گۆتنێت مەزنا نەخشێت بەرا نە ، سەرێ دوو بەرانا د مەنجلەکێ دا ناکەلیت ، ەڤەژی گۆتنەکا مەزنا نە ، پێتڤی یە بکەینە سەربۆر و مفال لێ وەربگرین .

ئەڤێ گۆتنێ زۆر ڕامان لێ دچن ژ وانا ماڵا ب دوو سەمیان، حزبا ب دوو سەرۆک ، وەڵاتێ ب دوو سەرکردەرێڤە ناچن ، چەند خۆ ڕابگرن ئێک ژوان دێ هەر سۆژیت ، هەر وەکی سەرێن د بەرانا د مەنجەلەکێ دا .
هەڤسەرۆکیا ئێکەتیێ ژی مینا ڤێ گۆتنا مەزنایە، پشتی مام جەلالێ رەحمەتی شیرازێ ڤێ پارتیێ ژلایێ ستراتیژی و رێکخستنێ و ئیدارێ نە تنێ وەکی بەرێ نەما بەلکی لسەر ئێک چوو و سەرکردێن وێ کەفتنە د هەڤڕکیێن دژوار دا ، نە تنێ سەرکردێن وی ئەو دەرد گەهشتە دناڤ ماڵباتا تالەبانیا دا .

سەرکردایەتیا ئێکەتیێ و ماڵباتا تالەباتی کۆ خۆ ب میراتگرێن ڤێ پارتیێ دانێن زوو هەست بڤێ چەندێ و کاریگەریا وێ یا نەرێنی کر لەوما سیستەمێ هەڤسەرۆکیێ وەکی مەتاڵ و شویرە ل هەمبەرێ ڤێ مەترسیا کۆژەک دانا ، لێ پەند لڤێ گۆتنا مەزنا وەرنەگرت کۆ سەرێ دوو بەرانا د مەنجەلەکێ دا ناکەلیت ،
بۆ پارتیەکا وەکی ئێکەتیا نشتیمانی یا فڕە هزر و دید بۆچوون مام جەلالێ ڕەحمەتی ب کۆتەکیا دشیا کۆنترۆل بکەت ، چەوا دوو هەڤسەرۆکی دێ شێن کۆنترۆل کەن ، نەخاسمە هەڤسەرۆکێ بێ ئەزمۆن و بازرگان و فێسبۆکچی ..!
ئەڤە نە سەرێن بەرانا نە ژی ، بەلکی سەرێن فیل و کەرکەدانا نە دێ چەوا د مەنجەلەکێ دا کەلن ..!

پێتڤی بوو پشتی وەفاتا مام جەلالێ رەحمەتی سەرکردایەتیا ئێکەتیێ زێدەتر د دووربین بانە و هەست ب مەترسیا هەڤسەرۆکیێ و هەڤڕکیێن دناڤبەرا وان کربا .

ئەگەر لسەر ڤەگوهاستنا هندەک پلەدارێن ئێمناهی و هەواڵگیری یێن سەر ب ئێکەتیێ ئاڵۆزی و ناکۆکیێن دناڤبەرا هەردوو هەڤسەرۆکا بگەهنە ڤی ئاستەکێ دژوارێ و کۆمکرنا هێزێن چەکداری خودێ دزانین چەندین ناکۆکیێن دی یێن نەپەن هەنە ..!
ئەگەر راست بیت ئەڤرۆ هەڤسەرۆک ب ژەهرکرنێ ئێک دوو تاوانبار بکەن چەوا دێ شێن سەرکردایەتیا وەڵاتی کەن یان چ پیلانان بۆ هەڤڕکێن خۆ دادرێژن ..! یان چەوا دێ شێن تەقەبۆلا رەئیا ئازاد و دیموکراسیێ کەن ..!

ئەڤێ روودانێ بۆ جادا کوردستانی و ناڤخۆیێ ئێکەتیێ و جەماوەرێ وێ زەڵال کر کۆ ئێکەتیا نشتیمانیا کوردستانێ وەکی حزب خودان سەرکردایەتیەکا بێ باوەرە دناڤ خۆدا و سیستەمێ هەڤسەرۆکیێ بۆمبەکا چاندی یا ئامەدەکریە بۆ پەقاندنێ ، هەردەمێ دپەقیت ژی پرۆشکێن وێ دێ کاریگەریێن نەرێنی لسەر هەرێما کوردستانێ کەن ژلایێ ئەمنی و سیاسی بتایبەت ل دەڤەرا سلێمانیێ و دەوروبەر کۆ ب دەڤەرا ( سەوز ) دهێتە نیاسین .
چونکی هێزێن چەکداری و ئێمناهیێ د دەستێ هەردوو لایان دانە و خودێ نەکەت ل هەر پێکدادانەکێ دەستێن دەرەکی دێ هێنە دناڤ دا یان دێ ئێگیننە دناڤدا و دوور نیە ببیتە شەرەکێ ناڤخۆیی کۆ ڤەمراندنا وێ یا ب ساناهی نابیت .

باشترین چارە ئەوە ئێکەتیا نشتیمانی سیستەمێ هەڤسەرۆکیێ ب هەڵوەشینیت و بکەتە سیستەمێ سەرۆکاتیێ یان مینا بەرێ سکرتێرێ گشتی هەبیت و ئێکەتی د دەستەکێ ئەمین دا بیت ژلایێ سیاسی و کارگێری و ئێمناهی کۆ جهێ باوەریا خەلکێ کوردستانێ و لایەنێن دیتر یێن سیاسی بیت و بەرژەوەندێن گشتی ل سەرڤەی هەمی بەرژەوەندا بزانن و رێزێ ل یاسا و بریارێن هەرێما کوردستانێ و حکومەتا هەرێمێ بگرن و دەستا ل بازرگانیا نەیا یاسا و قاچاغچیاتیێ بەردەن و پێکڤە کار بو کوردستانەکا بهێز و ئێکگرتی و سەروەریکرنا یاسایێ و ئەنجامدانا چاکسازیا بکەن .

رەنگە من وەکی تاک ئێکەتی وەکی حزب نەڤێت ، لێ ژبەر بەرژەوەندا گشتی و پرسا نەتەوی و نشتیمانی و پاشەرۆژا خەلکێ کوردستانێ لێ ب ڤان رەفتار و ناکۆکیێن دناڤبەرا هەڤسەرۆکێن ئێکەتیێ د ئێشم و دژی هەر ناکۆکیەکا دناڤبەرا واندا مە نەخاسمە قورخکرن و بکارئینانا هێزێن ئێمناهیێ و دەزگەهێن وان بۆ بەرژەوەندێن تایبەت .
ئەڤرۆ ژی ئەڤ ئاریشە چارەسەر ببیت، دێ چارەسەریەکا دەمەکی بیت چۆنکی سەرێ دوو بەرانا د مەنجەلەکێ دا ناکەلیت و پێتڤی یە مەنجەلێ بۆ سەرەکی بهێن .