هەرێمی كوردستان، پشتی لە هەموو هەڕەشەكان كردووە و سەركردەكانی سەرقاڵی كێشەیەكن كە كۆتاییەكەی هیچە! داعش چەند كیلۆمەترێك لە شارە گەورەكانمان دوورە. وڵاتانی دەوروبەر دەستیان هێناوەتە ناو كێشەكان (ئەگەر خوڵقێنەری نەبن!). باری ئابووری هەروا خراپ دەبێت (سەركردەی حزبەكان دوعا دەكەن خراپتر بێت). بیانووی ئەم قەیرانە چەسپاندنی دیموكراسییە لە وڵاتێكدا نە دەوڵەتی هەیە و نە سەروەری خۆیەتی تا نیزامێكی دیموكرات بۆ سیستەمی سیاسی دروست بكات. لە كوردستاندا دەستاودەستكردنی دەسەڵات ئێستا لە ئەولەوییەتدا نییە، چونكە هەڵمی هەناسەی دوژمن دەمانگاتێ. ئینجا سەركردەی ئەو حزبانەی دەستاودەست دەخوازن، نەك هەر واقیعبین نین، بەڵكو بە كردەوە و بە باوەڕ، چەند قۆناغەڕێ لەو ئامانجە دوور و جیاوازن. پەرێزی ئەوانە تا ئێستاش شاهیدی باوەڕبوونیان بە دیموكراسی بۆ نادات. كەواتە كێشەكە لە سەر خواستێكی دیكەیە. ئەو خواستەیان دوورخستنەوە و ڕووخاندنی بارزانی -یە.
وڵاتی ئێمە وەك خاك، ساڵێكە لە دەستی كوردستانیاندایە، بەڵام سەربەخۆ و خاوەنی چارەنووسی خۆی نییە. لە هەر تێكچوونێكی پارسەنگی سوپایی و سیاسیدا، تەفروتونا دەبین. وڵاتانی داگیركاری كوردستان لە دەوروبەرمان، دەیانەوێت لەم قۆناغە یەكلاییكەرەوەدا، هیچ نیزام و دەسەڵاتێكی دەستڕۆیشتوو لە هەرێمی كوردستاندا نەبێت. بۆیە شیعاری“قەی چی ئەكات با سەرۆكمان نەبێت“ بە حزبە دۆستەكانیان بەرز كردۆتەوە. بە پێچەوانەی ئەوانەوە، بارزانی و هاوپەیمانەكانی، دەزانن كورد لە كێبەركێیەكی مێژووییدایە لەگەڵ زەمان و ڕووداوەكان. ئەگەر مافی سەربەخۆیی لەدەست بدەین، ئیدی بە درێژایی سەدەی بیست و یەك، بندەست دەمێنینەوە. كورد لە بەرامبەر ئەركی مێژوویی خۆیدایە. لێرەدا پێویستە بارزانی پشتیوانی بكرێت تا لە قۆناغەكە دەردەچین. ئەگینا مەبەست سەرۆكایەتی هەرێم نییە. من پێموایە ئەگەر ئەو پۆستە ئامانج بوایە، بارزانی ئەوە تێدەگات كە دوای كۆتایی هاتنی ماوەی یاسایی خۆی، دەبێ یەكێكی دیكە لە حزبەكەی خۆی كاندید بكات (دەشیكرد).
بەو تێگەیشتنە لە خواستی بارزانی، لە بەردەوامی كردنیدا لە سەرۆكایەتی وڵات، دەردەكەوێت مەترسییەك بە ناوی دیكتاتۆری وجودی نییە. دوای سەربەخۆیی، ئەوە دەستڕەشی و سەلەفییەت و توندڕۆیی دینی و ئایدیۆلۆژیی عەبەسییەتە كە وەك هەڕەشە، لەوانەیە ببنە لەمپەر لە پێش مەدەنییەت و دیموكراسی. ئەویش ئەو كات بیری لێ دەكرێتەوە.
یەكڕیزیی نیشتمانی، لە پێشەوەی هەموو خواستێكی دیكەیە، چونكە هەڕەشەیەك لە سەرمانە كە ڕەش و سپی پێكەوە لەناو دەبات. فرسەتێكمان لە پێشە ئەگەر وریا نەبین، بە یەك جار لەدەست هەمووان دەچێت. حیكمەتی یەكڕیزبوونمان لەوەدایە. پێویستە حكومەتی كوردستان بەهێزتر بكرێت، داوای لێبكرێت تواناكانی خۆی كۆبكاتەوە، سامانی وڵات بپارێزێت تا گەلەكەمان لە بەڵای بەردەرگا، دوور بكەوێتەوە. لە گەندەڵی و دژایەتیكردنی دامودەزگای هاوچەرخدا، هەموو حزبەكان بەشدارن، كەسیان لەوی دیكە باشتر نییە. تەنیا دەسەڵات و دەستڕۆیشتووییان جیاوازە. بۆیە بەرزكردنەوەی ئەو شیعارە (گەندەڵی) وەك شیعاری سەرەكی، چاوی گەل بەستن و ماڵی خۆ وێرانكردنە. جیهانی مەدەنی، بەرخۆدان و پاراستنی وڵاتیان لە كورد دەوێت، داوای دیموكراسی خاڵسی لێ ناكەن. هەڵبەت ئەم قسەیەم بۆ پەنادانی گەندەڵی و نەبوونی دامودەزگا نییە. وەك پەندە كوردییەكە دەڵێ: «ئەگەر گاڕانیان بە خڕی برد، ناتوانی لە گۆلكە سوورەكەت بپێچییەوە!»
بۆیە من پێموایە پێویستە سەرۆك بارزانی، بیر لە دەرچوونێكی بەهێز و خێرای وڵاتەكەمان لەم قەیرانە بكاتەوە. ڕاوێژیی یاساناسە شارەزاكانی كوردستان (ژمارەیان زۆر نییە) وەربگرێت و دۆخەكە یەكلایی بكاتەوە. ئەو یەكلایی كردنەوەیە لە بەرژەوەندی سەربەخۆیی و پاراستنی گیان و خاكی هاونیشتمانیان بێت. ئەولەوییەت لەوەدایە نەك لە كات بە فیڕۆدان و وەخت كوشتن. پێویستە وڵات نەگاتە قۆناغێك كە ئیدی كەس دان بە كەسی تردا نەنێت. سەرۆك كارە سەرۆكایەتییە چاوەڕوان لێكراوەكەی بكات. میللەتان بۆ ڕزگاری سەرۆكیان پێویستە تا ئیرادەیان یەكبخات، نەك مەكۆی عەبەسییەتی كات بەفیڕۆدەر كە چارەنووس بەرباد دەدات. زۆرینە و كەمینە بۆتە یارییەكی ترسناك كە ئیرادەی دەرەكی و دژ، دەستەكانی ناوخۆ دەجووڵێنیت. لە ناوە و دەرەوەی پەرلەمان، دژی هاوپەیمانانی كوردستان، بەتایبەتی ئەمریكا، بریتانی و نەتەوە یەكگرتووەكان. قسە دەكرێت و تانەیان لێ دەدەن، كەچی نوێنەری ئێران دێننە ناو هۆڵی پەرلەمان و دەیكەنە چاودێری یەكلایی كردنەوەی نەهێشتنی هیچ سەرۆكێك بۆ كوردستان! ئیدی یارییەكە قێزەوەن بووە.
بۆیە ئەگەر سەركردەی حزبەكان، بە خێرایی لە بەرژەوەندی یەكڕیزی و چارەنووسی گەل و نیشتمان ڕەفتار نەكەن، سەرۆك با بۆ مێژووی خەباتی كورد و كاریزمای خۆی و ئامانجی سەربەخۆیی گەل بگەڕێتەوە، چونكە دیارە پێناوێكی دیكە بۆ ڕزگاری نابیندرێت.