هەر خۆنیشاندانەکا ئاشتیانە بۆ گەهاندنا داخازیێن خۆ گاڤەکا رەوا و شارستانی یە ،
لێ پێتڤی یە خۆنیشاندانا رێکارێن خۆ یێن یاسایی و ئاسایی هەبن، وەک مەبەستێن دیارکری ، جهێ دیارکری ، سەرپەرشتێن دیارکری ، دەمێ دیارکری دگەل مۆهلەتا فەرمی .
هەر خۆنیشاندانەکا ئەڤ مەرجە تێدا نەبن خۆنیشاندانەکا نەیاسایی یە و دێ بەرەڤ ئاقارێن خراب و کارێن تێکدەرانە چن .
ئەڤا نهۆ ل سنوورێ سلێمانیێ و هەڵەبجە و دەورو بەر چێدبیت بناڤێ خۆنیشاندانێن مافخواز و داخازکارێن بەردەوامیا مۆچەی دبنەڕەت دا نە خۆنیشاندانن ، نەژی مافخوازن ..!
بەلکی هاندەرێن گرۆپەکێ مافیایی و تیرۆرستن ب پیلان و پشتەڤانیا وەڵاتێن هەرێمی و هندەک کوردێن کرێگرتی و دیڤەلانکێن داگیرکارا .
چەوا ئەڤ خۆنیشاندانە دهێنە ئەنجامدان ..؟ ئەڤ پسیارە پێتڤی ب بەرسڤدانێ یە ، چونکی خەلکەکێ هەی لدیڤ وان بانگەوازی و ئاگاداریێن ل هندەک کەناڵێن ڕاگەهاندێ و سۆشیال میدیایێ دهێنە بەڵاڤکرن ، کۆ خۆنیشاندانێن داخایێن مۆچەی نە ، د رژیێنە سەر جادە و کۆڵانا ، لێ ب نەپەنی پیلانێن رێکخستی بۆ لدەست دانا مافێن وان خۆنیشاندەرا هاتینە دارشتن ...! ئانکۆ خۆ نیشاندانێن وان ژبووی لدەست دانا مافێن وانە..!
چونکی پشکداریا چەکدار و لایەنگرێن پەکەکێ لڤان خۆنیشاندانا بجهــ ئینانا پیلان و ئەجندایێن وەڵاتەکێ هەرێمی و وان میلیشیانێن چەکدارێن عیراقی یە ئەوێن کونترۆلا سازیێن دەولەتا عیراقێ کری ژبووی بجهــئینانا هەمان سیناریۆیا کەرکووک پێ داگیرکری و دڤێت بۆ بەرژەوەندێن وی وەڵاتی و وان گرۆپێن چەکدار هەرێما کوردستانێ مینا سووریا وێران بکەن و هەرێما کوردستانێ وەکی قەوارەیەکێ سیاسی و ئیداری نەمینیت ، دڤێت دەسپێکا ڤێ سیناریۆیێ ل سلێمانیێ دەسپێ بکەن ،
ئەڤە ژی پسیارەکا دیترە ، بۆچی ل سلێمانیێ ..؟
چونکی دەمەکێ درێژە حکومەتێن شیعەگەریێن عیراقێ کار لسەر ڤێ چەندێ دکەن ، بۆ رێکخۆشکرنێ مۆچە و بۆدچێ هەرێما کوردستانێ بڕی یە و پێگەهێ هەرێما کوردستانێ ل بەغدا لاواز کریە ، و لایەنگیری و پشتەڤانی ژی ژلایێ گرۆپێ دەسهەڵاتدارێن ئێکەتیا نشتیمانی ب سەرۆکایەتیا هەڤسەرۆکێ وێ لاهۆر شێخ جەنگی بۆ ڤێ چەندێ گەرەنتی کریە ،
لەوما دەمێ چەند ساڵایە دژایەتیا حکومەتا هەرێما کوردستانێ دکەن درێکا ل بەغدا ب پشتەڤانیا حەشدا شەعبی بۆ بڕینا مۆچە و بۆدجێ هەرێمێ ، یان خەرجکرنا مۆچەی ڕاستەوخوو ژلایێ بەغدا ، هەتا گەهشتە هەوڵێن ڤەقەتاندنا سلێمانیێ ل هەرێما کوردستانێ و تێکدانا رێکەفتنێن لێکتێگەهشتنێ دناڤبەرا بەغدا و هەولێرێ ، لناڤ هەرێمێ ژی ب ئاشکرا دژایەتیا گاڤ و هەولێن حکومەتێ دکەن ئەو حکومەتا حزبا وان پشکەکا سەرەکیا پێکئینانا وێ، وەکی رێگریکرن ل بجهــ ئینانا پرۆژە و یاسایا چاکسازیێ و کونترۆلکرنا داهاتێ دەروازێن سنووری و ناڤخۆیی و هەولێدانێن وان بۆ تێکدانا ئارامی و سەقامگیریا کوردستانێ ، دووماهی هەوڵا ڤی گرۆپێ ئێکەتیێ پشتەڤانیا چەکدار و رێکخستنێن پەکەکێ بوو داکۆ دژی حکومەتا هەرێما کوردستانێ بکاربینن و سەردابرنا خەلکەکی بۆ ئەنجامدانا خۆنیشاندانان بناڤ داخازیا مۆچەی ، دیار بوو خۆنیشاندان بەرەڤ چ ئاقار برن ب تێکەلبوونا رێکخستنێن پەکەکێ و هژمارەکا عەرەبان بۆ سۆتنا ئاڤاهیێن فەرمانگەهێن میری و بارەگایێن حزبا بتایبەت یێن پارتی دیموکراتی کوردستان و کوشتن و بریندارکرنا خەلکی و پێشمەرگەهان ، گەهشتنە وی ئاستی لایەنگرێن وی ل هێزێن ئێمناهیێ و پێشمەرگەهی بەرێ چەکێن خۆ بدەنە خەلکی . ئەڤە هەمی پیلانا وەڵاتەکێ هەرێمیێ داگیرکارە دا سلێمایێ و هەرێمێ مینا باژارێ حەلەبێ وێران بکەن و دەسهەڵات د دەستێ حکومەتا هەرێمێ دا نەمینیت و پرۆژێ وی وەڵاتی یێ چەندین ساڵە سەربگریت .
بۆچی خۆنیشاندان و بۆچی لڤی دەمی..؟
چونکی حکومەتا هەرێما کوردستانێ حکومەتا وەڵاتیایە و دڤێت دەسهەڵاتا وێ یا یاسایی دەسهەڵاتەکا سەرتاسەری بیت و بەرەڤ بهێزبوونا سەروەریا یاسایێ و ئەنجامدانا چاکسازیا دچیت ، ئێمناهی و سەقامگیری ژی رۆر بۆ رۆژ بهێزتر دبیت و رێگریێ ل مایتێکرنێن دەرەکی دگریت ، ئانکۆ بریار و سیاسەتا وێ یێن خۆماڵی نە ، لسەر ئاستێ سیاسی و پەیوەندیێن لگەل حکومەتا فیدرال بەرەڤ باشبوونێ و لێکتێگەهشتنێ دچیت بۆ چارەکرنا پرسێن دناڤبەرا واندا بتایبەت بۆدجە و مۆچە و دەڤەرێن سنوورێ ماددێ 140 بتایبەت کەرکووک و شنگال لسەر ئاستێ نیڤ دەولەتی ژی پەیوەندی خورتر دبن ، لسەر ئاستێ ناڤخۆیی ژی پێگەهێ جەماوەریێ پارتی بەردەوام ل زێدەبوونێ یە ، چونکی پارتی پارێزە و داکۆکیکارا مافێن نەتەوی و نشتیمانی یە و فاکتەرێ سەقامگیریێ ، ئەڤ هەمی ئەگەرە نە دبەرژەوەندا وەڵاتێ ئیرانێ دا نەژی د بەرژەوەندا وی گرۆپێ باڵا دەست دناڤ ئێکەتیێ دا ، لەوما ئیرانێ گڤاشتنێن خۆ تۆنترکرن لسەر تاگرێن خۆ وەکی پەکەکە و ئەوێن دی بۆ تێکدانا رەوشا کوردستانێ و لاوازکرنا پێگەهێ وێ ، چونکی بهێزبوونا کوردستانێ ب سەرکردایەتیا پارتی ، ئانکۆ سەرنەگرتنا پرۆژە و پیلانێن ئیرانێ ل دەڤەرێ .
ڕەنگە هەڵویستێن توندێن ئەمریکا بەرامبەر ئیرانێ و دەستبکاربوونا ئیدارا نوو یا ئەمریکا گرێدانەک بڤێ رەوشا سلێمانیێ هەبیت ، چونکی ئیرانێ دبیت ئیدارا نوو یا ئەمریکا پشتەڤانیەکا باشتر ل هەرێما کوردستانێ بکەت ، لێ ئەز باوەرم ب سیاسەتا لێزانینا سەرکردایەتیا سیاسی یا کوردستانێ و حکومەتا هەرێمێ و پارت و ئالیێن نشتیمانی و نشتیمان پەروەرێن دناڤ ئێکەتیێ دا و خەلکێ وەڵات پارێز و رەوشەنبیریێ سلێمانیێ و دەور و بەر پێکڤە دێ ڤێ پیلانێ ژی هەڵوەشینن ، چونکی بسەرگرتنا وێ زەرەر مەندێن سەرەکی دێ ئێکەی و خەلکێ کوردستانێ وان دەڤەرا بیت و رێکێ نادەت خۆنیشاندان ببنە کۆدەتایەکا وێرانکەر کۆ دەسکەفتێن خەلکێ کوردستانێ و قەوارێ هەرێمێ بکەڤیتە د مەترسیێ دا و بەرەڤ ناڤچوونێ ببەن . چونکی بەرهەمێ خوین و ڕەنج و خەباتێ هەمی خەلکێ کوردستانێ یە و ئۆمێدا پارچێن دیترە ژی .