاریتان بۆ پاڵپشتی و یارمەتیدانی ئەو ئیدارە سەربەخۆیە هەیە؟
- دوای تێپەڕبوونی ساڵێك بە سەر ئیدارەی سەربەخۆی سۆراندا پیرۆزبایی لە خەڵكی دەڤەری سۆران دەكەم، لەو ماوەیەدا هەشت بەڕێوەبەرایەتیی گشتی و چەندین بەڕێوەبەرایەتی و فەرمانگەیان بۆ دامەزراوە، كە ڕۆڵی لەسەر كەمبوونەوەی قەرەباڵغی و كارەكانی بەڕێوەبەرایەتییە گشتییەكانی هەولێر هەبووە و كارئاسانیی زیاتری بۆ بەڕێوەچوونی مامەڵەی هاووڵاتیان كردووە، وەكو پارێزگای هەولێر كە ئیدارەی سەربەخۆی سۆران لەناو چوارچێوەی ئەم پارێزگایەدایە، ئامادەیی هەموو هاوكاری و پاڵپشتییەكمان بۆیان بووە، هەر لەو ساڵیادەدا بەردی بناغەی چەند پڕۆژەیەك دانرا.
* لە سنووری پارێزگای هەولێر چەند كەمپی ئاوارەكان هەن، حكومەتی عێراق بڕیاری داخستنی كەمپەكانی داوە، ئایا لەمەدا هیچ كێشەتان بۆ دروست بووە؟
- هەولێر و هەولێرییەكان بە میواندۆستی ناسراون، لە ماوەی چەند ساڵی ڕابردوودا زۆرترین ئاوارە و پەناهەندە ڕووی لەم شارە كردووە و، چەندین كەمپی گەورەمان بەڕێوە بردووە، ئەمەش فشار و پاڵەپەستۆیەكی زۆری لەسەر فەرمانگە خزمەتگوزارییەكان دروست كردووە، ئەمە وێڕای دابینكردنی پێداویستییەكانیان، ئێمە لەگەڵ ئەوەدا نین كەمپی ئاوارەكان دابخرێت و میوانەكانمان بە زۆرەملێ بنێرینەوە و هەرگیز ئەم كارە ناكەین، بۆ دابینكردنی پێداویستیی كەمپەكان بە هاوكاریی ڕێكخراوی خێرخوازیی بارزانی و یو ئێن و دەزگای مرۆییەكانی دیكە لە هەوڵەكانمان بەردەوامین، بەردەوامیش پڕۆژەی خێرخوازی و دابینكردنی ئاو و كارەبا و پێداویستییە پزیشكییەكان و قوتابخانەكان جێبەجێ دەكەین، ئومێدەوارین حكومەتی عێراقیش بەم ئەركەی خۆی هەڵسێت و هیچ نەبێت هاوكاریی خەڵكەكەی خۆی بكات.
