پرسی كاركردنی ئافرەتان یەكێكە لە پرسە بابەتی و هەنووكەییەكانی سەردەمی ئەمڕۆ، ئافرەتی كورد قۆناغ بە قۆناغ بە درێژایی مێژوو وێڕای ئەركی دایكایەتی، چەندین كار و فرمانی دیكەی بە جورئەتەوە ئەنجام داوە، كاركردنی ئافرەتانی هەورامان لە خواردنگە و شوێنە گەشتیارییەكاندا بووەتە جێگای سەرنجی گەشتیاران، ڕووناك فەرج ناسراو بە ڕووناك هەورامی، ساڵانێكە خواردنگەیەكی گەشتیاری لە گوندی خەرپانی هەورامان داناوە و، توانیویەتی ژنبوونی خۆی لە مەیدانی كار بسەلمێنێت و لە كارەكەیدا سەركەوتوو بێت، لەم دیمانەیەشی لەگەڵ گۆڤاری گوڵان باس لە وردەكارییەكانی كارەكەی دەكات.

گوڵان: كۆمەڵایەتی

 

ڕووناك فەرج ناسراو بە ڕووناك هەورامی خەڵكی شارۆچكەی بیارەیە لە هەورامانی باشووری كوردستان و وەك خۆی باسی دەكات، خوێندنی سەرەتایی لە بیارە خوێندووە و، لە پۆلی نۆی بنەڕەتی «بە هۆی كوردایەتی» وازی لە خوێندن هێناوە، هەر لەو بارەیەوە دەڵێت: «تا كورد پێویستی پێم بووبێت، خەباتم كردووە.»

 ڕووناك هەورامی ساڵی 1984 ژیانی هاوسەری پێك هێناوە، دایكی دوو منداڵە(كچێك و كوڕێك)، سالانێك لە تاراوگە بووە، بەڵام خۆشەویستیی وڵاتەكەی بۆ زێدی خۆی پەلكێشی دەكاتەوە. ئەو خاتوونە بەم جۆرە باسی چۆنیەتی تێكەڵبوونی بە بازاڕی كار دەكات و دەڵێت: «ساڵی ‌2010 لە وڵاتی سوید گەڕاینەوە بۆ كوردستان و لە گوندی خەرپانی نیشتەجێ بووین. دوو پڕۆژەی باشمان دەست پێ كرد، ئەویش پڕۆژی مانگای شیر و پڕۆژی پەلەوەری خۆماڵی بوو. دواتر لە 2012 وەك یەكەم ژنی ڕچەشكێنی كورد و هەورامان دەستم بە كاری چێشتخانە كرد و سەرەتا كەبابخانەیەكی بچكۆلەم دانا، تەنیا یەك ڕۆژ مشتەریم نەبوو، دوای چەند ڕۆژێك مشتەریم زۆر بوون. وای لێ هات لە شارەكانەوە بۆ خواردن سەردانی دووكانەكەمیان دەكرد. میدیاكان پێیان زانی و كەناڵەكان سەردانیان دەكردم. ڕۆژ بە ڕۆژ خەڵك زۆرتر دەهات بۆ سەردانم. دوای ساڵێك كردمە ڕێستۆرانت و لە پایشیا شیر و ماست و هێلكەكانی مریشكەكانیشم دەفرۆشت. تادەهات مشتەریم زۆرتر دەبوو. كەباب و دۆكەم ناویان دەركرد، دواتریش چێشتەكانم دەستخۆشی زۆری بۆ دەهاتەوە. چەندین جار خەڵات كراوم و لە كۆی دووسەد ژنی خاوەن كاری سەربەخۆ پڕۆژەكەی من بووە شەشەمی عێراق و یەكەمی كوردستان، لە پەرلەمانی عێراقیش خەڵات كرام. هەلی كاریشم بۆ چەندین كوڕ و كچی ناوچەكە ڕەخساندووە. دوای من چەندین ژنی دی هاتنە ناو كارەوە و شوێنەكە بووە شوێنێكی گەشتیاری، ئێست زۆرترین گەشتیاری هەیە. خەڵك لە وڵاتەكانەوە و لە شارە كوردییەكان و عەرەبییەكانیشەوە سەردانم دەكەن.

زۆر لە كەسایەتییە گەورەكان و وەفدی زۆر لە وڵاتەكان سەردانیان كردووم. تا ئێستاش بەردەوامم و بەشی دوویشم لە شارۆچكەی بیارە كردەوە، بەتەمام بەشێ تریش بكەمەوە».

 ڕووناك هەورامی سەبارەت بە بیرۆكەی كارەكەی و پاڵپشت و هاندەرانی دەڵێت: «خۆشەویستیم بۆ ژنایەتی خۆم و ژن بە گشتی و پاراستنی كەلتوورەكەمان و دەرخستنی تواناكانی ئافرەتی هەورامی تێكەڵ بە كاری بازاڕی كردم.» گوتیشی: «ژن لە ناوچە هەورامی نشینەكان ئازادە و ڕێزی زۆری لێ دەگرن. پاڵپشتیشم هاوسەری ڕۆح شادم و منداڵەكانم و برا و خوشكەكانم بوون.» لە وەڵامی ئەو پرسیارەشدا كە ئایا تا چەند گرنگ و پێویستە كە ئافرەت كار بكات و خاوەن داهاتی خۆی بێت؟ گوتی: «پێویستە ژن لە قاڵبی كۆیلایەتی دەرچێت، ئازاد بێت و نەترسێت و نەهێڵێت مافی پێشێل بكرێت. پێویستە لە ڕێگەێكی شەرەفمەندانەوە بێتە دەرەوە لەماڵ و كار بكات بۆ جوانكردنی كۆمەڵگە و خێزانەكەی، نەك بۆ بێڕێزیكردن بە جەستە و ڕۆح و كەسایەتیی خۆی. دەبێت كچ و ژنە خێر لە خۆ نەدیوەكانی كورد كەرامەتیان بپارێزی و نەبیتە چاڵ هەڵكەنی پیاوان، لەگەڵ ئەوەشدا بیرۆكەی من خۆشەویستیمە بۆ ژنایەتی خۆم و ژن بە گشتی و كەمكردنەوەی قورساییەكانی سەرشانی پیاو، واتە ژن و پیاو پێویستە پاڵپشتی یەك بن، پێكەوە قورساییەكانی سەرشانی ژیان بەش بكەن و نەبنە ئازار بۆ یەكتری.» وەك دواقسەشی گوتی: «پێویستە ژن خاوەنی گیرفانی خۆی بێت و چاوەڕێی دەستی كەس نەبێت. ئەگەر ژن بە ئارەقەی ناوچاوانی و بە كار و ماندووبوونی شەرافەتمەندانە گیرفانی پڕ بوو، زۆر دڵخۆش دەبێت و، باشتر بیر دەكاتەوە و باشتر پارێزگاری لە خێزانەكەی دەكات. ئەگەر ژن داهاتێكی سەربەخۆی هەبێت، لە زۆر كێشە پارێزراو دەبێت و خێزانەكەشێ دەپاریزێت.

رێز و خۆشەویستیم بۆ هەموو ژنان هەیە، من هەمیشە پاڵپشتیانم لە هەر كوێ بن، داواشیان لێ دەكەم، بۆ تێكەڵبوون بە بازاڕی كار نەترسن و پێویستە بۆ سەركەوتنی خێزانەكانیان پاڵپشتی مێردەكانیان بن.