مێژوو ئەو راستییەی سەلماندووە کە بارزانی نەمر یەکدەنگی نەتەوەیی و یەکێتی ناوماڵی کوردی بە مەرجی بەهێزی شۆڕش زانیوە و بەهێزی شۆڕشیشی بە خاڵی وەرچەرخان و سەرکەوتنی کورد و گەیشتن بە مافی سەربەخۆیی زانیوە، سەرکەوتنی کورد و گەیشتن بە مافی سەربەخۆییشی بە کۆتایی نەهامەتی و کارەسات و کۆمەڵکوژی کورد زانیوە، لە پێناو یەکدەنگی نەتەوەیی و یەکێتی ناوماڵی کوردیش چی پێویست بێ کردوویەتی و بەردەوام هەوڵی ئەوەی داوە هەموو دەنگ و رەنگە جیاوازەکان لەژێر چەتری کوردایەتی ئاڕاستەی خەبات و بەرگری کردن لە کوردستان بکات، بەوەش زۆر جاران خەونی داگیرکارانی کوردستانی لەبار بردووە، چونکە دوژمنان لە هەموو قۆناغەکاندا بۆ بەدیهێنانی خەونەکەیان پشتیان بە پەرتەوازەیی و ناڕێکی ناوماڵی کورد بەستووە و لەو رێگەیەشەوە سەرکەوتنیان بەدەست هێناوە.
ئەرکی سەرۆک بارزانی لە رابردوودا بوونە چەتر بووە بۆ هەمووان، لە ئێستا و داهاتووشدا بوونە چەترە هەروەک بارزانی نەمر لە هەموو قۆناغەکانی خەباتی رزگاری نیشتیمانیدا چەتر بووە بۆ هەمووان، ئێستاش سەرۆک بارزانی وەک کوڕی بارزانی نەمر و وەک دەرچووی ئەو قۆتابخانەیەی کە بارزانی نەمر کردیە رێبازی بەرەنگاربوونەوەی سیاسەتی داگیرخوازی دوژمنانی کورد، بە ئەرکی خۆی هەستاوە و لە هەموو بوارەکانی سیاسی و شۆڕشگێڕی و کوردپەروەری و کوردایەتیدا هەمان رۆڵی چەتربوونی بارزانی نەمر دەگێڕێ، ئەوەش ئەرکێکی نەتەوەیی و نیشتیمانی دەخاتە سەر شانی هەموو حزب و لایەنە سیاسییەکانی کوردستان کە بۆ کوردپارێزی و وەڵامدانەوەی سیاسەتی پەرتکە و زاڵبەی دوژمنان لە ژێر ئەو چەترەدا کۆ ببنەوە.
خاڵێکیتر کە پێویستە ئاماژەی بۆ بکرێ هەر حزب و لایەنێکی سیاسی پێیوابێ لە دەرەوەی چەتری سەرۆک بارزانی دەتوانێ دەستکەوت بەدەست بێنێ، دەستکەتی حزبییە و دەستکەوتی حزبیش دەستکەوتی کاتییە و چۆن پێی دەدرێ ئەواهاش لێی وەردەگیرێتەوە، زۆر لەو دەستکەوتە پێدراوە کاتیانەشمان بینیون کە نەک کورد سوودی لێ نەبینیون، بەڵکو بۆ خودی حزبەکەش سوودەکە کاتی بووە و بۆ قۆناغێکی دیاریکراو بووە و لە دواییدا حزبەکەی تووشی زیانی گەورە و بەرەو داڕووخانی بردووە، بەڵام بەدەست هێنانی دەستکەوت لە ژێر چەتری سەرۆک بارزانیدا دەستکەوتی نەتەوەیی و نیشتیمانییە و دەستێندرێ و بە هیچ هێزێک لێی وەرناگیرێتەوە.