مەبەست ل سلێمانیێ باژارێ سلێمایێ و دەور و بەرن ئانکۆ سنوورێ بن دەسهەڵاتا ئێکەتیا نشتیمانی، دەمێ چەند ساڵایە لبن درۆشمێن جودا جودا خۆنیشاندان دژی حکومەتا هەرێما کوردستانێ و پارتی دیموکراتی کوردستان دهێنە کرن، جار بناڤێ دژی گەندەلیێ و داخازیا ئەنجامدانا چاکسازیا، جار ژی دژی سیستەمێ سەرۆکایەتیێ و ...هتد
د ڤان خۆنیشانداناندا هەردەم پارتی ئارمانجا سەرەکی بوویە ، چ سۆتنا بارەگایێن وێ یان ژی بلندکرنا درۆشمێن دوژمنکارانە و تاوانبارکرنا وێ ب گەندەلیێ و قورخکرنا بازاری و خۆ سەپاندنێ ، گەهشتیە وی ئاستی پارتی و سەرکردایەتیا وێ ب پارتیەکا شوفینی و دکتاتۆری نیشا خەلکی بدەن ...!

لڤان خۆنیشاندانێن ب پیلان یێن نهۆ دههێنە کرن دیسا پارتی ئارمانج و نیشانا سەرەکی یە ، چونکی هەوڵێن وان ئەون هەمی بارەگایێن پارتی ل وان دەڤەرا بسۆژن ، دگەل ئاڤاهیێن فەرمانگەهێن میری چونکی تنێ پارتی ب دەسهەڵاتدارا حکومەتا هەرێما کوردستانێ دبینن و هەمی گەندەڵی و نە دادوەریا ل هەرێمێ هەی پارتی دکەنە ئەگەر .

هەرچەندە خۆنیشاندانێن ڤێ جارێ جوداهی دگەل یێن بەرێ هەیە ژلایێ دارشتنا پیلانێ ژلایێ وەڵاتەکێ هەرێمی و راکێشانا رێکخستن و چەکدارێن پەکەکێ و نەئاشکراکرنا رێکخەرێن وان ، لێ دیارە کۆ ڤێ جارێ باڵێ پتریا دەسهەڵاتا ئێکەتیێ د دەستی دا ئەکتەرێن سەرەکیێن پیلانێ نە، رەوشا ئابووری یا هەرێمێ و پەیوەندیێن حکومەتا هەرێمێ بدەلیڤە دیت بۆ رازیکرنا سپونسەرێن خۆ و بدەستڤەئینانا هندەک سۆپاسنامە و پاراشتێن مادی ، داکۆ پێگەهێ خۆ دناڤ ئێکەتیێ دا موکۆمتر بکەت و د راگەهاندنێ و سۆشیال میدیایێ دا ببێژن خەلکی ئەڤ حکومەتە نەڤێت ، لەما هندەک هێزێن ئێمناهیێ و لەشکری بۆ بەرژەوەندێن خۆ بکار ئینان بۆ کوشتنا خەلکی و سۆتنا بارەگایێن پارتی ..!

ئەگەر خەلکێ وان دەڤەرا ڕاست بێژن چاکسازی و دادوەری دڤێت بلا کەرەم کەن بڕەنگەکێ ئاشتیانە و شارستانی بێنە سەر جادا و داخازیێن خۆ ڕابگەهینن ، بلا رەوشەنبیریا خۆ بۆ بەرژەوەندا گشتی بمەزێخن ، دز و گەندەڵکارا بێ جوداهی دەست نیشان بکەن و هەوڵ بدەن کەس و لایەنێن کار بۆ لاوازکرنا پێگەهێ هەرێما کوردستانێ ژلایێ سیاسی و ئابووری دکەن بۆ خەلکی ب زەڵالی دیار بکەن ،
بلا پشتەڤانیا حکومەتا هەرێما کوردستانێ بکەن بۆ دەربازکرنا ڤێ قەیرانا دەستکرد درێکا کۆمکرنا داهاتێ دەروازێن سنووری و ناڤخۆیی د خەزینا حکومەتێ دا و بجهئینانا پرۆژێ چاکسازی ،
ئەگەر چاکسازی بڤێن بلا بەرێ خۆنیشاندەرێن ئاشتیانە بدەنە تەڤایا دەروازێن سنووری و هەمی دەرگەهێن وان بگرن و داخاز بکەن نوونەرێن خەلکی ب شەڤ و رۆژ چاڤدێریا ڤان دەروازا بکەن و و دەستێن کەس و لایەنێن قاچاغچیاتیێ لێ دکەن و هێزا خۆ لسەر سەپاندی ببڕن ، نەک فەرمانێن وان بجهــ بینن ..!
ئەگەر چاکسازی بڤێن بلا برەنگەکێ ئاشتیانا دەرگەهێن وان سازیێن پتریا داهاتی لێ کۆم دبیت بگرن و لسەر حکومەتێ بسەپینن راستیا داهاتێ وان ئاشکرا بکەن .

ئەگەر چاکسازی بڤێن بلا لسەر حکومەتێ بسەپینن مۆچەیێن خەلکی لدیف یاسایا چاکسازیێ و بایۆمەتریێ دابەش بکەن ،

ئەگەر خۆنیشاندانێن ئاشتیانە بڤی ڕەنگی بهێنە کرن ئەز باوەرم دێ بنە خۆنیشاندانێن سەرتاسەری و بەرهەمدار ، خەلک دێ مفادار بیت، و حکومەت ژی ژلایێ سیاسی دێ بهێزتر کەڤیت و قەیرانا ئابووری ژی دێ چارەسەر بیت .
بڤی ڕەنکی ئالیێن سیاسی یێن چاکسازخواز و موزایدچی دێ دیار بن و دەستێن تێکدەر و کۆدەتا چی ژی دێ هێنە بڕین .
نەک بناڤێ خۆنیشاندانا خوینا خەلکەکێ بێ گۆنەهــ بڕێژن و شیرازێ جڤاکێ برایانە یێ خەلکێ کوردستانێ تێک بدەن و مەرامێن وەڵاتێن داگیرکار بجهــ بینن .
پێتڤی یە خەلکێ هشیار و رەوشەنبیر و وەڵاتپەروەرێن کوردستانێ کار لسەر پاراستنا قەوارێ هەرێما کوردستانێ بکەن و پیلان و خەونێن وەڵاتێن داگیرکار و ئالیێن تێکدەرێن کوردستانێ ژناڤ ببەن .