ئارامیی كۆمەڵایەتی چەمكێكی دێرینە كە بە زاراوەی جۆراوجۆرەوە ساڵانێكی زۆرە لەسەر ئاستی وڵاتاندا كاری لەسەر دەكرێت، چونكە ئارامیی كۆمەڵایەتی بەردی بناغەی هەموو ئارامییەكانی بوارەكانی دیكەی كۆمەڵگەیە، بەڵام لەگەڵ ئەوەشدا خودی ئارامیی كۆمەڵایەتی وەك چەمكێك پێویستیی زۆری بە چەند بوارێكی دیكە هەیە بۆ ئەوەی لە چەمكەوە ببێتە كەلتوور، لەو بوارانەش بۆ نموونە:
1- پەروەردە: زۆر گرنگە لەم بوارەدا كار بكرێت بۆ:
یەكەم: پێناسەكردنی چەمكی ئارامیی كۆمەڵایەتی وەك ئامرازێكی پاراستنی كۆمەڵگە.
دووەم: تەرخانكردنی بەشێكی پڕۆگرامی هەر قۆناغێكی خوێندن بە باتەكانی ئارامیی كۆمەڵایەتی.
سێیەم: ئاگاداركردنەوەی نەوەی تازە لە مەترسییەكانی كەلتووری نامۆ و ئاراستە سیاسییە توندڕەوەكان و مەترسیی ماددە هۆشبەرەكان و كەلتوورە بیانییەكان.
2- میدیا: راهێنانی هاووڵاتییان لەسەر بەهێزكردنی چەمكی ئارامیی كۆمەڵایەتی لە رێگەی:
یەكەم: كۆڕو سیمیناری بەردەوام بۆ بەزیندووڕاگرتنی چەمكی ئارامیی كۆمەڵایەتی لای هاووڵاتیان لە گۆشەنیگایەكی نیشتمانییانەوە.
دووەم: گەیاندنی زانیاری و پەیامی ئاشتی و ئارامیی كۆمەڵایەتی بە زمانێكی سادە كە هاووڵاتییانی خۆمان لێی تێببگەن.
سێیەم: دروستكردنی پەیوەندییەكی پتەو لەنێوان میدیاو دەزگاكانی كاروباری كۆمەڵایەتی بۆ برەودان بە ئارامیی كۆمەڵایەتی وەك پێویستییەكی سەردەم بۆ كاتی ئاشتی و كاتی جەنگ.
3- وەزارەتە پەیوەندیدارەكان: وەك بوارێكی گێڕانەوەی بەها بۆ بواری ئاشتی و ئارامیی كۆمەڵایەتی لە رێگەی:
یەكەم: رێكخستنی كۆنفرانسی هاوبەش لەنێوان بەشی كۆمەڵناسی لە زانكۆكان و رێكخراوەكانی توێژینەوەی كۆمەڵایەتی و توێژەرە كۆمەڵایەتییەكان بۆ بایەخدان و گەشەپێدانی چەمكی ئارامیی كۆمەڵایەتی لە رووی هۆكارو راسپاردەكانەوە.
دووەم: تەرخانكردنی بەرنامەی میدیایی و هۆشیاری لە كەناڵەكانی راگەیاندنەوە سەبارەت بە زیندووكردنەوەی بەهای ئارامیی كۆمەڵایەتی.
سێیەم: تەرخانكردنی چەند بابەتێك لە پڕۆگرامی زانكۆكاندا بۆ بایەخدان بە بەهای ئارامیی كۆمەڵایەتی.
چوارەم: تەرخانكرددنی بەشێك لە وتارەكانی رۆژانی هەینی بۆ باسكردن لە بەهای ئارامیی كۆمەڵایەتی.
پێنجەم: بایەخدانی وەزارەتی كارو كاروباری كۆمەڵایەتی بە پڕۆسەی هۆشیاری لەبارەی بەهای ئارامیی كۆمەڵایەتی.
4- بواری ئابووری و خۆراك: وەك كورد لە دێرین زەمانەوە گوتوویەتی: «كاسەی پڕ ئاشتیی ماڵانە»، بۆیە ئەم خاڵانە یارمەتیدەرن بۆ ئارامیی كۆمەڵایەتی:
یەكەم: پشتگیریی گەڕانەوە بۆ گوندەكان .
دووەم: زیندووكردنەوەی ئابووریی كشتوكاڵی .
سێیەم: خودبژێویی ژیانی لادێ .
چوارەم: بە زانستی كردنی كەرتی كشتوكاڵ.
پێنجەم: هێنانی تەكنەلۆژیای سەردەم بۆ زیادكردن و چاكتركردنی بەرهەم .
شەشەم: دامەزراندنی پیشەسازیی خۆراك.
حەوتەم: دابینكردنی دەرفەتی كار لە لادێ بۆ بەهێزكردنی ئابووریی لادێ و زیادكردنی داهات.
هەشتەم: خستنەڕووی ئاكام و زیانەكانی پەنابردنە بەر بەكارهێنانی چەك و توندوتیژی.
نۆیەم: سوودوەرگرتن لە ئەزموونی وڵاتانی سەركەوتوو لەبواری بنەبڕكردنی توندوتیژیی كۆمەڵایەتیی.
دەیەم: دروستكردنی رایەڵەو پەیوەندیی لەبواری باس و توێژینەوەوە لەنێوان دەزگا پەیوەندیدارەكاندا لەبارەی چەمكی ئارامیی كۆمەڵایەتییەوە.