هەمی پارت و رێکخستن ل چەندین ئۆرگانێن تایبەت دهێنە پێکئینان و کۆنگرە ئەرک و شێواز و دەستهەڵاتێن وان دیار دکەت و رێکدێخیت .
پارتی دیموکراتی کوردستان ژی خودان چەندین ئۆرگانە ، ژبووی هەر پارت و رێکخستنەکێ گرنگە ڤان ئۆرگانا گرێدانەکا باش و موکۆم دگەل ئێک هەبیت داکۆ بشێن فەرمان و رێنمایی یێن سەرکردایەتیێ بگەهیننە ئۆرگانێن خوارێ و بهێنە بجهــ ئینان .
ئۆرگانێن خوارێ ژی دەنگ و داخازی و پێتڤی و پێشنیارێن خەلک و ئەندام و جەماوەرێ خۆ بگەهینتە سەرکردایەتیێ و رێکێن چارەسەریێ و پێتڤیاتا دەست نیشان بکەن .

بسازیکرنا ئۆرگانێن حزب و رێکخستنا پێتڤیەکا فەرە و ئەگەرێ لێکنێزیک کرنا جەماوەری و دەستهەڵاتێ یە . ئەڤ بسازیکرنا ئۆرگانا ژی ئەرکێ کۆنگرێ و لێژنەیێن ئامادەکاریێن وێنە .


پێتڤی یە کۆنگرێ چاردێ یێ پارتی دیموکراتی کوردستان و لێژنا ئامادەکاریا وێ گرنگیەکا باش ب بابەتێ بسازیترکرنا ئۆرگانێن پارتی بدەت و بێخیتە دناڤ خال و بەندنێن پەیڕە و پرۆگرامی و پشتی کۆنگرێ ژی خەلک و جەماوەر و کادر و ئەندامێن پارتی ڤان خالا پڕاکتیک ببینن ، ئەز بێژم خەلک و جەماوەرێ چونکی پارتی دیموکراتی کوردستان پارتیا خەلک و جەماوەرێ کوردستانێ یە ، نەک تنێ ئەندام و لایەنگرێن پارتی ، ئەگەر ئۆرگانێن پارتی وەسا بهێنە بسازیکرن کۆ خالا پێکگەهشتنا جەماوەری و سەرکردایەتیا پارتی بۆ گەهشتنا دەنگێ خەلکی و کادر و ئەندامێن قاعیدا پارتی ، ئاکۆ ئۆرگانێن خوارێ ب پراکتیک نوونەرێن سەرکردایەتیا پارتی نە ، خەلکەکێ نە پارتی ژی دێ ل ئۆرگانێن خوارێ یێن پارتی کۆم بیت و سەنگەکا زێدەتر دەنە ڤان ئۆرگانا و بینە ئەگەرێ زیدەتر بوونا جەماوەرێ پارتی .

ب ئاوایەکێ دیتر دبێژین پێتڤی یە کۆنگرێ چاردێ یێ پارتی بریارێ بدەت و بسەلمینیت کۆ ئۆرگانێن خوارێ دەنگ و نوونەرێن سەرکردایەتیێ نە و هەمی داخازی و پێشنیار درێکا وانرا دگەهنە سەرکردایەتێ ، نەک درێکا کەسایەتیا و رۆنساید بگەهنە سەرکردایەتیێ و داخازیێن خۆ بگەهینن و بریارێن پێتڤی و تایبەت دەرێخن بێ ئاگاداریا ئۆرگانێن خوارێ . کۆ هەتا نهۆ ئەڤ شێوازە هەبوویە و کاریگەریەکا نەرێنی لسەر رێکخستن و ئۆرگانێن خوارێ کریە .

ڕامانا ڤێ چەندێ ئەو نیە سەرکردایەتیا پارتی ئۆرگانێن خۆ یێن خوارێ فەرامۆش کرنە و بویتەی پێ نادەت و دەرگەهــ بۆ کەسایەتیا و رێکێن تایبەت ڤەکرینە ، لێ ئەڤ دیاردە هەیە و زۆر جاران دەرگەهێن سەرکردایەتیێ بۆ ئۆرگانێن خوارێ یان نوینەرێن وان نەهاتینە ڤەرکرن .

ئەز دبینم بهێزکرنا ئۆرگانێن خوارێ ب ساناهیترین رێکە بۆ رازیکرنا خەلکی ل پارتی و چارەسەرکرنا ئاریشە و گلە و گازندێن خەلکی و کادر و ئەندامان .

ئەرکێ کۆنگرێ یە پێداچوونەڤێ ب خالێن لاواز و نەرێنی بکەت و بریار و رێکێن چارەسەریێ لسەر بدەت ، کۆنگرێ چاردێ یێ پارتی دەرفەتەکا زێرینە بۆ چارەسەرکرنا ڤێ ئاریشێ بۆ بهێزترکرنا ئۆرگانێن خوارێ یێن کۆ فاکتەرێ بهێزکرنا وێ یە لسەر ئاستێ جەماوەری .
زۆربەیا کادرێن پارتێ لبەندا رێکارێن بڤی ئاوایی نە .