نەک من.. هیچ کەسێک ناتوانێ وەک ئەوەی هەیە گەورەیی بارزانی نەمر دەربخات، یان ئازایەتی بتوانێ لە ئازایەتی بارزانی نەمر بدوێ، لە شۆڕشگێڕیدا تەنها سەنگەرەکانی بەرگری لە کورد و کوردستان بارزانی نەمر دەیناسن، هیچ خۆڕاگرێک ناتوانێ لە بەرامبەر خۆڕاگری بارزانی نەمر خۆی راگرێ، لە کوردپەروەریشدا تەنها دوژمنان دەیناسن، هەموو ئەو چەمک و زاراوانە خۆیان لە بوونی بارزانی نەمردا دۆزییەوە، کەواتە ئەوە کاری مێژووە و با ئەو کارە بۆ مێژوو بەجێبێڵین.
کاتێک لەسەر گەورەیی بارزانی نەمر لە مانا و مەغزایی گەورەییم پرسی.. گەورەیی بەخۆیدا شکایەوە و گوتی: کاتێک لەگەڵ بارزانی دەدوام وەک ئەوەبوو لە پێدەشتەوە لەگەڵ لوتکە بدوێم.
کاتێک لەسەر ئازایەتی بارزانی نەمر لە ئازایەتی دەپرسی.. ئازایەتی ترس دایدەگرێ و بە ترسەوە دەوێ.
کاتیک لەسەر شۆڕشگێڕی بارزانی نەمر لە شۆڕشگێڕی دەپرسی.. شۆڕشگێڕی بە شەرمەوە پێتدەڵێ: لە من مەپرسە، بڕۆ گەشتێک بەناو شۆڕشەکانی کورددا بکە و تەنها لە سەنگەرەکانی بەرگری لە کورد و کوردستان شتێکت دەست دەکەوێ.
کاتێک لەسەر خۆڕاگری بارزانی نەمر لە خۆڕاگری دەپرسی.. خۆڕاگری پێتدەڵێ: لە بارزانی نەمرەوە خۆم ناسی.
کاتێک لەسەر کوردپەروەری بارزانی لە کوردپەروەری دەپرسی.. کوردپەروەری پێتدەڵێ: تا دەرکەوتنی بارزانی نەمر هەستم بە بوونی خۆم نەکردووە، لەگەڵ دەرکەوتنی بارزانی نەمر منیش لەبەرامبەر دوژمنان و داگیرکارانی کوردستان وەک هێزێک دەرکەوتم و ئەگەر دەتەوێ لە کوردپەروەری بگەی، بڕۆ لە دوژمنان بپرسە هەر ئەوان دەیناسن.