جێگەی دەستخۆشییە لەم ساڵانەی دواییدا خانمانی كوردستان لە رێگەی سۆشیال میدیاوە تێكەڵی دنیای كار و قازانجكردن بوون، هەر لە رێگەی سۆشیال میدیاوە بەهرە و تواناكانیان لە بواری دەستڕەنگینی و كابانی پەخش و بڵاو دەكەنەوە، چنوور مەحمود خانمێكی بە ئەزموونی بواری چێشتلێنانە و وەك خۆی باسیدەكات ئەو فەرمانبەرە و تەنیا وەكو فێركاری ڤیدیۆی كارەكانی پۆست دەكات، لە دیمانەیەكیدا لەگەڵ گۆڤاری گوڵان باس لە ئەزموون و پڕۆژەی داهاتووی دەكات.

 

گوڵان: كۆمەڵایەتی

 

 

چنوور مەحمود لە قەزای دەربەندیخان لە دایكبووە، ئەو دەرچووی زانكۆی گەشەپێدانی مرۆیی/ بەشی یاساو رامیارییە و فەرمانبەرە لە فەرمانگەی كارەبای دەربەندیخان، لە بارەی كارەكەی هێمای بۆ ئەوە كرد:«لە ساڵی 2010 ەوە ئەو كارە دەكەم تا ئێستا هیچ خواردنێكم نەفرۆشتووە، تەنیا ڤیدیۆی فێركارییەكانم بڵاودەكەمەوە، خۆم هیوایەتم خواردن دروست كردن بوو، كە فەیسبووكم دانا وتم با پەیجێك دابنێم خەڵك لێوەی سوودمەند بێت، ئەوە بوو پەیجێكم دانا بە ناوی خواردن و شیرینی چنوور، بێئەوەی كەس هاوكاریم بكات، هەرخۆم وێنەكان دەگرم، چونكە چێشتلێنان خولیا و حەزی خۆمە، هاوكات دایكیشم خواردنی بەناوبانگە لە ئەو فێری چێشتلێنان بووم، دایكم لەتەمەنی ٣٦ساڵی بێوەژن كەوتووە و باوكم لە شۆڕشی مەزنی ئەیلوول شەهید بوو، دوای نەمانی باوكم، دایكم هەم ژن بوو هەم پیاو نەیهێشت هیچ منداڵێكی پەروەردەی سەقەت وەربگرێ وهەموومانی پێ گەیاند، كە باوكم شەهید بوو تەمەنم سێ ساڵ بوو».

 هاوكات گوتی: «خیزانەكەم پێیان خۆشە كە ئەو كارە دەكەم، ئەگەر دەوامم نەبووایە ئەمتوانی دوكانی شیرینی یان چێشتخانەیەك یان دوكانی ترشیات دابنێم، دوور نییە هەر ڕۆژێك بێت پڕۆژەی لەم جۆرەم هەبێت، شانبەشانی ئەم كارەم كاری چنینیش دەكەم».

لە وەڵامی ئەو پرسیارەی كە ئایا هاوسەرت تا چەند پشتگیریت دەكات بۆ ئەوەی چێشتخانەیەكت هەبیت؟ ئەو گوتی: «بەڵێ زۆر پشتگیریم ئەكات، تەنانەت هەموو نان خواردنێك دەست خۆشیم لێ دەكات، هاوسەرەكەم وای لێهاتووە خواردنی كەم كەس دەخوات ئەڵێ بەس خواردنی تۆ.

سەبارەت بە ئامانجی لە كارەكەشی ئەو گوتی: «ئامانجم سوودگەیاندنە بەخەڵك، بەدڵنیاییەوە خەڵكیش سوودیان لێ بینیوە و زیاتر پێكهاتەی خواردنەكانم دەنووسمەوە».

چنوور مەحمود لە وەڵامی ئەو پرسیارەی كە ئایا كاركردن بۆ ئافرەت تا چ ئاستیك پێویستە؟ ئاماژەی بەوە كرد: «زۆر زۆر پێویستە ئافرەت پشت بەخۆی ببەستێت و چاوی لە دەستی كەس نەبێ، زۆرخۆشە خاوەنی دارایی خۆت بێت ولەسەر پێی خۆت ڕابوەستیت، چونكە ئیش كردن شەڕەفێكی گەورەیە، لە رێگەی ئیشكردنەوە ئەبیت بەخاوەنی دارایی خۆت چەند كەسێك لە دەستی تۆوە سوودمەند ئەبن، هەم كاتت بەفیڕۆ ناڕوا هەم خێرێكی گەورەیە و سوودگەیاندنە بە كۆمەڵگە، كاتەكانت بەشتی پڕوپووچ بەسەر نابەی و لەڕێكەی تۆوە دوورنییە چەند كەسێك ببن بەخاوەن كاری خۆیان، بۆیە من حەز ئەكەم لە هەر بوارێكدا بێت ئافرەت پشت بەخۆی ببەستێ، بەڵام بەمەرجێك ئافرەتەكە لەگەڵ ماڵەوەیان كیسە جیایی نەكات و پارە بۆ خۆی خەزن بكات، بەڵكو بە هاوبەشی خەرجی ڕۆژانەیان بكەن و پۆز بەسەر هاوسەرەكەیدا لێ نەدات و بڵێ ئیتر خاوەن پارەی خۆمم، چونكە پارە بۆ خۆش بەختییە».

چنوور مەحمود لە درێژەی قسەكانیدا گوتی: «پێویستە خانمان خۆیان نەكەن بەقوربانی قسەوقسەڵۆكی خەڵكی، چونكە هەركەسێك ئارەزووی ئیشكردنی هەبێ ئیش زۆرە و چەندین ئافرەت هەن كە ژنی ماڵەوەن هیچ دەوامێكیان نییە كەچی هەریەكە و لەبوارێك كاردەكەن و جێگای شانازین، ئەوانە بوون بەخاوەن كاری خۆیان و خەڵك بەوپەڕی ڕێزەوە لێیان ئەڕوانێ، من لێرەوە دەست خۆشیان لێدەكەم، چونكە ئەگەر بۆ خەڵك بژیت ئەبێت ژیان بوەستێت، جا بۆیە پێویستە كاری خۆیان بكەن بەسەربەرزانە چاوەڕێی دەستی كەس نەبن.