ئەگەر کەسێک خۆی لە هەموو ئیشێک هەڵقورتێنێ لە کوردریدا پێی دەڵێن: فڵانە کەس لە هەموو (دیزان ئەسکوێ)یە، ئەو پەندە کوردیە رێک بەسەرعەلی پاپیری ئەمیری کۆمەڵی ئیسلامیدا ساغ بۆتەوە، فەرموون ئێوە و چەند بەڵگەیەک.
کاتێک باس لە ئیسلام و پتەوکردنی پایەکانی ئیمان دەکرێ، عەلی باپیر ئیمامی شافیعی بە سەپانی خۆی نازانێ.
کە باس دێتە سەر دیموکراتی سوقرات و ئەفلاتون تێشوانی لە پاشەوە ناکەن.
بۆ مەسەلەی مارکسیش وەک خۆی دەڵێ، دوای ئەوەی لە ساڵی ١٩٨٧ لە سەرگەڵو چاوی بە نەوشیروان مستەفا کەوتووە و دینی ئیسلامی بۆ روون کردۆتەوە، بە شێوەیەک مارکس و مارکسی بوونی لەبەر چاوی نەوشیروان مستەفای سکرتێری رێکخراوێکی مارکسی رەش کردووە، کە ناچار بووە بڵێ, وتا (نەوشیروان مستەفا) بڵێ: مامۆستا ئەگەر دینی ئیسلام ئەوابێ، من دەوڵەتێکی ئیسلامیم قبوڵە، پێدەچێ هەر ئەوەش وای لە عەلی باپیر کردبێ کە لە کاتێ بە خاک سپاردنی نەشیروان مستەفا وێنەکەی لەسەر سینگی خۆی دەسووڕاندەوە.
لە کاتی ریفراندۆم پەنجەی خۆی بەرز دەکردەوە و دەیگوت: دەنگم بە بەڵێ داوە، دواییش دەیگوت: ریفراندۆمە سەقەتەکە، دوای ئەوەش لە کەناڵی پەیام دەیگوت: شەریعەتی ئیسلام رێگەی داوە خەڵک بڕیار لە چارەنووسی خۆی بدات.
خۆی سوننەیە و لە شیعەش شیعەتر پابەندی فتوای مەرجەعی ئاخوندەکانی ئێرانە و لە بەغداش هاپەیمان و هاوهەڵوێستی شیعەکانە، کاتێکیش باس لە کوردایەتی دەکرێ کوردێکی عەیار (٢٤)و هەموو ناسیۆنالیستەکانی کورد بە خۆی سەرسام دەکات، لەولاشەوە ئەحمەدی حاجی رەشید و سۆران عومەر وەک دوو شوێنکەوتەی رەسەنی خۆی بەرداونە گیانی کوردایەتی.
لە دنیای سیاسەتدا ئەگەر کەسێک خاوەنی قسە و دەربڕینی خۆی نەبێ پێی دەڵێن: دووڕوو، لە ئیسلامیشدا پێی دەڵێن: مونافیق، بەڵام ئەوەی عەلی باپیر لەوە زیاتر هەڵدەگرێ و دەکرێ پێی بگوترێ هەر رۆژە و روویەک.