هەموومان لەبیرمانە لە گەرمەی بایکۆت و بەردەفڕکێ و هەڵکوتانەسەر بارەگا و فەمانگەکان و سوتاندنیان، دژە رەوتی کوردایەتی و عێراقچییەکان درووشمی (عەبادی عەبادی)یان بەرز کردبووەوە،، ئێستاش یەکێک لە درووشمەکانی بەشێک لە خۆپیشاندەرانی عەرەب (لا لبرزانی)یە.
تۆ سەیری ئەم بەراوردە بکە، کوردە عێراقچیەکان پڕ بە گەروویان هاواریان دەکرد عەبادی عەبادی، عەرەبە شۆڤێنیەکانیش درووشمی (لا لبرزانی)یان بەرز کردۆتەوە، بە درێژایی مێژووی خەباتی گەلانی بندەست رەوتی سەربەخۆخواز و رەوتی شۆڤێنیزم دوو ئاراستەی دژ بەیەک بوون و هەر واش دەبن، بۆیە عەرەبە شۆڤێنیەکان لە بەرز کردنەوەی ئەو درووشمە ناهەقیان نییە، چونکە ئەوە رەوتی سەربەخۆخوازە پێش بە فراوانخوازی رەوتی شۆفێنیزم دەگرێ، ئاخر بارزانیش رابەرایەتی ریفراندۆم و رەوتی سەربەخۆیی کوردستانی کردووە، ئەو رابەرایەتیەش دژ بە خواستی شۆڤێنیزمە و پێشگرتنە بە سیاسەتی داگیرخوازی و هەڵپەی تێرکردنی مەرامە شۆڤێنیەکان.
هاتووهاواری عەبادی عەبادیش لە لایەن ئەو کەس و دەستە و گرووپانەی کە ئالوودەی ژێردەستەیی بوون و بەرژەوەندی خۆیان لە عێراقچێتی و ژێردەستەییدا دەبینن، تا رادەیەک رەوایی تێدایە، ئاخر ئەوان لەگەڵ ژێردەستەیی راهاتوون و بە بۆن کردنی ئازادی و سەربەخۆیی گێژ دەبن، لێرەدا گەیشتینە ئەو راستییەی کە عەرەبە شۆفێنیەکان و کوردە عێراقچیەکان کورد گوتەنی: هەریەکە و بۆتە دزی گای خۆی، بۆیە عەرەبە شۆڤێنیەکان لە بەرز کردنەوەی درووشمی (لا لبرزانی) هەقیانە و کوردە عێراقچی و ئالوودە بووەکانی ژێردەستیش لە هاواری عەبادی عەبادی ناهەقیان نییە.