بە درێژایی مێژوو لە هەر بەشێکی کوردستان پرسی کورد و بزووتنەوە رزگاریخوازیەکەی چووبێتە پێش، داگیرکارانی کوردستان هەوڵە پیلانگێڕیەکانیان لەسەر ئەو بەشەی کوردستان چڕ کردوونەوە، لە دوای راپەڕینی بەهاری ساڵی ١٩٩١، باشووری کوردستان بوو بەو ناوەندەی کە هەر چوار داگیرکارەکەی کوردستان لەسەر درێژەدان بە سیاسەتی داگیرکاری خۆیان بە هەڕەشەیان زانی و کوردیش وەک گەلێکی ژێردەستە و چاو لە دووی ئازادی ئومێدی دواڕۆژێکی ئارام و دوور لە دڵەراوکێی لەسەر هەڵچنی، لەو کاتەوە دوژمنان بە ئاشکرا و نهێنی و بە مەبەستی سنووردانان بۆ ئەو سەرکەوتنە و سەندنەوە و بەرتەسک کردنەوەی ئەو ماف و ئازادیانەی بە خوێن و رەنج و ماندووبوونی بەردەوام بەدەست هاتبوون، کەوتنە کۆبوونەوەی دووقۆڵی و سێقۆڵی.
ئەو بەریەککەوتنەی نێوان داگیرکاران و سەربەخۆخوازانی کورد لە فۆرمی جیاوازدا بەردەوام بوو، هەرکاتێ بارودۆخی ناوخۆیان باش بووبێ و رووداوەکان لە بەرژەوەندیان بووبن، پیلانەکانیان ئاڵۆزتر و گوشارەکانی سەر کوردیان زیاتر دەکردن،ئەو بارودۆخە درێژەی کێشا تا بڕیاردان لە ریفراندۆم و گەڕانەوە بۆ دەنگ و بڕیاری خەڵکی کوردستان، لەگەڵ بڕیاردان لە ریفراندۆم رژێمە داگیرکارەکانی عێراق و ئێران و تورکیا بۆ پێشگرتن بەو بڕیارە چارەنووسسازەی خەڵکی کوردستان، بە پشتیوانی خیانەتکارانی ناوخۆ لەناو هاوپەیمانییەکی سیاسی و سەربازی ئاشکرادا خۆیان کۆ کردەوە، بەڵام لەگەڵ ئەوەشدا ئیرادەی سەربەخۆخوازی بەرگەی ئەو پیلانە جەنجاڵ و فرە جەمسەرەی گرت و نەیانتوانی وەک ئەوەی دەیانویست و نەخشەیان بۆ کێشابوو رەوتی رووداوەکان لە بەرژەوەندی سیاسەتی داگیرکاری خۆیان بگۆڕن.
ئێستا رووداوەکان روو لە گۆڕانکارین و هەر چوار داگیرکارەکەی کوردستان کەوتوونە ناو قەیران، بوونی قەیرانیش لە هەر وڵاتێکی داگیرکاری کوردستان لە بەرژەوەندی پرسی کوردە، لێرەدا پرسیار ئەوەیە کورد چ خوێندنەوەیەکی بۆ ئەو رووداو و پێشهاتە چاوەڕوانکراوانە هەیە؟ چۆن لەگەڵ مێژوو دەدوێ و چۆن وەڵامی پرسیارەکانی داهاتوو دەداتەوە؟
مێژووی ئێمەی کوردی وڵات داگیرکراو و ئەوانی دوژمن و داگیرکاری کوردستان تەژیە لە خوێن و کاولکاری، لە ستەمکاری ئەوان و ستەملێکراوی کورد، لە فێڵ و تەڵەکابازی ئەوان لەکاتی لاوازیدا و ساویلکەیی و خۆشباوەڕی کورد لەکاتی هەل و دەرفەت بۆ رەخساندا، سەما کردنی کورد بە دەوری درووشمی ساختەی دینی و ستراتیجی پڕ لە رق و کینە و دوژمنکاری ئەوان.
لێرەدا ئەگەر هەموو ئەو روانینە دژ و پێچەوانانە بکەینە وەڵامی پرسیارەکانی داهاتوو، دەبێ کورد کەڵک لە سیاسەتی هەڵەی خۆی وەربگرێ و نەفرەت لە برایەتی دینی و ئایدۆلۆژی بکات، دەبێ لەو راستییە بگات کە بە درێژایی مێژوو درووشمی برایەتی دینی و ئایدۆلۆژی ئەوان کەلەپچەی دەستی کورد و چاڵاوی مەرگ بوون.
جا ئەگەر توانرا هەموو ئەو هەڵانەی رابردوو راست بکەینەوە و لەباتی سەما کردن بە دەوری درووشمی برایەتی دوژمنان، کۆڕی کوردایەتی بە دەوری کوردبووندا بگرین و کوردستانی بوون و سەربەخۆیی کوردستان بکەینە دوا ئامانج، دەکرێ ئەوەی بە برایەتی ساختەی دینی و ئاردۆلۆژی دۆڕاندوومانە، بە برایەتی کوردبوون و کوردستانی بوون وەری بگرینەوە، بە پێچەوانەوە لەو پێشهات و گۆڕانکاریە چاوەڕوانکراوانەش تاکە دەستکەتمان دوژمن گۆڕین دەبێ و ئەو بکوژ بەو بکوژ دەگۆڕین و ئەوان هەر بکوژ و ئێمەش هەر کوژراو دەبین، ئەوان هەر داگیرکار و ئێمەش هەر داگیرکراو دەبین.