ئایا بایدن بۆ كورد دەبێتە فریادڕەس؟

ئایا بایدن بۆ كورد دەبێتە فریادڕەس؟

ئەوە راستییەكی سایكۆلۆژییە كە كەسێك، یان گرووپ و تاقمێك خواستێكی بەدینەهاتوویان هەبێت، هەمیشە بەدوای فریادڕەسێكدا دەگەڕێن، تا ئەو خواستەیان بێنێتەدی. كورد لە مێژووی خۆیدا هەمیشە چاوی لە ئاسۆ بووە، بەڵكو رۆژێك هەڵبێت و بەدڵی ئەو بێت و خواستەكانی بێتەدی و پشوویەك بدات، ئەگەرچی زۆرینەی ئەو كەسانەش كە كورد ئومێدی پێ بەستوون، ئەوە نەبوون و ئاواتەكانی كورد لەگەڵیاندا بێ ئاكام بووە.
لەئێستادا هاتنی سەرۆكێكی نوێ بۆ ئەمریكا و جیهان جێی باسە، بەتایبەت كە جیهان نەك گرفتاری كۆمەڵێك قەیرانی سەختی سیاسی و ئابووری و تەندروستی و ئاسایش و پێكەوەژیانە، بەڵكو چوار ساڵی خولی دەسەڵاتەكەی ‹ترەمپ› هاوكێشەی سیستمی جیهانی لیبڕاڵیزمی جیهانیی تێكدا و پارسەنگی هێزەكان تێكچوون و، جیهانی بەرەو تاكڕەوی و یەكجەمسەری برد و، وڵاتێكی وەك چینی هێنایە پێشەوە، كە بەشداریی سیستمی نوێی جیهانی بكات و، ئایندەی ئیدارەی جیهان ئەگەری سیستمی دوو جەمسەریی لێ بكرێت، كە ئاخۆ ئایندەی لیبڕاڵیزمی جیهانی و چ بیرێك پێشڕەویی جیهان دەكات، روون نییە، رۆژهەڵاتی ناوەڕاستیش بە ناسەقامگیری و ئایندە ناڕوونی ماوەتەوە، جیهانێك نوقمە لە بێئومێدی و تووڕەییدا، ئەمانە لەبەردەم «جۆ بایدن»دان، كە رەنگە كێشەی كورد و پرسی كورد زۆری بوێت، تا ئەو بچێتە سەری و ئاوڕی لێ بداتەوە، مێژووش ئەوەمان پێ دەڵێت كە لە هەموو گۆڕانكاری و دابەشكاری و سیاسەتەكانی وڵاتە زلهێزەكانی پێشوودا بۆ ناوچەی رۆژهەڵاتی ناوەڕاست، كورد ئامانج نەبووە، بەڵكو ئەگەر لاكردنەوە بۆ لای كورد خزمەتی بە ئامانجەكانی وڵاتانی زلهێز كردبێت، ئەوا دەستێكیشیان بەسەر كوردیدا هێناوە، تاكو ئامانجەكەیان هاتووەتەدی و دواتر كوردیان فەرامۆش كردووە، بۆیە لە ئێستادا كورد لەبری ئەوەی ئومێد بە «جۆبایدن» ببەستێت، تا لایەك لە پرسەكەی بكاتەوە، باشترە دیراسەیەكی وردی ئەگەر و پێشهاتەكان بكات لە ناوچەی رۆژهەڵاتی ناوەڕاستدا، لە هەمان كاتدا دیراسەیەكی وردی پاكێج و سیاسەتەكانی بایدن بكات، بۆ ئەوەی خۆی ئامادە بكات كە چۆن خواستەكانی خۆی لەگەڵ سیاسەتەكانی ئەودا هاوتەریب بكات، چۆن خۆی بكاتە بەشێك لەو پاكێجانەی كە ئەو ئامادەی كردووە بۆ رۆژهەڵاتی ناوەڕاست، وابكات كە بەبێ كورد سەركەوتنی سیاسەت و ستراتیژی نوێی ئەمریكا بۆ ئەم ناوچانە ئەستەم بێت. ئەوەش پێش هەموو شتێك بە رێكخستنەوەی نێوماڵی كورد خۆی و بوونی سیاسەت و ستراتیژ و گوتارێكی هاوبەش، لەگەڵ خۆئامادەكردنێكی باش دەكرێت، بۆ هەر ئەگەرێك كە رووبدات لە ناوچەی رۆژهەڵاتی ناوەڕاست، تاكو لە هیچ كام لە ئەگەرەكاندا كورد فەرامۆش نەكرێت، چونكە ئەوە روونە كە ئەمریكا راستە بە هۆی دەستاودەستكردنی دەسەڵات و هاتنی هەر چوار ساڵ جارێك سەرۆكێك، رەنگدانەوە و كاریگەری سیاسەتەكانی ئەو سەرۆكە نوێیە و پاكێجەكەی كاریگەری دەبێت لەسەر سیاسەتی پیادەكراوی بۆ جیهان، بەڵام ئەمریكا وڵاتێكە كە سیستمی سیاسیی تا راددەیەك جێگیرە و دەستوورێكی تۆكمەی هەیە، كە دوو سەدەیە پەیڕەوی دەكات و وڵاتێكی دامەزراوەییە، ئەمەش وای كردووە كە ئەم دەستوور و سیستمە سیاسی و دامەزراوەییە تا راددەیەك سیاسەت و روئیای بۆ ئیدارەكردن و گۆڕانكاری چوارچێوەدار بێت و، تەنیا ئەوەندەیە ئەو سەرۆكە نوێیە تێڕوانین و میكانیزم و رێگەچارەی بۆ كێشە و پرسەكانی جیهان جیاوازتر بێت، بۆیە ناكرێت كورد خۆی دەستەوەستان دانیشێت و چاوەڕێی فریادڕەس بكات، بەڵكو دەبێت خۆی وا رێك بخاتەوە و ئامادە بكات، كە بەشێك بێت لە ئەجێندای سیاسەتی نوێی هەر سەرۆكێك كە دێت، كە بەبێ كورد دروستكردنی ئاشتی و ئاسایش لە ناوچەكەدا ئەستەم بێت، ئیتر كورد كار بۆ ئەوە بكات كە لە گۆڕانكارییەكانی ناوچەی رۆژهەڵاتی ناوەڕاستدا ئامانج بێت بۆ وڵاتانی زلهێز، نەك بە پێی سیاسەتی كاتیی ئەوان لای بەلادا بكەنەوە، كاتێكیش كە ئامانجەكانیان هاتەدی، فەرامۆشی بكەن، واتە دەبێت لە رستەی سیاسەت و ستراتیژی وڵاتانی زلهێزدا بۆ رۆژهەڵاتی ناوەڕاست، كورد ناو، یان راناوی سەرەكی بێت، نەك راناوی لكاو.

Top