گوڵاڵە پشدەری، بڕوانامەی بكالۆریۆسی لە پەرستاری هەیە و، وەك تووشبووێكی شێرپەنجەی مەمك حەز و خولیای لە كاری خۆبەخشییە لە پێناو هاوچارەنووسانیدا (تووشبووان بە شێرپەنجەی مەمك) و دامەزرێنەری سەنتەری پەنایە بۆ پشتیوانی لە تووشبووان بە شێرپەنجە لە كوردستان و دانیشتووی شاری ئەمستردامی هۆڵەندایە، خاوەنی یەك پەرتوك و یازدە نامیلكەی تایبەت بە نەخۆشیەكانی شێرپەنجەیە، ئەندامی چالاكی كۆمەڵەی شێرپەنجەی مەمكە لە هۆڵەندا، خەڵاتی ماڵباتی شاهانەی هۆڵەندای پێ بەخشراوە، لەم دیمانەیەشیدا لەگەڵ گۆڤاری گوڵان، باس لە وێستگەكانی ژیانی خۆی لەگەڵ شێرپەنجە دەكات.

گوڵان: كۆمەڵایەتی

 

هاوكات لەگەڵ ڕۆژی جیهانیی ڕووبەڕووبوونەوەی شێرپەنجە كە دەكاتە 4ی شوبات، گوڵاڵە پشدەری خانمە چالاكی مەدەنیمان بەسەر كردەوە كە خۆی یەكێك لە تووشبووانی شێرپەنجەیە و بەمجۆرە باسی ئاریشەكانی ژیانی خۆی و ئیرادەی ڕووبەڕووبوونەوەی نەخۆشییەكەی كرد: «لە سەرەتادا شۆك بووم و پێی شڵەژام، بەڵام وانەیەكی پاكی خوایی بوو كە پێی گوتم، ئەی ژن ئارام بگرە و بەهێز بە و ژنانی لاواز هاوكاریی تۆیان پێویستە، كاری خۆبەخشی لە مندا بە هۆی هەڵگرتنی باری گرانی ئەو نەهامەتییانەی ژیانە كە وەك ژنێكی كورد هەم لە نیشتمان و هەم لە هەندەران ڕووبەڕووی بوومەوە. سەرەنجام خەم و ناخۆشیم گۆڕا بە هێزی بوێری و هەستكردن بە ئازاری بەرامبەر تاكو بێمە مەیدان و باسی بكەم و، ئەو كەلێنانە نیشان بدەم بۆ كاركردن لەسەریان لە ناو كۆمەڵگەدا، یان قامك لە سەر برین دابنێم بۆ چاككردنەوە و پێشگیریكردن و خۆپارستن نەك تەنیا لە بەرژەوەندیی خۆم بەڵكو بۆ هەمووان بووە، سێزدە ساڵ پێش ئێستاش لە (ئۆكتۆبەری ٢٠٠٧) و لە ڕێگەی شاشەی كوردستان تی ڤی لە ڕاپۆرتێكدا ڕاشكاوانە باسی ئەزموونی نەخۆشیی خۆم و خەمەكانم و قۆناغەكانی جیاجیای دۆزینەوەی نەخۆشیی شێرپەنجەی مەمك و چارەسەری و دواچارەسەریشم كرد، هەتا لە مەمكی دەستكرد (سلیكۆن و مەمكدان/ستیان) دوام بۆ بینەرانی تی ڤی و كاڵاكانی پێویستم پێ نیشان دان، دواتریش بە بەشداری و ئەندامبوونم لە چەند ڕێكخراوی تایبەت بە شێرپەنجە لەگەڵ هۆڵەندییەكان توانیم زانیاریی زیاتر كۆبكەمەوە و هەمان زانیاری بۆ هاوچارەنووسانی كوردستانم بەكار بهێنم و باشتر ڕێنماییان بكەم، یەكەم هەنگاویش بۆ بەرەنگاربوونەوەی شێرپەنجە ‹›لابردنی پەردە لە سەر نەخۆشیی شێرپەنجە و ناوهێنانی مەمك بوو. یەكەمجار بوو كە تابۆی لەسەر لابردرێت و لە زمانی ژنێكی كوردەوە بە ڕاشكاوانە باسی شێرپەنجەی خۆی بكات. بەو شێوەیە ڕێگەم بۆ هاوچارەنووسانم خۆش كرد كە بێن و پرسیار گومانەكانیان لەگەڵ من باس بكەن. ئەزموون ئاڵوگۆڕ بكەین و كەڵك لێك وەرگرین».

گوڵاڵە پشدەری لە تەوەرێكی دیكەی ئاخافتنەكەیدا باسی ئەوەی كرد كە سەنتەری پەنا-ی لە پایەتەختی كوردستان وەك ناوەندێكی ڕاوێژكاری و بۆ پشتیوانیكردنی باری دەروونیی ئافرەتانی تووشبووی شێرپەنجە دامەزراندووە و هەر لەو بارەیەوە گوتی: «جگە لە ڕاوێژكاری، پێدانی مەمكی دەستكرد و پێداویستییەكانی دیكەی وەك نامیلكە و پەرتووكەكانی كەم قەبارە لە بارەی شێرپەنجە و وەرگرتنی كیمیایی لە كارەكانی ئێمەیە و لە پەنای كاروچالاكییەكانی جۆراوجۆریشم دە نامیلكە یان پەرتووكی كەم قەبارەم لەسەر شێرپەنجە ئامادە كردوون و بە سپۆنسەری وەزارەتی تەندروستی و فەرمانگەی ڕێكخراوە ناحكوومییەكانی كوردستان بە چاپم گەیاندوون و لە كۆڕ و سیمینارەكاندا و هەروەها لە ناو نەخۆشخانەكانی نانەكەلی لە هەولێر، هیوا لە سلێمانی و ئازادی لە دهۆك بڵاوم كردوونەتەوە. نامیلكەكان بۆ نموونە لەسەر شێرپەنجە و زوو دۆزینەوە و خۆپاراستن و نیشانەكانی شێرپەنجەیە، هەروەها لە سەر شێرپەنجەی مەمك و شێرپەنجەی سییەكان، شێرپەنجەی ڕیخۆڵەكان و پڕۆستات و چارەسەری كیمیایی، چارەسەری تیشك و هیوا كیمۆ و...هتد لە هۆڵەنداش پەڕتووكی ٢١ تیشك (ئاماژە بە تیشكەكانی ئاڵای نەتەوەكەم) و ئاوتۆبایۆگرافی خۆم وەك ژنە كوردێك لە ٢١ چەپتەردا بە چاپ گەیاندووە، كە باسی لایەنەكانی سیاسی، كەلتووری، كۆمەڵایەتی و شەڕ و پەنابەری و لە كۆتاییشدا باسی شێرپەنجەی مەمك و ئەزموونی تووشبوونم كردووە، بە فرۆشتنی ئەو پەڕتووكەم توانیومە چەند ساڵی یەكەم مەمكی دەستكرد كۆ بكەمەوە و بە ژنانی هاوچارەنووسم لە كوردستان بە بێ بەرامبەر پێشكەشیان بكەم».

گوڵاڵە پشدەری ئەوەشی خستە ڕوو كە ئەندامی «گەورە ڕێكخراوی شێرپەنجەی مەمك لە هۆڵەندا» یە و هەروەها «ڕێكخراوی مامارۆزا» كە تایبەتە بۆ شێرپەنجەی مەمك لە كۆچبەراندا، توانیویەتی بە بەستنی كۆڕ و سیمینار زانیاری بە ئەو ئافرەتانە ببەخشێت كە «بەشدار و خوازیاری زانیاری بوون بە زمانێكی سادە، ئینجا كوردی بووبێت، یان بە زمانی سادەی هۆڵەندی، یانیش بە وەرگێڕ بۆ عەرەبی و توركی بووە.» گوتیشی: «لە ناو ڕێكخراویش بەردەوام هەوڵ دەدەم كەسانی چالاك بێنمە ناو ڕێكخراو و لەگەڵ هاوكارانم ڕاهێنان بەو كەسانەی خۆبەخش دەكەین كە خۆیان بۆ بەخشینی ڕێنمایی لەسەر شێرپەنجەی مەمك ئامادە دەكەن، هەفتانەش گردبوونەوەم لە ئامستردام بە كۆمەڵێك نەخۆشی هاوچارەنووس و تووشبوو بە شێرپەنجەی مەمك دەكرد و هەرجارە باسی بابەتێك دەكرا، كە یەكێك بوو لە دواكێشەكانی دوای تووشبوون بە شێرپەنجەی مەمك، بۆ نموونە شێرپەنجەی مەمك و دواكێشەكانی چارەسەری كیمیایی، هۆرمۆنەكان، بیمە و دڵنیایی تەندروستی، بارودۆخی ناو خێزان و منداڵ و كێشەی سێكسی، یان باری نائاسایی نێوان ژن و پیاو دوای نەخۆشی و جیابوونەوەی هاوسەرانیش یەكێك لە تەوەرەكانی بووە».

گوڵاڵە پشدەری سەبارت بە چالاكی و هاوكارییەكانی زیاتر دەڵێت: «هاوكاریی من بۆ هەمووان بێ سنوورە و بێ جیاوازی ڕەگەزی و نەتەوەیی وەك مرۆڤێكی خوا هەمووان بە یەك چاو دەبینم كاتێك كە نەخۆشن، بەڵام بۆ ژنانی كورد و پەنابەر بڕێك زیاتر خۆ ماندوو دەكەم، چۆنكە دەزانم ئەوان زیاتر لە گەلانی دیكە لە خۆشییەكانی ژیان بێبەش بوون.» باسی ئەوەشی كرد كە « مامەڵەكردن لە گەڵ نەخۆشیی شێرپەنجە ئاسان نییە، چونكە ئەم نەخۆشییە نە تەنیا گۆڕانكاری جەستەیی بەڵكو دەروونی و كۆمەڵایەتیشی پێوەیە. بۆ نموونە ئەم هەستەی ترس و دڵەڕاوكێیەی كە تووشبوو بە شێرپەنجە هەیەتی كاریگەری دەخاتە سەر باری كۆمەڵایەتیشی.ئەم سێ گۆشەیە كە دەكەوێتە ژێر كاریگەریی شێرپەنجە لە زۆربەی حاڵەتدا هاوسەنگی لە دەست دەدات و كەسی تووشبوو دەكەوێتە ناو بارودۆخێكی دژوار.» گوتیشی: «خۆشبەختانە٢٠%ی تووشبووان بە ڕێگەی چارەسەری پێویست و ڕێكوپێك شانسی مانەوەیان لە ژیاندا زیاترە و تا ئێستا هۆی تووشبوونی ئەم جۆرە شێرپەنجەیە بەڕاستی دیاری نەكراوە یان نەدۆزراوەتەوە».

سەبارەت بە چارەسەری شێرپەنجەی مەمكیش باسی ئەوەی كرد كە «Operation چارەسەری بە ڕێگەی نەشتەرگەرییە، واتە بڕینەوەی تەواوی مە  Amputationیان بڕینەوەی تەنیا گڕێیەكە و چوار سەنتیمەتەر بە دەوری بازنەیی گرێیەكەدا .Lumpectomy لە كاتێكدا كە لیمفەكانی بن باڵیش تووشی شێرپەنجە بووبن، ئەوانیش، لە كاتی نەشتەرگەریدا هەڵدەگیردرێن، ئەوەش كاریگەری هەیە بۆ هاتوچۆی ماددەی شلەمەنی و خوێن لە قۆڵدا، كە لەوانەیە ببێتە هۆی ئاوسانی باسك. هەروەها زۆر جار دوای بڕینەوەی مەمك دووبارە مەمكی نوێ بە ڕێگەی نەشتەرگەریی جوانكاری دروست دەكرێتەوە كە بۆ ئەو مەبەستە بە دوو ڕێگە یەك لە چەوریی زگ یان لە پشت سوود وەردەگیردرێت Breastreconstruction واتە.

 - چارەسەری بە ڕێگەی تیشكی ڕادیۆئەكتیف Radiotherapy، یەكێك لە دواكێشەكەی ماندووبوونە و سووتانی ئەو شوێنەیە كە تیشكی لێ دەدرێت، یان ڕادیۆتڕاپی دەكرێت.

-چارەسەری بە ڕێگەی كیمیایی -Chemotherapy لە زۆر بواردا شەش جار پێویستە و ئەویش كێشە و گرفتی خۆی هەیە».