لە پەراوێزی دروشمی قوتابیان و لاوانی كورددا: # وەكـو_گـەنـجـێك_مـن_كـۆچ_نـاكـەم_با_بـە_یـەكـەوە_وڵات_ئـاوەدان_ بكەینەوە

لە پەراوێزی دروشمی قوتابیان و لاوانی كورددا:  # وەكـو_گـەنـجـێك_مـن_كـۆچ_نـاكـەم_با_بـە_یـەكـەوە_وڵات_ئـاوەدان_ بكەینەوە

 

 

لاوان و قوتابیان وەك هەمیشە و بە گوڕوتینێكی زۆرترەوە، داینەمۆی بیری نەتەوەیی و تۆختركردنەوەی بەرپرسیارێتی زیاترن لە كۆمەڵگەدا، بۆیە بارزانی باوك، وەسفێكی جوانی بۆ ئەو توێژە كردووە و فەرموویەتی: «قوتابیان سەری ڕمن لە هەموو شۆڕش و ڕاپەڕینێكدا»، ئەم وەسفەیش گوزارشتە لەو ڕاستییەی كە گەنج و لاوی كورد هەمیشە دەست و پەنجە لەگەڵ زانست و فێربووندا نەرم دەكەن، باشتر واقیع دەخوێننەوە و زووتر درك بە پێویستیی شۆڕش و گۆڕانكاری و داهێنان و نوێبوونەوە دەكەن، بۆیە هەمیشە ڕیزی پێشەوەی قوربانیدان و گۆڕانكارییان گرتووە، ئەمڕۆش بە دروشمی:

(( #وەكـو_گـەنـجـێك_مـن_كـۆچ_نـاكـەم_با_بـە_یـەكـەوە_وڵات_ئـاوەدان_ بكەینەوە))، دەخوازن پەیامێكی دیكە بە كۆمەڵگە بدەن. ئەگەرچی كۆچی لاوان و جێهێشتنی وڵات نە شتێكی نوێیە و نە تەنیا تایبەت بە كوردستانە، مێژووی كۆچكردن لە سەرەتای چاخی بەردینەوە دەستی پێ كردووە، ئەو كاتەی كە مرۆڤ لە پێناو خۆحەشاردان لە سەرما و گەرما و بۆ دۆزینەوەی خواردن و شوێنێكی شیاو بۆ ژیانێكی باشتر لە ناوچەیێكەوە بۆ ناوچەیێكیتر ڕۆیشتووە، واتە كۆچ لە پێناو ژیان و بە مەبەستی بەدەستهێنانی شوێنێكی شیاو بە درێژایی مێژووی مرۆڤایەتی بوونی هەبووە، بەڵام لاوان و قوتابیانی كوردستان خوازیاری كۆچی پێچەوانەن و نەك وڵات بە جێ ناهێڵن، داواكارن كوردانی تاراوگەش بۆ زێدی خۆیان بگەڕێنەوە.

گوڵان: كۆمەڵایەتی

 

نێچیرڤان كەلاری (سكرتێری یەكێتی قوتابیانی كوردستان)، سەرەتا باسی ئەوە دەكات كە: «لاوان چینێكی گرنگن لە پێكهێنەرەكانی هەر كۆمەڵگەیەك و ڕۆڵی گرنگ دەگێڕن لە پەرەپێدانی سەرجەم بوارەكان و كارەكتەری سەرەكین لە گۆڕانكارییە كۆمەڵایەتییەكان و گەشەی ئابووری و بەرەوپێشچوون لە بوارە جیاوازەكاندا. بۆیە زۆر گرنگە كار لەسەر لە توانا و كارامەییەكانی لاوان بكرێت وەكو سەرچاوەیەكی مرۆیی بەهادار و پاڵپشتی لە بیرۆكە و دیدگاكانیان بكرێت، بۆ ئەوەی بتوانن لە ڕێگای خۆپێگەیاندنەوە، خزمەتی كۆمەڵگەكەیان بكەن.» هاوكات دەڵێت: «لە سۆنگەی دەرككردن بە كاریگەریی ڕۆڵی لاو لە بنیاتنانی كۆمەڵگەدا، پێویستە كار لەسەر دروستكردنی هەستی خۆبەخاوەنزانینی وڵات لە هزری لاواندا بكرێت، لە پێناو هەستكردنی زیاتر بە بەرپرسیاریەتییەكانیان بەرامبەر پرسە جیاوازەكان لە كۆمەڵگەدا، ئەمەش زیاتر لە ڕێگای فراوانكردنی بەشداریی لاوان لە پرۆسەی سیاسی و دروستكردنی بڕیار و ڕاهێنان و ئامادەكردنیان بۆ داهاتوو دەكرێت. لاوان هێزی بزوێنەری وڵاتن، بەهێزی و لێهاتوویی لاوان دەبێتە هۆی بەهێزیی كۆمەڵگە و پتەویی دامەزراوەكان، بۆیە بەرزیی ڕێژەی لاوان لە هەر وڵاتێكدا هێزی زیاتر لە سەرجەم بوارەكان بەو وڵاتە دەبەخشێت. لە ئێستادا هەرێمی كوردستان زیاتر لە هەر كاتێك پێویستی بە وزە و توانای لاوەكان هەیە، چونكە پلانی تۆكمە و پاڵپشت بە ئیرادەی بەهێز بۆ چاكسازی لە سەرجەم سێكتەرەكان لە ئارادایە و لەو ڕووەوە هەنگاوی جددی نراوە، بە تایبەت لە دەستپێكی كابینەی نۆیەمی حكومەتی هەرێمی كوردستانەوە. لاوان پێویستە كار لەسەر بەهێزكردنی تواناكانی خۆیان بكەن و پاڵپشتیی هەنگاوەكانی چاكسازی حكومەتی هەرێم بكەن، تاوەكو بتوانن ڕۆڵی خۆیان لە بنیاتنانی هەرێمەكەمان ببینن، هەروەها ژیانێكی ئاسوودە بۆ خۆیان دابین بكەن و داهاتوویەكی باشتر بۆ نەوەكانمان مسۆگەر بكەن».

ڤینوار فوئاد سدیق قوتابی زانكۆیە و ڕای وایە: «هەموو وڵاتانی دونیا بە قۆناخی پڕ لە نەهامەتی و قەیرانی قووڵدا تێپەڕیون. تەنانەت ئەو ئەوروپایەی كە ئێستا سەرچاوەی پێشكەوتنی مرۆڤایەتییە، لە سەدەكانی ڕابردوودا بە چەندین قەیرانی زۆر گەورەدا ڕەت بوون، تا كار گەیشتە ئەوەی شۆڕشی مەزنی فەڕەنسا سەری هەڵدا و، ئیتر وردە وردە كۆتایی بە قۆناخی ئاغاو بەگ و ئیمپراتۆرەكان هێنرا و، وردە وردە مافی مرۆڤ بووە جێی سەرنج و تێبینی وڵاتان. هەرێمی كوردستانیش كە خەریكی بە خاوەن دەوڵەت بوونیەتی، بێگومان بە هۆی هەڵكەوتە جوگرافیاكەی، بەردەوام كۆسپی زۆر و قووڵی بۆ دروست دەكرێت. هەر دوور نەڕۆین، لە ماوەی چەند ڕۆژی ڕابردوودا چۆن سەرۆكی ئەنجومەنی وەزیرانی عێراق لە ماڵەكەی خۆیدا درایە بەر هێرش، كە هێندەی نەمابوو لە پێناوی جێگیركردنی یاسا بكوژرێت. ئەمە بۆ عێراق وابێت، بێگومان ناحەز و دوژمنان تا بۆیان بكرێت، لێ ناگەڕێن هەرێمی كوردستان بگاتە لووتكە، بۆیە بەردەوام خەریكی دروستكردنی قەیرانی جۆراوجۆرن.» هاوكات پرسیار دەكات: «ئەگەر ئێمەی گەنج و لاو پشت لە نیشتمان بكەین، ئەی كێ داكۆكی لە گەل و خاكەكەی بكات؟»، وەڵامی پرسیارەكەشی بەمجۆرە دەداتەوە: «گەنج هەمیشە هێزی لەبن نەهاتووی نەتەوەكان و نیشتمانەكەیەتی و، هەمیشە سووتەمەنیی هەموو ڕاپەڕین و شۆڕشەكانیش بووە. بۆیە بۆ ئێمەی گەنج ئەركێكی نیشتمانی و نەتەوەیی و ئەخلاقییشە، تا لە تواناماندا بێت، داكۆكی لەو نیشتمانە بكەین كە هەمیشە باوك و باپیرانمان، براو كەس و كارمان لە سەر ڕزگاركردنی شەهید كراون، بۆ ئەوەی نەكەوێتە ژێر چەپۆكی داگیركەران، كە هەمیشە چاوی برسییان تێبڕیوە.» گوتیشی: «گەنج توانای گۆڕینی هاوكێشە قورسەكانی هەیە، بۆیە پێویستە گەنجان زیاتر هوشیار بكرێنەوە، كە دواڕۆژی ئەوان لەگەڵ ئایندەی نیشتمانەكەیانە و نابێت پشت لە نیشتمانی خۆیان بكەن، هەموو ئەو گەلانەی بێ دەوڵەتن، لە نەتەوەیەكی بێ دەسەڵات و پەرتەوازە دەچن، كە لەسەر شانۆی سیاسیدا هیچ ڕۆڵێكی كارایان نییە. بۆیە نابێت ئەو نیشتمانە جوانەی كە پڕ لە خێرو بێرە كاولی بكەین و دوژمنانیشمان بە خۆمان خۆش بكەین».

ڕەوەند كەریم كاكەیی قوتابیی زانكۆیە و ئەویش یەكێكە لەو هەزاران لاوەی كە دژی كۆچی گەنجانن و هەر لەو بارەیەوە دەڵێت: «مرۆڤ لە هەر شوێنێكی دونیا بێت، مەحاڵە وەكو نیشتمانی خۆی بێت. لە نیشتمانی خۆتدا خاوەنی كەسایەتیی خۆتی و خەڵكی بیانی وەك میوان و گەشتیار تەماشا دەكەیت. كوردستان بۆ كورد نیشتمانێكی خۆشەویستە و ناكرێت لەبەر هەندێك كێشەی بچووك پشتی لێ بكەین. ئێمە وەكو گەنجان پێویستە كار بۆ چارەسەركردنی ئەو كێشانە بكەین نەك بۆ دوژمنانی چۆڵ بكەین و وزەی كوردستان لاواز بكەین. وڵاتانی هەندەران ئەگەر گەورە و سەرمایەداری و زلهێزیش بن، هەر بە چاوی پەنابەر و ئاوارەوە لێمان دەڕوانن. ناچار دەبی ملكەچی هەموو سووكایەتییەك بیت كە پێت دەكرێت. ئێمەی گەنجان وزەی وڵاتین و بەجێهێشتنی كوردستان وێڕای ئەوەی خیانەتێكی گەورەیە لە نیشتمان، هاوكات كەمكردنەوەی وزەی بونیادنەری كوردستانیشە».

 

Top