گەورەترین بەڵا و کێشەی مرۆڤ ئەوەیە خۆی لە راستی گوتن ببوێرێ، چونکە بە نەگوتن و شاردنەوەی هەر راستییەک ناڕاستییەک جێگای دەگرێتەوە، بەوەش دەرفەت بۆ چەواشەکاران دەڕەخسێ و رەوتی ئیرهابی فکری وەک دەیەوێ کۆمەڵگا هەڵدەسووڕێنێ، لێرەوە دەمەوێ بێمە سەر بیرخستنەوەی هەندێ لەو پێشبینیە سیاسیانەی سەرۆک بارزانی کە لە قۆناغێکی دیاریکراوی خەباتی رزگاری نیشتیمانیدا پێشبینی کردوون و لە قۆناغێکی دیاریکراوی تردا وەک خۆیان هاتوونەدی.
١ــ لە ساڵی ١٩٨٩و دوای ئەنفال و کیمیاباران و ئەو کارەسەتانەی بەسەر کورد هێنران، سەرۆک بارزانی و مام جەلال بە مەبەستی گەیاندنی ئەو زوڵمەی لە کورد کراوە بە کۆمەڵگەی نێودەوڵەتی سەفەرێکی دەرەوەیان کرد، دوای گەڕانەوەیان پڕوپاگەندەیەکی وا بڵاو کرایەوە کە بەم زووانە دەگەڕێینەوە و سەددام حوسێن رێککەوتنی ١١ی ئازاری ساڵی ١٩٧٠ جێبەجێ دەکات، ئەوە لای من بوو بە پرسیار، شۆڕشی کورد لەوپەڕی بەهێزی و رژێمی بەعس لەوپەڕی لاوازیدا سەددام حوسێن ئامادە نەبوو رێککەوتنی ١١ی ئازار جێبەجێ بکات، تەنانەت لەو پێناوەدا لە ساڵی ١٩٧٥ لە جەزائیر سەروەری عرووبەی خستە ژێرپێی شای ئێران، ئێستا لە شەڕی هەشت ساڵەی عێراق ــ ئێران بە سەرکەوتوویی هاتۆتە دەر و شۆڕشی کوردیشی تا ئاستی نەهێشتنی مەترسی لاواز کردووە، خێرە لە کاتێکی وەهادا کە سەردام حوسێن لە بەرامەبەر هەموو دوژمنوکانی خۆی بە سەرکەوتوو دەزانێ، ئاوا سۆز و بەزەیی سیاسی دەجووڵێ و رێککەوتنی ١١ی ئازار جێبەجێ دەکات؟
دوای ماوەیەک لە گەڕانەوەیان لەگەڵ چەند هەڤاڵێک سەردانی سەرۆک بارزانیمان، لە وەڵامی ئەو پرسیارەی کە رای دەرەوە لەسەر ئەنفال و کیمیاباران و ئەو زوڵمەی لە کورد کراوە و دەکرێ چۆنە؟ سەرۆک بارزانی فەرمووی: رای دەرەوە رەنگدانەوەی ناوخۆیە، ئەوان واتا (وڵاتان) بە دوای بەرژەوەندی خۆیاندا دەگەڕێن، ئەمڕۆش بەرژەوەندیەکانیان لای رژێمی بەعس و سەددام حوسێنە، ئێمە لە ئێستادا ناتوانین گوندێکی خۆمان رزگار بکەیان، چ جای بتوانین بەرژەوەندی بۆ ئەوان دابین بکەین یان بەرژەوەندیەکانیان بپارێزین، دواتر چاوی بە ئێمەدا گێڕا و فەرمووی: بۆیە پێتان دەڵێم: کورد خوا و ئێوەی پێشمەرگەی ماوە، منیش بەڵێن دەدەم لە سەنگەردا لەگەڵتان بمرم و بەجێتان ناهێڵم، هەر لە درێژەی ئەو دانیشتنەدا فەرمووی: یەک راستیش هەیە حەز دەکەم بیزانن، چیا چەندی بەرز بێ شوێنێک هەیە پێی دەگوترێ لوتکە، کاتێ مرۆڤەکان سەر دەکەون هەر یەکە و لە شوێنێک ماندوو دەبێ و دەوەستێ، هەشە دەگاتە لوتکەکە، بەڵام دوای گەیشتنی بە لوتکە بە هەر لایەکدا بڕوات شۆڕ بوونەوەیە، سەددام حوسێنیش لە دیکتاتۆری و کوشتن و خوێن رێژیدا گەیشتۆتە لوتکە و چارەنووسی شۆڕبوونەوەیە، بۆیە دەڵێم: لە ماوەیەکی نزیکدا گۆڕانکاری گەورە لە ناوچەکە روودەدات، ئەوەبوو دوا چەند مانگێک (کوێت)ی داگیر کرد و هەموو رووداوەکان پێچەوانە بوونەوە، لە گێڕانەوەی ئەو بیروەریەدا مەبەستم ئەوەبوو کە بۆ مێژوو بڵێم: پێشبینیەکەی سەرۆک بارزانی وەک خۆی هاتەدی.
٢ــ هەموومان لە بیرمانە کە لە دوای ساڵی ٢٠١٤و بە تایبەتی لە سەردەمی کابینەکەی نوری مالیکی و دواتریش، سەرۆک بارزانی لە لێدوانە ئامۆژگاری ئامێزەکانیدا، زۆر جاران ئاماژەی بۆ هەوڵەکانی دەرکەوتنەوەی دیکتاتۆریەت و گەیاندنی عێراق بە فەوزای سیاسی و ئاشووب و نەهامەتیەکانی ئێستا دەکرد و دەیفەرموو: ئەگەر بڕیار بەدەستانی بەغدا بە خۆیدا نەچێتەوە و بەردەوام بن لەسەر ئەو هەڵوێستانەی ئێستایان، عێراق تووشی گەورەترین بەڵا و نەهامەتی دەکەن، ئێستا ئەگەر لەگەڵ خۆمان و داهاتووی گەلەکەشمان راستگۆ بین، دەبینین عێراقیان بەو دەردە بردووە کە سەرۆک بارزانی چەند ساڵێک بەر لە ئێستا وێنەکەی پیشانی دۆست و دوژمن داوە، ئەوەتا شەڕ کەوتۆتە ناوماڵی شیعە و ئەوانەی ئەوکات گوێیان بە ئامۆژگاریەکانی سەرۆک بارزانی نەدەدا سەرەودەری تێدا ناکەن.
٣ــ دوای گەیشتنی شیعە بە دەسەڵات و گۆڕانی هەڵوێستیان بەرامبەر بە داهاتووی کورد و حکومەتی هەرێم، سەرۆک بارزانی هێنایە سەر ئەو رایەی کە نیەتی شیعە گێڕانەوەی عێراقە بەرەو دیکتاتۆریەت و حوکمی مەزهەبگەرایی، ئەوەش وایکرد وەک یەکەم هەنگاو بۆ رووبەڕوو بوونەوەی ئەو مەترسییە سەرۆک بارزانی ریفراندۆم و گەڕانەوە بۆ دەنگ و بڕیاری خەڵکی کوردستان، بکاتە ئەو چەکەی کە بتوانین لە داهاتوودا وەڵامی ئەگەری دەرکەوتنەوەی ئەو دیکتاتۆریەی پێ بدەینەوە کە خۆی لە باوەشی دیموکراتیدا مەڵاس داوە، لێرەدا دەمەوێ ئەوە بڵێم: سەرۆک بارزانی ئەو پێشبینیەشی وەک هەموو پێشبینیەکانی تر دێتەدی و ئەو رۆژەش نزیکە کە ریفراندۆم دوا خەونی داگیرکاران بزڕێنی و دوا خەون و ئامانجی خەڵکی سەربەخۆخوازی کوردستانیش بێنێتەدی.