ناوی تۆڕی كۆمەڵایەتی خۆی ماناكەی دیارە، هەر لەوەشەوە هاتووە و دەرهاویشتەی واقعی ژیانێك بووە، كە پەیوەندییە كۆمەڵایەتییەكان بەرەو لاوازبوون رۆیشتووە كە ژیانی ئەوروپایە، هەربۆیە سەیری هەموو بەروار و شوێنی سەرهەڵدانی تۆڕە كۆمەڵایەتییەكان بكەین، دەبینین لە ساڵانی كۆتایی نەوەدەكان و سەرەتای ٢٠٠٠ ـەكان دروست بوون، كە یان لە وڵاتێكی ئەوروپی، یان لە ئەمریكا داهێنراون. وەك چۆن ئامرازەكانی دیكەی میدیا سەرهەڵدانیان دەرهاویشتەی گەشە، یان پێداویستیی واقیعی كۆمەڵایەتی، یان سیاسی، یان ئابووری و...هتد بوون، سۆشیال میدیا، یان تۆڕی كۆمەڵایەتیش بەهەمان شێوە دەرهاویشتەی ژیانێكی گەشەی ئابووری و خواستی بازاڕ و بەرهەم بووە، بۆ ناساندن و ریكلام و ماركێتین، ئاڵۆزبوونی ژیان لە جیهانە كۆمەڵایتیە واقیعییەكەدا پێویستی بە ژیان و پەیوەندیی ئۆنلاینی هەیە بۆ پیاڕاگەیشتن بەكارو چالاكییەكان و پێویستی دامودەزگا و رێكخراو فەرمانگەو كۆمپانیا و كارگەكان، لەبەرامبەر ئەم ژیانە ئاڵۆزو ئۆنلاینەدا نامۆبوونی تاك لە ژیانە كۆمەڵایەتییە واقیعییەكەو دابڕانی بەتایبەت لە كولتووری ئەوروپا كە ژیانی نەریتی خێزانی و پەیوەندیی خزمایەتی وكۆمەڵایەتی دەمێكە بەجێیهێشتوون، دواجار تاكێكی دروست كردووە كە تەنیایە و دابڕاوە و نازانێ دایك و باوك وپوور و مام و خوشك و برا كێیە، یان سەرقاڵی بە ئیش و كاری ژیان و زۆریی كاتژمێركانی كاركردن و دەستكەوتنی ئیش لە دەرەوەی وڵات، یان شاری خۆی وای لێكردووە هاوڕێی شەو رۆژی كۆمپیتەرێك، یان مۆبایلەكەی دەستیەتی، بۆیە مرۆڤیش وەك بوونەوەرێكی كۆمەڵایەتی كە وەك پسپۆڕێكی بواری سایكۆلۆژیای ماركیتین دەڵیت: «مرۆڤ لە رووی سایكۆلۆژیاوە پێویستی پەیوەندییە كۆمەڵایەتییەكان هەر لە سەردەمی قەیسەر و سەرەتای ژیانی مرۆڤایەتییەوە تا ئێستا وەك یەكە و پێویستی بە پەیوەندیی كۆمەڵایەتی و سۆز و خۆشەویستی وپشتیوانیی دەوروبەرەكەی هەیە.» كەواتە لە كۆمەڵگەیەك كە زۆرینەی بوارەكانی ژیانی بووەتە ئۆنلاین، بۆ پڕكردنەوەی بۆشایی پەیوەندییە كۆمەڵایەتییەكانی ژیانێكی كۆمەڵایەتیی ئۆنلاینی بۆ خۆی داهێنا، ئەمە بە خێرایی گوازرایەوە بۆ كۆمەڵگەیەك كە هێشتا نە بازرگانی، نە كار، نە سیاسەت، نە هیچ گۆشەیەكی دیكەی ژیانمان ئۆن لاین نییە، هێشتا پابەندی زۆرینەی نەریت و پەیوەندییە كۆمەڵایەتییەكانین، تەنیا بە بوونی هەریەكە لە ئەكاونتێكی سۆشیال میدیا دەمانەوێت جەژن و پرسە و پیرۆزبایی و پەیوەندییە هاوڕێیەتی و خزمەیەتییەكانمان بكەینە ئۆنلاین و لە رێی نووسینی پۆستێك، یان كۆمێنتێك، زۆرینەی ئەركە كۆمەڵایەتییەكانمان بەرامبەر یەكتری بەجێ بهێنین، وردە وردە ئەمەش دابڕانی كۆمەڵایەتی دروست دەكات، ئامانجی ئەم ئامرازانە كە بۆ پڕكردنەوەی بۆشایی پەیوەندییە كۆمەڵایەتیەكان داهینرا، لە كۆمەڵگە نەریتیەكاندا بووەتە هۆی دابڕانی كۆمەڵایەتی. رەنگە ئەمە بۆ هەندێكمان كە سەرقاڵین تا رادیەك دروست بێت، كە پەیوەندییەكانمان بكەینە ئۆنلاین، بەڵام بە گوێرەی داتای توێژینەوەیەك كە قوتابییەكی زانكۆی سلێمانی ئەنجامی دابوو، نزیكەی٢٠٪ی ئەندامانی كۆمەڵگەی ئێمە تۆڕی كۆمەڵایەتی بەكاردەهێنن، نزیكەی ٩٠٪ی ئەو رێژەیەش ئەوانەن كە تەمەنیان لە خوار٣٥ ساڵەوەیە، كەواتە ئەی ئەو رێژە زۆرەی كۆمەڵگە كە تۆڕی كۆمەڵایەتییان نییە تا لە رێی ئۆنلاینەوە پەیوەندییان لەگەڵ ببەستیت، هاوكات لە ژیانە واقیعییەكەش لێیان دادەبڕێت و سەردانیان ناكەیت، دەبێت چی بكەن؟ بۆیە بە بڕوای من هێشتا زووە بۆ ئێمە كە تەواوی ئەركە كۆمەڵایەتییەكانمان لە رێی ئۆنلاینەوە ئەنجام بدەین و ژیانە واقیعییەكە فەرامۆش بكەین.