ئەم جیهانەی كە لەرێگەی ئەزموونەكانی ئەوانەوە ئێمەش فێری زۆرێك لەشتەكان دەبین، ئەوەمان پێدەڵێت كە ئێمەش پێویستە ئەم پێشبینییە ژینگەییانە بەهەند وەربگیرێن لەبواری پاراستنی ژینگەو چاككردنیدا :
یەكەم: ئاو دەبێتە چەكی ئایندەو، ئاسایشی نیشتمان
ئەنجوومەنی وەزیرانی عێراق لەدانیشتنی ئاسایی ژمارە (24)ی بەرواری (5-6-2012)دا، رەزامەندیی نیشاندا لەسەر پڕۆژە یاسای ئەنجوومەنی نیشتمانیی بۆ ئاو، فەرمانگەی یاساییشی راسپارد بۆ هەمواركردنی بەو جۆرەی كە سەربەخۆیی دارایی و كارگێڕیی ئەنجوومەنەكە دابین بكات.
پێشنیارم بۆ پەرلەمانی كوردستان و ئەنجوومەنی وەزیرانی حكومەتی هەرێمی كوردستان ئەوەیە كە بەوردیی ئاگاداری ئەو پڕۆژە یاسایە بن و، خوێندنەوەی وردی لەبارەوە بكەن، چونكە زۆربەی رێرەوی ئاو لە هەرێمەوە بۆ عێراق دەڕوات و، ئاویش هیچی كەمتر نییە لە نەوت و، وەك گوتراویشە شەڕی ئایندە شەڕی ئاو دەبێت.
دووەم: دووبارە دروستكردنەوەی ماددە بەكارهاتووەكان، دەبێتە هێزێكی ئابووری
دووبارە دروستكردنەوەی ماددە بەكارهاتووەكان خۆی لەخۆیدا شۆڕشێكی گەورە بوو بۆ كەمكردنەوەی بڕی ماددە فڕێدراوەكان و پاشماوەكان. چونكە چەمكێكی نوێی داهێنراوبوو بۆ بەڕێوەبردنێكی تەواوكار لەبواری مامەڵەكردن لەگەڵ پاشماوەكاندا، كە جاران تەنها بەڕێگەی سووتان لەكۆڵ دەكرایەوە كە چەندین گرفتی ژینگەیی تری بەدوای خۆیدا دەهێنا، یان بەشێوازی لەچاڵنان بەشێوەیەكی زۆر سادەو سەرەتایی كە ئەمیشیان گرفتی ژینگەیی تری بەدواوە بوو.
بۆیە پێویستە لە هەرێم و وڵاتی خۆماندا كارگەی جۆراوجۆر بۆ دووبارە دروستكردنەوەی ئەم ماددانە دابمەزرێنن بەتایبەت كە ئێستا لەسایەی زۆربوونی دانیشتووان و، زۆرتر بەكاربردنی شتومەكی ئامادەكراودا، ساڵانە بڕێكی زۆری ئەو پاشماوانە بەجێ دەمێنن.
هەروەها لەو كارگانەی كە پێویستە بنیات بنرێن كارگەی دووبارە دروستكردنەوەی ماددە پلاستیكیەكانە بۆ سوود وەرگرتن لەهەزاران تەن لەو ماددانە كە ساڵانە فڕێدەدرێن و گرفتی ژینگەیی بۆ ئاوو خاك و هەوا دروست دەكەن.
سێیەم: گێڕانەوەی هاوسەنگیی نێوان شارو لادێ پێویستییەكی ئایندە دەبێت
پاراستنی هاوسەنگیی لە هاوكێشەی ژمارەی دانیشتووانی شارو لادێ، بایەخێكی یەكجار گرنگی هەیە لەبواری ژینگە پارێزیدا، چونكە ئەو هاوكێشەیە پەیوەندیی هەیە بەدابەشكردنی دانیشتوان بەسەر رووبەرە جیاكاندا بەپێی قەبارەی دەرامەتە جۆراوجۆرەكانی ژینگە.
دیارە هەوڵدان بۆ چارەسەركردنی ئەم گرفتە گەورەیە لەبارەی گوندەكانەوە، هەنگاوی زۆری بەدوادا دێت، دەكرێت ئاماژە بۆ هەندێكیان بكەین، لەوانە :
پشتگیریی كردنی هاوڵاتییان بۆ گەڕانەوە بۆ گوندەكان، زیندووكردنەوەی ئابووری كشتوكاڵیی، خود بژێوی ژیانی لادێ، بەزانستی كردنی كەرتی كشتوكاڵ، هێنانی تەكنەلۆژیای سەردەم بۆ زیادكردن و چاكتركردنی بەرهەم، دامەزراندنی پیشەسازی خۆراك، دابین كردنی دەرفەتی كار لە لادێ بۆ ئافرەت و پیاو بۆ بەهێزكردنی ئابوری لادێ و زیادكردنی داهات .
چوارەم: پاشماوەی نەخۆشخانەكان رێگەچارەی نوێی پێویست دەبێت
پاشماوەی نەخۆشخانەكان لەوانەیە لە چاو پاشماوەی گشتی شاردا لەبڕدا كەم بێت، بەڵام لەجۆردا زۆر ترسناكە.
بۆیە چارەسەری نوێ ئێستا سوتاندن نییە بەڵكو بریتییە لەخاوێنكردنەوەی هەڵمی (AUTO CLAVE) كە بەگەرمی و پاڵەپەستۆی هەڵم ئەو پاشماوانە چارەسەر دەكرێن و، ماددەی دیۆكسینی مەترسیداریش نایەتە بەرهەم.
بۆیە پێویستە نەخۆشخانەكان هەر جۆرێكی پاشماوە لەوانی دی جیابكەنەوەو، پاشماوەكان تێكەڵ نەكەن. چونكە بەشێوەیەكی گشتی هەر جۆرەو چارەسەرێكی هەیە، هەروەها دەبێت واز لەشێوازی سوتاندن بهێنین، چونكە سوتاندن ئێستا لە ئەمەریكاو ژاپۆن و زۆر وڵاتانی دی بەرەو كۆتایی دەچێت، لەبەر ئەوەی سوتاندن دەبێتە هۆی پیس بوونی هەوا .
پێنجەم: پیشە سەوزەكان دەبنە هەلی كاری نوێ
پاش بایەخدانی زیاتر بەپاراستن و چاككردنی ژینگە، وا چاوەڕوان دەكرێت لە داهاتوودا چەند پیشەیەكی ژینگەیی بێتە ئاراوە، كە بە پیشە سەوزەكان دەناسرێن.
پێشبینیی دەكرێت كە ئەم (دە) پیشەیەی خوارەوە ببنە باشترین پیشەی ژینگەیی لە دە ساڵی داهاتوودا :
كشتیاری نوێ، پەرچكردنی درەخت، تەكنیككاری دەزگاكانی وزەی خۆر، وەستای خانووە كەم وزەكان، دروستكارانی تۆربیدی (با)، بایۆڵۆژیای پاراستن، بەڕێوەبەری كارە سەوزەكان، بەكارهێنەرەوەی خاشاك، پەرەپێدەری سیستمی بەردەوامیی، پلاندانەری مەدەنی.
شەشەم: شاری پیشەسازیی دروست دەكرێت لەبری ناوچەی پیشەسازیی
لەشاری پیشەسازیدا كە دەبێت رووبەرێكی زۆر گەورەی بۆ دابین بكرێت، پێویستە ئەم خزمەتگوزاریانە هەبن بۆ تەواوی سەدان كرێكارو فەرمانبەرو ئەندازیارانەی كە لەوێدا كاردەكەن، وەك:
دەزگای بەرگری شارستانی، بنكەی پەیوەندیی نێودەوڵەتیی، بانك، بنكەی پۆستەو گەیاندن، چێشتخانە، هۆتێل، بەنزینخانە، مزگەوت و پەرستگا، سەنتەری تاقیگەی ژینگەیی، تۆڕی رێگاوبانی باش، خزمەتگوزارییە سەرەكییەكانی وەك ئاو، كارەبای بەردەوام، وێستگەی چارەسەركردنی پاشماوەی كارگەكان، ئاوەڕۆ، سەنتەری بازرگانی و شوێنی حەوانەوە، باخچەو پشتێنەی سەوز، سەنتەری كارگێڕیی..هتد
هەروەها جۆری ئەو كارگانەش دەكرێت پۆلێن بكرێن بۆ كارگەكانی بەرهەمهێنانی چیمەنتۆو مەڕمەڕو سیرامیك و كاشیی و، نیكل و مس و كانزاكانی ترو، ماددە كیمیامییەكان و پلاستیك و نایلۆن. هتد
قەبارەی ئەو كارگانەش دەكرێت لە هەر سێ ئاستی گەورەو مامناوەندیی و بچووكدا بن.
حەوتەم: بەكارهێنانی پایسكل زیاتر دەبێت
پایسكل هۆكارێكی گواستنەوەی سادەو بێ زیانە، بۆیە زۆرێك لە وڵاتان بەكاری دەهێنن و، سوودێكی زۆری بۆ تەندروستی و پاراستنی ژینگە لە پیسبوون هەیە، لەوانە بۆ نموونە :
بەكارهێنانی زەنگێكی ئاگاداركەرەوەیە بۆ سەبارەت بەهەبوونی كێشەی ژینگە لە كۆمەڵگەداو، دەبێتە هۆی كەمكردنەوەی بەكارهێنانی ئۆتۆمۆبێل و ماتۆڕو، پایسكل هیچ ماددەیەكی پیسكاری وەك هایدرۆكاربۆن و ئۆكسیدەكانی گۆگردو كاربۆن و كبریتی لە پاش بەجێ نامێنێت و، هۆكارێكیشە بۆ وەرزش و، دەنگی بەرزو ژاوەژاوی نییەو، لە شەقامدا رووبەرێكی زۆر كەم دەگرێت .
هەشتەم: لەشارەكاندا چەند شەقامێك تەنها بۆ پیادە تەرخان دەكرێن
لەئەنجامی تێكەڵ بوونی خەڵك و هۆكارەكانی گواستنەوەدا، بەهۆڕن و ماددە پیسكارەكانی وەك یەكەم ئۆكسیدی كاربۆن، ئۆكسیدی نایترۆجین و قورقوشم، زیانی گەورە بەهاتوچۆكارانی ئەو ناوەندە دەگەیەنن.
وڵاتانی پێشكەوتوو شەقامە قەرەباڵغ و ناوەندە چڕەكانی نێو شاریان تەرخانكردووە تەنها بۆ (پیادە)و، ئۆتۆمبێل ناتوانێت بچێتە ئەو شوێنانەوە، چونكە بەپێی هاوكێشەی پەیوەندی نێوان ژمارەی مرۆڤەكان و ژمارەی ئۆتۆمبێلەكان لەیەك شوێنداو لەحاڵەتی زۆرتربوونی ژمارەی خەڵكدا، پێویستە ئەو شەقام و ناوەندانە تەنها بۆ پیادەبن.
ئێستاش لەم بارودۆخەداو لەبەر بەرژەوەندی گشتی، وا چاوەڕوان دەكرێت كە هەرێمی كوردستان بەپێی پلانێك چەند شەقام و ناوەندێك لەشارە گەورەكاندا تەنها بۆ پیادە تەرخان بكات.