لەگەڵ دەستپێکی هێرش و پەلامارەکانی تورکیا بۆسەر رۆژئاوای کوردستان و بەرگری کچ و کوڕانی ئەو بەشەی کوردستان، هەندێ سایت و کەناڵی راگەیاندن و چەند رۆشنبیرێکی گوماناوی و دەست لە پشتدراو سەری زمان و بنی زمانیان جەنەڕاڵ مەزڵوم کۆبانێ بوو، دوای ئەوەی نێچیرڤان بارزانی لە دیداری (مێری)دا گوتی: مەزڵوم کۆبانێم دیوە و پەیوەندیمان هەیە، جەنەڕاڵ و ناوی مەزڵوم کۆبانێ لەو سایت و کەناڵ و رۆشنبیرانە نەبینرا و نەبیسترایەوە، ئەوەش لای من بوو بەو پرسیارەی کە ناچار بووم بە دوای وەڵامەکەیدا بگەڕێم.
دوای ورد بوونەوە لە مێژوو بۆم دەرکەوت هەموو ئەو سایت و راگەیاندن و بەناو رۆشنبیرانە دژمن دۆست و دژی سەربەخۆیی کوردستانن، لەسەر هێڵی دژایەتی کردنی بنەماڵەی بارزانی نەمر راهێنراون، بە درێژایی مێژووش هێڵی بنەماڵەی بارزانی نەمر خەبات و قورباندیدان بووە لە پێناو سەربەخۆیی و بە ئازادی ژیان، بۆیە ئەوانە یڕیاریان پێدراوە دژی هەر ئازادییەک بن کە بە خەباتی بنەماڵەی بارزانی نەمر بەدی بهێنرێ بە ئازادی ژیانی خۆشیانەوە.
لە سەرەتادا ئەو سایت و کەناڵ و بەناو رۆشنبیرانە پێیان وابوو مادام مەزڵوم کۆبانێ هەڵگری پاشخانی سیاسی (پەکەکە)یە، وەک خۆیانە و دژی سەربەخۆیی کوردستانە، بەڵام کاتێ زانییان نێچیرڤان بارزانی دیویەتی و پەیوەنیان هەیە، پێیانوایە نێچیرڤان بارزانی گۆڕیویەتی ئێستا مەزڵوم کۆبانێش بۆتە یەکێک لە سەربەخۆخوازان و لە رەوتی خۆ بە ژێردەستە کردنی ئەوان دەرچووە، بۆیە ئێستا نە ناوی دەهێنن و نە بە جەنەڕاڵیشی دەزانن، هیچ دووریش نییە دوای ماوەیەکی تر و ئەگەر دڵنیابن مەزڵوم دەبێتە شوێنەکەوتەی مەزڵومانی سەربەخۆخواز، ئەوا دەیکەنە یەکێک لە پەلاماردراوان دەیخەنە ناو بازنەی بە ئامانج گیراوانی ئیرهابی فکری.