لە جەنابی وەزیر، یان له ویژدانی جەنابی وەزیر بپرسم؟
شاد حمەامین علی
بڵاوبوونەوەی ڤایرۆسی کۆرۆنا خوێندنی هەردوو وەزارەتی پەروەردەو وەزارەتی خوێندنی باڵای ڕاگرت، چونکە ئەگەر خوێندنی قوتابخانە و زانکۆکانی هەرێم بەردەوام بووایە، ئەوا بارودۆخی تەندروستی لەدەست دەردەچوو. ئێستا لەشوێنی ئاماری تووشبووان بە ڤایرۆسی کۆرۆنا هەمان ئامار ڕێژەی مردن دەبوو.
ئەوەی جێگای هەڵوێستە لەسەر وەرگرتنە، ئه‌وه‌يه كه قوتابیانی زانکۆ و پەیمانگاکان نیگەرانن له‌وه‌ى كه ئایا پێدانی کرێی خوێندنی کۆرسی دووەم بۆچی و لەپای چی؟ لە کاتێکدا قوتابیان دوای کۆرسی یەکەمی خوێندن نەگەڕاونەتەوە ناو هوڵەکانی خوێندن، لانیکەم دەبێت وەزارەتی خوێندنی باڵا بارودۆخی ئێستای قوتابیانی لەبەرچاو بووایە، کە ئایا قوتابیانی زانکۆ و پەیمانگاکان کرێی خوێندنی کۆرسێک کە نە وانەی تێدا خوێندراوە، نە قوتابیان دەوامیان تێدا کردووە، بە چ هۆکارێک بدەن.
من لێرەوە لە وەزیری خوێندنی باڵا ناپرسم، بەڵکو لە ویژدانی وەزیری خوێندنی باڵا دەپرسم: ئایا بە چ پێوەرێک و چۆن قوتابیان کرێی خوێندنی ساڵێک بدەن لە کاتێکدا خێزانی ئەو قوتابیانە بەهۆی بارودۆخی ئابووريی هەرێم و دواکەوتنی مووچەو هەروەها ڕاگرتنی کارو کەسابەتی خێزانیەکانیان کرێی خوێندنی کۆرسێکیان لێ وەربگرن، ئايا ویژدانتان قبوڵ دەکات؟ لانیکەم دەبوو پێش ئەوەی قوتابی خوێندنی پارالێل و ئێواران پێشنیاریان بکردایە لە لێخۆشبوونی کرێی کۆرسێک ئێوە وەک وەزارەت داشکاندنتان بە ڕێژەیەک بۆ ئەو قوتابیانە بکردایە.
لە ئێستادا قوتابیانی خوێندنی پارالێل و ئێواران لە دۆخێکی ناجێگیردان، کە ئایا نمرەکانیان چۆن بەدەست بهێننەوە، لەکاتێکدا بڕیاری زانکۆکان بەو جۆرە بێت، ئەگەر قوتابی هەردوو کرێی کۆرسی یەکەم و دوەمی ڕادەست نەکردبێت، ئەوا نمرەی پێ نادرێتەوە؟
پێویستە لیژنەی پەروەردە و خوێندنی باڵا لە پەرلەمانی کوردستان لەسەر بابەتێکی لەو جۆرە وەزارەتی خوێندنی باڵا ئاگار بکاته‌وه، کە دەبێت کرێی کۆرسی دوەمی خوێندن لە قوتابیانی زانکۆ و پەیمانگاکان وەر نەگیردرێت، زانکۆکانیش پێشنیار بکەن بۆ وەزارەت و کار بکەن لە سەر پرسێک کە پەیوەستە بە قوتابیان و ساڵێکی خوێندنیان.
