لە میانی بەدوداچونێکی ئاژانسی ھەواڵی پەیامنێر بۆ پرسی دواکەوتنی بەیەکەوە بەستنەوەی فەرمانگەکانی ھەرێم بە سیستەمی ئەلیکترۆنی، سەرچاوەیەک لە وەزارەتی گواستنەوەو گەیاندنی ھەرێم ئاشکرایکرد کە بە فەرمانی وەزیر ھەموو جۆرە لێدوانێک لە وتەبێژو بەڕێوەبەرایەتیەکانی وەزارەتی گواستنەوەو گەیاندن قەەغەکراوە.

ماوەی چوار ساڵە وەزارەتی گواستنەوەو گەیاندنی ھەرێم پڕۆژەیەکی بۆ بەیەکەوە بەستنەوەی دام و دەزگاکان و فەرمانگەکانی ھەرێم بە یەکتریەوە داوەتە حکومەتی ھەرێم بەڵام تا ئێستا ئەو داوکاریەی ھەروەک خۆی ماوەتەوەو ھەنگاوی پێویستی نەناوە.
بۆ زانین و بەدواداچونی ئەو دواکەوتنەی پڕۆژەکە، پەیامنێر پەیوەندی بە ئومێد محەمەد وتەبێژی وەزارەتی گواستنەوەو گەیاندن کرد، ناوبراو وێڕای پشتراستکردنەوەی ھەواڵەکە پێی راگەیاندین کە بە نوسراوی رەسمی وەزیری گواستنەوە ھەموو جۆرە لێدوانێک تا کاتێکی نادیار لە وتەبێژو بەڕێوەبەرانی وەزارەتی گواستنەوەو گەیاندن قەدەغە کراوە بۆیە ناتوانم ھۆکارەکانی ئەو دواکەوتنەی پڕۆژەکەت پێبڵێم.
گوتیشی: پێمواتیە ئەو بڕیارە زیان بە ھاوڵاتیان دەگەیەنێـت بەتایبەت لەبەرئەوەی کە لە ھەواڵ و چالاکی و کارەکانی وەزارەتمان کە زۆر گۆڕانکاری و خزمەتگوزاری بۆ ھاوڵاتیان تێدایە بێبەش دەبن.