- کورد نەزانە؟
- کورد ساویلکەیە؟
- کورد ب سوز «عاتیفە» بریارێ ددەت، نەک بە عەقل و حیکمەت؟
- کورد دوست و دوژمنێز خوە لێک جودا ناکەت؟
- کورد هەرگاف بویە قوربانی پیلانێن دەوروبەرێ خوە؟
- کورد هەرگاف بە ناڤێ ئایینی هاتیە سەردابرن و بکارئینان؟
- کورد زێدەتر سەدەیەکێ یە دناف بازنەکیدا دزڤریت و قوربانیێ ددەت بێ کو بکاریت خوە لێ قورتال بکەت؟
- کورد زێدەتر ل سەدەیەکێ یە نەکاریە ل شاشیێت خوە فێر ببیت و خوە کوم بکەت؟
- ئەگەر چنە بو ڤێ بەرزە بوونا کورد تێکەفتی و تێدا نقوم بوی؟
ب ساناهی نینە بەرسڤەکا راست و باوەر پێکری بو ڤان هەموو پرسیارا هەبیت، ل بەر ئالوزی یا رەوشا کوردان بخو.
هوکار د زورن، لێ هوکارێن سەرەکی ب سێ خالان دهێنە دیتن ..
١- ل سەدێ بیستێ دا، وڵاتێن یاریکەرێن سەرەکی و بریار بدەست، غەدرەکا مەزن ل کوردان کر، کورد بوونە قوربانی بەرژەوەندیێن وانا، پارچە کرنا کوردستانێ و بزاڤێن گوهرینا دیموغرافی دربەکا مەزن بو ب کوردانکەفت.
٢- سیاسەتا وان ولاتێن داگیرکەر یێن کوردستان بسەردا هاتیە پارڤە کرن، کو هەر ئێک ل وانا ب رەنگەکێ جودا سیاسەتا سەرکوت کرن و بوژاندنەڤێ ب درەندەترین رەنگ هەمبەری کوردان بجێ دئینا.
٣- هوکارێ هەرە سەرەکی دناف کوردان بخوەدا، هەبوونا توڤێ خیانەتێ یە، د تەڤایا قوناغێن خەباتا نەتەوەیی دا، کورد بوینە قوربانی خیانەتەکا نافخویی، نزیکترین بەلگە خیانەتا ١٦ ئوکتوبەرێ یە.
ئەگەر کورد د سەدێ بیسێ دا، د ئاستێ پێدڤی دا نەبوبن ل ئالیێ هزری و سیاسی کو بکارن خوە بگونجینن دگەل خەباتا چەکدارێ د ئالیێ سیاسی ژی ڤە بەرگریێ ل مافێن خوە بکەن و ببن یاریکەرێن بهێز.
لێ نها و د ڤێ قوناغا هەرێما کوردستانێ تێدا دبوریت، ب هەموو ئالیەکی ڤە کورد شیاینە خوە بهێز بکەن وببن جەمسەرەکێ بریر دانێ ل دەڤەرێ و ل سەر ئاستێ جیهنێ ژی وەکو ولاتەکێ سەربخو دهێتە دیتن.
لێ مخابن دگەل بدەست ڤە ئینانا تاپویا سەرخوەبونێ درێکا ریفراندومێ را، جارەک دن کورد دووجاری خیانەتەکا نافخویی بوون کو بویە هوکاریکێ لدەست دانا پسکەکا مەزن ل ئاخا کوردستانێ.
ئان کو بابەت نە سادەیی و نەگەهینا هزری یا کوردی یە کو بوبتە ئەگەر ژبوی مانەڤا کوردان بێ دەولەت.
بەلکو قوناغ ب قوناغ دگەل بەرفرە بوونا زانستێن سیاسی ل سەر ئاستێ جیهانی، ب هەمان ئاست هزرا خیانەتێ بەرفرە بویە و زێدەتر کەفتیە د خزمەتا ئەجندێن جوراوجورێن دوژمنان.
ل ١٦ ئوکتوبەرێ وەکو پیلانەکا بەرفرەها ئیقلیمی، هەتا دگەهیتە ئایدیێن جودا و بکارئینانا هزرێن وانا دناف جڤاکێ کوردی دا پێخەمەت سەردابرن و دویر ئێخستنا وانا ل پرسا نەتەوەیی و هەروەها بکارئینانا وانا ل دژی دوزا کوردی و بەروڤاژی خزمەتکرنا پیلانێن دوژمانان.
ئەو هەمی ناڤ و ئایدیێن گوماناوی ئەوێن ئەڤرو کەفتینە د کورەپانا سیاسی یا هەرێما کوردستانێ دا، پشکەکن ل توڤێ خیانەتێ و پیلانا دوژمانان.
توڤێ خیانەتێ هوکارێ وێ بەرتەوازەیێ بوویە یاکەفتیە دناف مالا کوردی دا، کو کورد نەشیایە خو کوم بکەت وئێکگرتی بیت و ب هێزەکا مەزن بەرگریەکا ل خوە بکەت.
لەوما دڤێ قوناغێ دا، ئەرکێ هەرە مەزن بنبر کرنا توڤێ خیانەتێ یە لنافخویێ کوردستانێ و پاقژ کرنا رێگا سەرخوەبونێ یە ل لوغمێن وانا.