له‌ چه‌ند رۆژی رابردودا گروپێكی چه‌كدار له‌ناوچه‌ی مه‌ریوان په‌لاماری پایگایه‌كی سه‌ربازی كۆماری ئیسلامی ئێرانیان داوه‌و ژماریه‌ك سه‌ربازیش كوژراون، به‌گوێره‌ی هه‌ندێ زانیاریش ئه‌م چه‌كدارانه‌ له‌ناو هه‌رێمی كوردستانه‌وه‌ دزه‌یان كردووه‌، له‌مباریه‌وه‌ وته‌بێژێك به‌ناوی حكومه‌تی هه‌رێمی كوردستانه‌وه‌ رایگه‌یاند: ئێمه‌ نیگه‌رانی و نارِه‌زایی خۆمان به‌رامبه‌ر به‌م روداوه‌ ده‌رده‌برِین به‌توندی مه‌حكومی ده‌كه‌ین.

ته‌ئكیدیش ده‌كه‌ینه‌وه‌ كه‌نابێ هیچ هێزو لایه‌نێك خاكی هه‌رێمی كوردستان بۆ هێرشكردنه‌ سه‌ر هه‌ر ولاَتێكی دراوسێ به‌كار بهێنێت، له‌پێناو پاراستنی ئاسایش و په‌یوه‌ندی دۆستانه‌ی نێوان هه‌رێمی كوردستان و وڵاتانی دراوسێشدا ، پێویسته‌ هه‌موو لایه‌كمان به‌گوێره‌ی یاسا نێوده‌وڵه‌تیه‌كان و به‌رژوه‌ندی هاوسێیه‌تی رێگری له‌هه‌ر كرده‌وه‌یه‌كی له‌م جۆره‌ بكه‌ین.

ئێمه‌ پێمان وایه‌ ئه‌م جۆره‌ په‌لاماردانانه‌ به‌پله‌ی یه‌كه‌م زیان به‌ به‌رژوه‌ندی خه‌ڵكی كوردستان و دانیشتوانی ناوچه‌ سنووریه‌كان ده‌گه‌یه‌نن و دۆخێكی نائارام و مه‌ترسیدار دروست ده‌كه‌ن، بۆیه‌ حكومه‌تی هه‌رێم هه‌موو هه‌وڵێكی خۆی ده‌خاته‌گه‌رِ بۆ رێگه‌ گرتن له‌دووباره‌ بوونه‌وه‌ی په‌لاماری له‌م جۆره‌، له‌هه‌مان كاتدا داواش ده‌كات كه‌هه‌موو لایه‌ك به‌گیانی به‌رپرسیارێتی و لێكگه‌یشتنی هاوبه‌ش كێشه‌و گرفته‌كان به‌شێوه‌یه‌ك چاره‌سه‌ر بكه‌ین كه‌خزمه‌تی ئارامی و به‌رژوه‌ندی ناوچه‌كه‌مان بكات.