بەغدا وەک کارتی گوشار و بە مەبەستی بەهێز کردنەوەی پێگەی عرووبە و لاواز کردنی بەرەی کوردایەتی و سنووردان بۆ دەستکەوت و ئازادیەکانی خەڵکی کوردستان، سیاسەتی بڕینی مووچەی فەرمانبەران و بودجەی حکومەتی هەرێم و برسی کردنی خەڵکی کوردستانی کردە ئەو چەکەی هێزە سەربەخۆخوازەکانی کوردستانی پێ دەستبەرداری سەربەخۆیی بکات، وەک پاڵپشتی و پشتیوانی ئەو سیاسەتە و لاواز کردنی بەرەی سەربەخۆیی و بڵاو کردنەوەی دڵەڕاوکێ و هاندانی شەقامی کوردی دژ بە سەربەخۆخوازان، هەندێ کەس و لایەن و پەرلەمانتاری کورد لە ئەنجومەنی نوێنەرانی عێراق هەقیان بە سیاسەتی مووچە بڕین و برسی کردنی خەڵکی کوردستان دەداو، حکومەتی هەرێمیان بەوە تاوانبار دەکرد کە لەگەڵ بەغدا رێکناکەوێ و نەوت رادەست ناکات، تەنانەت لەناو پەرلەمانی بەغدا و لە کەناڵەکانی راگەیاندنیش بە مەبەستی هاندانی شۆڤێنیەکانی ناو پەرلەمان و دەرەوەی پەرلەمان و شەقامی عەرەبی بەردەوام ئەو پرسەیان دەورووژاند.
ئێستا وەک دیارە بەغدا و هەولێر لە رێککەوتن نزیک دەبنەوە، ئەو رێککەوتنەش هەم شۆڤێنیەکانی عەرەب و هەم کەس و لایەن و پەرلەمانتارە عێراقچییەکانی کورد بەرەو نابووتی دەبا و بەڕەی هاوپەیمانێتیان لە بن پێ دەردێنێ، بۆیە هیچ دوور نییە لەمەولا مەوجی موزایەدەی سیاسی بگۆڕن و دژی ئەو رێککەوتنە بوەستنەوە و بڵێن: کورد لەو رێککەوتنە زەرەرمەند دەبێ و نابێ نەوت رادەستی بەغدا بکرێ، چونکە ئەوان گورگ ئاسا بازاڕی شێواویان دەوێ و لەسەر موزایەدەی سیاسی و دژایەتی کردنی حکومەتی هەرێم دەژین و نانیان لە عێراقچێتی و عێراقی یەکپارچە دایە.