كیفایەت عەلی عەباس، خانمێكی دەستڕەنگینی شاری هەولێرە، ئەو لە ساڵی 1976 لە هەولێر لە دایكبووە و بە هۆی دۆخی كۆمەڵایەتی و باری قورسی ژیان لە قۆناغی ئامادەیی پیشەسازی دەستبەرداری خوێندن بووە، وەك خۆی باسی دەكات زیاتر لە شەش ساڵە لە ماڵەوە كاری هەویركاری و شیرینی و چێشلێنان دەكات، لە دیدارێكیدا لەگەڵ گۆڤاری گوڵان بەم جۆرە باسی ئەزموونی كاركردنی بۆ خوێنەران دەكات.

 

كیفایەت عەلی عەباس كە بە «شێف كیفایەت» ناسراوە، بەمجۆرە باس لە وێستگەكانی تەمەنی و سەرەتای كاركردنی دەكات: «لە تەمەنی دوو ساڵی باوكم كۆچی دوایی كردووە، دوو جار لە سەردەستی رژێمی بەعس دەستبەسەر كراوم، جارێك گیراوم لەبەر ئەوەی باوكم كە پێشمەرگە بوو، لە ساڵی 1976 تا 1978، جارێكیتر لە ساڵی 1988 لە سەر برام گیراوم كە پێشمەرگە بووە. هەر بە زگماكی یەك گورچیلەم هەبووە، هەر لە منداڵیشەوە حەزم بە چێشتخانە و چێشتلێنان بووە، تا پۆلی پێنجی بازرگانیم خوێندووە، بە هۆی ماڵ و منداڵ و ئەركی زۆر لە خوێندن دابڕاوم. چوار منداڵم هەیە، دوو كچ و دوو كوڕ، لە ساڵی 2015 دەستم بە كاری شێفی كردووە».

لە وەڵامی ئەو پرسیارەدا كە هاوكار و هاندەر و پاڵیشتت كێ بووە؟ دەڵێت: «هاوسەرەكەم زۆر هاوكار و هاندەرمە و هەر لە ماڵەوە خواردن ئامادە دەكەم بۆ خەڵك و تا ئێستاش بەردەوامم و ڕۆژ بە ڕۆژ كڕیارەكانم زیاتر دەبن، چونكە خواردنەكانی من فرێشن و لەسەر داواكاری كڕیارەكانم ئامادەی دەكەم، هەموو كەرستەكانمان خۆماڵی و تازەیە، هیچ جۆرە كەرستەیەكی ئامادەكراو و لە قوتووكراو بەكار ناهێنم، پێشتریش لە كاری شێفی ئەزموونم هەبووە، چونكە لە چێشتحانە كارم كردووە، هەروەها چەندین بەرنامەم سەبارەت بە چێشلێنان ئامادە كردووە .»

لە وەڵامی ئەو پرسیارەی كە ئایا وەكو دایكێك چۆن توانیویەتی هاوسەنگیی لە كارەكانیدا بكات، گوتی: «شوكر بۆ خوای گەورە بەهۆی ئەوەی منداڵەكانم گەورە بوون، ئەركیان كەمە، منیش بەرنامەڕێژیم كردووە بۆ كات و ژیانم، تا بتوانم مافی هەمووان بدەم و ڕازییان بكەم، لەبەر ئەوەی هاوسەریشم هاوكارمە بۆیە تا ڕاددەیەكی باش ئەركم سووك بووە».

سەبارەت بە پڕۆژەی داهاتووشی لە كارەكەی دەڵێت: «بێگومان لە بەرنامەمدا هەیە، چێشخانەی خۆمم هەبێ، تا هەلی كار بۆ چەند كەسێك بەتایبەتی ئافرەتان بڕەخسێنم». گوتیشی: «سەرەتا حەز و خولیای خۆم بووە كاری چێشت و چێشتخانە، دواتریش هەوڵمدا لە ڕووی داراییەوە پشت بە خۆم ببەستم و ببمە هۆكارێك بۆ درێژكردنی دەستی هاوكاری بۆ ئەوانەی پێویستیانە.»

كە پەیامنێری گوڵان داوای پەیامی لێ كرد بۆ ئافرەتان، لە وەڵامدا گوتی: «لە ڕێی گۆڤارەكەتانەوە بەو خانمانە كە حەزی كاركردنیان هەیە و بوێری ئەوە ناكەن، پێیان دەڵێم: هیچ شتێك لەوە خۆشتر نییە خۆت سەرچاوەی بژێوی خۆت پەیدا بكەیت، تەنیا ئەوەندەتان پێویستە ویستی بڕیاردانتان هەبێت و نییەت بێنن، باوەڕبكەن خودا هاوكار و پشتیوانتان دەبێت.» گوتیشی: «من بە هۆی ئەو پیشەیەم هەلی كارم ڕەخساندووە بۆ چەند كەسێك، وەكو ئەوانەی دێن هاوكاریم دەكەن لە ئامادەكردنی خواردنەكان، هەروەها ئەو شوفێر تەكسییانەی كاری گەیاندنم بۆ دەكەن، بێگومان «الاقربون اولی بالمعروف»، ڕۆژانە ئەو خواردنەی دروستی دەكەم بۆ خەڵك، بەشی خۆشمان لە هەمان خواردن دروست دەكەم بە كەرەستەی خۆمان.»

كیفایەت عەلی وەك دواوتەی گوتی: «بە خوێنەران و هەوادارانم دەڵێم: ئاگاداری دەرفەت و هەلەكانی ژیانتان بن، مەهێڵن لە دەستتان بچێ، چونكە ڕەنگە دووبارە نەبێتەوە، بۆیە توانا و بەهرەكانتان بخەنە گەڕ و ببنە مایەی خێر و خۆشی بۆ خۆتان و دەوروبەرتان».

 

 

 

كیفایەت عەلی: