جارێكی دیكە حكومەتی ناوەندی لە بەغداوە ناتوانێت حكومرانی عێراق بكات ، لەبەر ئەوەی حزبی دەعوای عێراقی بە سەرۆكایەتی نوری مالیكی و ئێستاش حەیدەر عەبادی لە ژێر سێبەری مالیكدا بە هەمان ئەو ئاراستەیە هەنگاو هەڵدەگرێت كە نایانەوێت عێراق بوونی هەبێت و عێراقیش بوونی نەماوە، بۆیە گرەو كردن لە سەرعێراق بە گشتی و لەسەر نوری مالیكی و حزبی دەعوا هەر لەسەرەتاوە گرەوێكی دۆراوە و، هەركەس و لایەنێكیش بیەوێت مالیكی و حزبی دەعوا وەك هێزێكی سەرەكی و كاریگەر لە پرۆسەی سیاسیی عێراقدا بۆ گەلی كوردستان بخاتە روو و، لەهەمانكاتیشدا لە ژێر سێبەری مالیكی و حزبەكەیدا نمایشی ماسولكەی هێز بەرامبەر پارتی و سەرۆكایەتی هەرێمی كوردستان بكەن، ئەوە جیا لەوەی شەڕی خۆتڕێن دەكەن، لە هەمانكاتدا لەوەش بێ ئاگان كە ئێستا بە ئاگاداری و رەزامەندی ئەو حكومەتەی كە حیزبی دەعوا هێزی سەرەكیە تیایدا و نوری مالیكی سەرۆكی ئەو حزبەیە، ئەوا ئەمریكا وەك سەرۆكی هاوپەیمانی هاوپەیمانی نیودەوڵەتی دژی داعش، وەك ئەندامێكی ئەو هاوپەیمانیە مامەڵەی لەگەڵ هەرێمی كوردستان دەكات و، لەسەر ئاستی پێنتاگۆن یاداشتنامەی لیكتێگەیشتن لەگەڵ وەزارەتی پێشمەرگە ئیمزا دەكات.
ئەم وەرچەرخانەی هێز كە لە جیهاندا لەسەر چەندین ئاست بوونی هەیە و لە پرۆسەی سیاسی عێراقیشدا بە راشكاوی لە نێوان هەرێمی كوردستان و عێراق و دەوڵەتانی ئیقلیمیشدا رەنگدانەوەی هەیە، ئەوا نەك هەر هەندێك لە حزب و سیاسەتمەداری كوردستان لێی ناحاڵین، لە هەمانكاتدا حزبی دەعوا و خودی مالیكیش ناوێرێن راشكاوانە ئەم وەرچەرخانە گەورەیەی هێز بۆ سەركردایەتی حزبەكەی خۆشیان باس بكەن، ئەمە تانتووتێكی سیاسیی نیە لە حزبی دەعوا یان ئەوانەی لە كوردستانەوە بە تازەكردنەوەی هاوپەیمانی لەگەڵ حزبی دەعواو مالیكی سەرخۆشن، بەڵكو ئەمە ئێستا لە واقیعدا بوونی هەیە ، هەر بۆ نموونە ئەگەر سەرنج لە تویت و پۆستەكانی كادرە باڵاكانی حزبی دەعوای عێراق بدەین وەك كاردانەوەیەك بەرامبەر ئیمزاكردنی لیكتێگەیشتنی هاوبەش لە نێوان وەزارەتی پێشمەرگەی كوردستان و پێنتاگۆندا، ئەوا وەك دەبینین پەرلەمانتار و ئەندامانی سەكردایەتی حزبی دەعوا لە بێ ئاگایی خۆیان دەڵێن، ئەو رێككەوتنە پێشێلكردنی سەروەریی عێراقە و هەنگاوێكە بۆ جیابوونەوەی عێراق لە كوردستان، لەبەرامبەردا ئەوانەشی لە كوردستانەوە بە پشت بەستن بە هاوپەیمانی حزبی دەعواو مالیكی دەیانەوێت هەموو شتێكی كوردستان بێ بایەخ بكەن، ئەوانیش لە تویت و پۆستەكانی فەیسبووكدا دەڵێن، ئینجا ئەو رێككەوتنە چیە لەگەڵ فەرمانبەرێكی پێنتاگۆن كراوە، ئەمە لەكاتیكدا خودی ئەم لیكتێگەیشتنەی نێوان پێنتاگۆن و وەزارەتی پێشمەرگە راستەوخۆ بە سەرپەرشتی ئەشتون كارتەری وەزیری بەرگری ئەمریكا بووە و هەر خۆیشی ئەم پرسەی لەگەڵ حكومەتی ناوەندی بەغدا باسكردووە و پاش ئەوەی بەغدا رازی بووە ، خاتوو ئەلیسا سلۆكتین یاریدەری ئەشتون كارتەر بە نوێنەرایەتی وەزارەتی بەرگری ئەمریكا ئەو رێككەوتنەی لەگەڵ وەزارەتی پێشمەرگە ئیمزا كردووە.
ئەوجا بۆ ئەوانەی لە بایەخی ئەم وەرچەرخانەی هێز تێناگەن، دەڵێن ئەم رێككەوتنە دوو رەهەندی زۆر گرنگی هەیە كە بریتن لە لایەنی ( سەربازی و ئابوری) سەبارەت بەلایەنی سەربازی ئەمە دانپێدانانێكی گەورەی ئەمریكا بە پێشمەرگە وەك سوپایەكی نیزامی كوردستان ، پێنتاگۆن لە گەڵ هیچ هێزێكی سەربازی ریككەوتن ئیمزا ناكات كە سوپای نیزامی نەبێت یان مەرجەكانی سوپای نیزامی تیدا نەبێت، تەنانەت تایوان كە لەساڵی 1945- 1971 بەفەرمی ئەندامی نەتەوەیەكگرتووەكان بووە، خاوەنی سوپا و دامەزراوەی دەوڵەتی خۆشیەتی، بەڵام لەبەر ئەوەی چین رازی نیە ، پێنتاگۆن نەیتوانیووە ریككەوتنی سەربازی لەگەڵ تایوان ئیمزا بكات . بۆیە ئەگەر تایوان كە لە ساڵی 1949 ەوە هیچ پەیوەندیەكی لەگەڵ چین نەماوە و تا 1971یش هەر تایوان نوێنەرایەتی هەموو چینی كردووە بە ناوی ( چینی نیشتمانی)، ئێستا ئەمریكا نەتوانێت ریككەوتنی سەربازی لەگەڵ تایوانێك ئیمزا بكات كە ئەندامی ریكخراوی بازرگانی جیهانی یە( WTO)، ئەمە مانای ئەوەیە ئەم ریككەوتنە سەربازییەی نێوان پێنتاگۆن و وەزارەتی پێشمەرگە ، سەرەتایەكی گرنگە بۆ دەستپێكردنی دیالۆگ لە گەڵ عێراق و دەوڵەتانی ئیقلیمی بۆ راگەیاندنی سەربەخۆیی كوردستان بەشێوەیەكی ئاشتیانە.