ھەرچەندە بەری سەد و ھەژدە سالا ژبەر وەغەرا داویێ یا پیشەوایێ رێبازا بارزانی ( شێخ محمد بارزانی )، خەلکێ نشتیمان پەروەر و وەڵات پارێزێن کوردستانێ و رێڤینگ و پەیرەوکارێن رێبازا بارزانی تۆشی غەمناکیەکا مەزن کرن و ب سالەکا ڕەش و کارەسات بار دھاتە دیتن لێ د ھەمان دەم دا ستێرەکا گەش و بریسقەدار خودایێ مەزن ب گەلێ کورد بەخشی کۆ ببیتە ئەگەرێ ڤەژاندنا رێکا ئازادیا کوردستانێ و بەرەڤ بەختەوەریکرنا کوردستانیا، لدایک بوونا کەسایەتیەکی کۆ ببیتە کارگەرترین پێشەوایێ رێبازا بارزانی و بزاڤا رزگاریخوازیا کوردستانی و ئەگەرێ پێشڤەبرنا دووزا سیاسی یا کوردی و گۆڕینێن مەزن یێ، سیاسی و جڤاکی و دادپەروەری .
ئەو ژی مەلا مستەفایێ بارزانی یە ، ئەو مرۆڤ و سەرکردێ لدەمێ گەنجاتیێ دا بوویە ھاریکارەکێ مەزن و کاریگەر بۆ پێشەوایێ رێبازانی ھەردوو برایێن نەمر شێخ عەبدولسەلام و شێخ ئەحمەد بارزانی پشتی وەفاتا شێخ ( محمد بارزانی ) .
راستە بەری لدایک بوونا بارزانی نەمر چریسکێن بزاڤ و گاڤێن شۆرەشگێرێن کوردستانی بۆ بەرپاگرنا شۆرەشان ھیڤی و ئۆمێدەک بۆ کوردستانیا درۆستکبوو ، لێ نەشیان ببنە شۆرەشێن نشتیمانی و سەرتاسەری و دەستکەفتێن مەزن تۆمار بکەن ، لێ شۆرەشێن پشتی لدایک بوونا بارزانی نەمر کاریگەریێن مەزنتر ھەبوون و دەنگڤەدانا وان لسەر ئاستێ ھەرێمی و نیڤ دەولەتی زۆر مەزنتر بوو مینا گاڤ و ھەڵویستێن نەمر شێخ عەبدولسەم بارزانی یێن نەتەوی و نشتیمانی و گەھاندنا داخازیێن خەلکێ کوردستانێ بەرامبەر ئمبراتۆریەتا ئۆسمانی و پاشان شۆرەشێن بارزانی یێن ئێکێ و دوویێ ب رێبەریا شێخ ئەحمەد بارزانی و پشکداریا بارزانیێ نەمر دڤان شۆرەشان دا و دیاربوونا وی وەکی رێبەر و فەرماندەکێ سیاسی و لەشکری یێن دووربین و کاریزما و جھێ باوەریا خەلکی، بوونە دەرگەھێن ئاسۆیێن گەش بەرامبەر خەلکێ کوردستانێ ڤەبوون و رێکا بەرەڤ ئازادیێ و بەختەوەریا جڤاکێ کوردستانێ ھاتە ڤاڤارتن .
ئەڤ رێکە لسەر رێبازا بارزانی ب رێبەریا بارزانی نەمر ل ڤاڤارتنێ یا بەردەوام بوو تاکۆ ب دامەزراندنا پارتی دیموکراتی کوردستان لسەر دەستێ ڤی رێبەرێ مەزن و کاریزما ھاتە دامەزراندن و ئاستەنگێن مەزن ھاتنە لادانا مینا لاوازیا ھشیارا نەتەوی و نشتیمانی و نەبوونا ئێکگرتنا سیاسی و رێبەرەکێ جھێ باوەریا پڕانیا خەلکێ کوردستانێ و نەدادوەریا جڤاکی ،
پشتی بەرپاربوونا شۆرەشا مەزنا ئیلۆنێ و تۆمارکرنا داستانێن مەزن بناغێ رێکا ئازادیا کوردستانێ و بەختەوەریا جڤاکی ب پۆلایینی ھاتە دانان و ھەستا نەتەوی و نشتیمانی و باوەریا خەلکێ کوردستانێ ژی ب بزاڤا رزگاریخوازیا کوردستانی بھێزتر و بەرفرەھتر بوو .
ھەتا نھۆ ژی ھەمی سەرکەفتنێن خەلکێ کوردستانێ و بدەستڤەھاتنا دەسکەفتێ، نشتیمانی و نەتەوی لسەر دەستێ بارزانی نەمر و رێبازا بارزانی و پارتی دیمکراتی بوو ، ھەر ل سەرکەفتنا مەزنا یازدێ ئادارا ساڵا ١٩٧٠ ێ یێ و پاشان شۆرەشا گۆلانا پێشکەفتنخواز و داستانێن وێ و دامەزراندنا بەرەیێ کوردستانی و رێبەری و رێکخستنا سەرھەلدانا پیرۆزا سالا ١٩٩١ ێ و پێشنیارا ھەلبژاردنێن گشتی ل کوردستانێ ب رەنگەکێ دیموکراسی و ئازادانە ژلایێ سەرۆک بارزانی کۆ پەرلەمان و حکومەت و ئازادی و ئاڤەدانی و پێشڤەچوون و پێشکەفتن بوونە بەرھەم ، ھەتا دگەھیتە سەرکەفتنێن مەزن بسەر مەزنترین گرۆپێ تیرۆرستیا جیھانی ( داعش ) و شکاندنا پیلانا ھەرێمی یا سیاسی و لەشکری بۆ ژناڤبرنا قەوارێ ھەرێما کوردستانێ پشتی خیانەتا ( ١٦ ) ێ ئکتۆبەرا سالا ٢٠١٧ .
ئەڤ ھەمی داستان و سەرکەفتن و خۆڕاگریا ب رێبەریا بارزانی نەمر و رێبەر و رێژەپێدەرێن رێبازا بارزانی یێن پشتی وی رێکا ئازادیا کوردستانێ لسەر ئاراستەیەکێ گەش و راست ڤەژاندی و بەختەوەریا جڤاکێ کوردستانێ دابین کری یە و یێ، بەردەوامن ل پاراستنا دەسکەفتێن خەلکێ کوردستانێ و قەوارێ ھەرێمێ کۆ مەزنترین دەسکەفت و ھیڤیا پاشەرۆژێ یە .
ئەڤە ھەمی ژی ڤەرێژا رۆژا ١٤ ێ ئادارێ نە رۆژا لدایک بوونا رێبەر و سەروەر و پێشەوایێ گەلێ کور مەلا مستەفایێ بارزانی .