کورد دەڵێ مریشک خۆی خۆڵ بەسەر خۆی نەکات کەس ناتوانێ خۆڵی بەسەر بکات، ئێمەی کوردیش دەیان ساڵە پەرتەوازەیی و ناتەبایی سیاسی ناوخۆمان کردۆتە خۆڵی مەرگ و بەدەستی خۆمان بەسەر سەری خۆمانیدا کردووە، لەوەتەی من بە بیرم دێ و بە تایبەتیش لە ساڵی (١٩٨٥)وە کە لەناو رووداوەکاندا ژیاوم، پەرتەوازەیی و ناتەباییمان چاندووە و مەرگ و کارەستمان دروەتەوە، جگە لە کۆڕەوەکەی ساڵی (١٩٩١) نەمدی رۆژێک وەک ئەوەی خەباتی رزگاری نیشتیمانی و بەرەنگار بوونەوەی داگیرکارانی کوردستان لێی خواستووین یەکگرتوو بووبین، ئەگەر ناوە ناوەش بانگەشەی یەکگرتوویی کرابێ لەملاولاوە ئەم باڵ و ئەو دەستە و ئەو گرووپ مینگەمینگی سیاسییان کردووە.
دەبێ لە کۆڕەوەکەی ساڵی (١٩٩١)وە تێبگەین کە یەکگرتوویی بۆ کورد چەند گرنگ و بەهادارە، کۆڕەوەکە کارەسات بوو، بەڵام لەبەر ئەوەی دوور لە هەراوزەنای حزبی و کوردانە و بە یەکگرتوویی کۆڕەومان کرد، نەک هەر سەرکەوتوو بووین، بەڵکو ئاراستەی راپەڕینیشی لە شکستەوە گۆڕی بۆ سەرکەوتن.
هێشتا ماون و زۆریشن ئەوانەی پەندیان لە پەرتەوازەیی و ناتەبایی ناوماڵی کورد وەرنەگرتووە، لە کاتێکدا پەرتەوازەیی و ناتەبایی ناوماڵی کورد جگە لە خزمەتکردن بە سیاسەتی داگیرخوازی داگیرکارنی کوردستان و درێژەدان بە چەوسانەوەی کورد هیچ لێکدانەوەیەکی تر هەڵناگرێ، ئەگەر ئەو پەرتەوازەیی و ناتەباییەش نەبایە ئێستا کورد لە قۆناغێکی تردا دەبوو، بە تایبەتیش لە ئێستادا کە لە درووست بوونی دەوڵەتی عێراقەوە ئەو دەوڵەتە بە زۆر بەیەکەوە لکێنراوە وەک ئێستا لاواز و پەرپووت نەبووە، بەڵام ئەوە پەرتەوازەیی و ناتەبایی ناوماڵی کوردە گیان بەبەر دەوڵەتی مردووی عێراقدا دەکاتەوە و باری لاری بەغدای عرووبە و دژە کورد راست دەکاتەوە.