ئه‌و سه‌ركرده‌یێ ژێرخانا په‌روه‌ردێ ئاڤاكر
کارزان فەقێ
په‌روه‌رده، ئه‌و سێكته‌را كو ده‌ما باس ل پێشكه‌فتنا هه‌ر وه‌لاته‌كێ دهێته كرن، ل گه‌ل گۆتنا ئێكه‌م ئه‌گه‌رێن پێشكه‌فتنێ، ناڤێ په‌روه‌رده و فێركرنێ دهێت، به‌روڤاژى بۆ وان وه‌لاتێن پاشكه‌فتى ژى هه‌مان بۆچوون راسته كو په‌روه‌رده و فێركرن هاتیه پشت گوهخستن. لێ ده‌ما باس ل هه‌رێما كوردستانێ دهێته كرن، دڤێت ئه‌م ڤێ هه‌رێمێ د كیژان ئالى دا پۆلین بكه‌ین؟، ئه‌و وه‌لاتێن كو پێشكه‌فتینه یان ژى پاشكه‌فتى؟ بێگومان دێ بیته بێوژدانى ئه‌گه‌ر ئه‌م كه‌رتێ په‌روه‌رده و فێركرنا هه‌رێما كوردستانێ ل گه‌ل ئاستێ هژماره‌كا وه‌لاتێن ئه‌فریقا دانین كو هێشتا رێژه‌یا نه‌خوێده‌واریێ پتره ژ 90% و ڤێ یه‌كێ ژى كاریگه‌رى ل سه‌ر هه‌موو بیاڤێن ژیانا خه‌لكێ وێ كریه. هه‌روه‌سا ئه‌م وێ مافێ ژى ناده‌ینه خوه كو سێكته‌رێ په‌روه‌رده و فێركرنا هه‌رێما كوردستانێ ل ئاستێ وه‌لاتێن پێشكه‌فتیێن ئه‌وروپا ب هه‌ژمێرێن، چونكه هه‌م د بیاڤێ ئاڤاهى و پێدڤیێن خواندنێ و تاقیگه‌هان خوه‌دان كێماسینه، هه‌م ژى د بیاڤێ سیسته‌م و ئاستێ زانستى بێ كێشه و ڤالاهى نینین، لێ هنده‌ك راستى هه‌نه و گرنگه بهێته گۆتن كو كه‌رتێ په‌روه‌رده و فێركرنا هه‌رێما كوردستانێ د قۆناغه‌كێ دا وه‌رچه‌رخان بخوه‌ڤه دیتیه كو هه‌رێم و وه‌لاتێن ده‌وروبه‌رێ وێ به‌رده‌وام د كێشه و ململانى دا بووینه، ل سه‌ر ڤێ یه‌كێ ژى حكومه‌تا هه‌رێما كوردستانێ ب تایبه‌ت ل ده‌مێ كابینه‌یێن ئێك ل دووڤ ئێكێن نێچیرڤان بارزانى دا گرنگیه‌كا زۆر ب ڤى كه‌رتى دایه، ل ده‌مێ نیچیرڤان بارزانى د پۆستێ سه‌رۆكێ جڤاتا وه‌ز‌یران دا بوو، په‌روه‌رد پێشكه‌فتن و گهۆرینه‌كا به‌رچاڤ بخوه‌ڤه، ب وى ره‌نگى كو به‌ریا سه‌رهلدانێ قوتابخانێن هه‌رێما كوردستانێ ب تلێن ده‌ستان دهاتنه هه‌لبژارتن، لێ حكومه‌تا هه‌رێمێ كریه بریار و رێنما كو دڤێت ل هه‌ر گوند و ده‌ڤه‌ره‌كێ زارۆك لێ هه‌بن و هژمارا قوتابیان بگه‌هیته 16 قوتابى، قوتابخانه لێ بهێته ئاڤاكرن و مامۆستا و پێدڤیێن خواندنێ بۆ بهێنه دابین كرن، نها پێنچ رێڤه‌به‌ریێن گشتى یێن په‌روه‌رده‌یان ل هه‌رێما كوردستانێ هه‌نه، كو هه‌ر ئێك ژ وان ژ هژماره‌كا رێڤه‌به‌رێن په‌روه‌رده‌یان پێك دهێت، رێڤه‌به‌ریا گشتى یا په‌روه‌رده‌یا پارێزگه‌ها هه‌ولێرێ ژ 11 رێڤه‌برێن په‌روه‌رده‌یان پێك دهێت، هه‌روه‌سا 14 رێڤه‌به‌رێن په‌روه‌رده‌یان سه‌رب رێڤه‌به‌ریا په‌روه‌رده‌یا پارێزگه‌ها سلێمانیێ نه، د سنورێ رێڤه‌به‌رێا گشتى یا پارێزگه‌ها دهۆكێ ژى 11 رێڤه‌به‌ریێن په‌روه‌رده‌یان هه‌نه، هه‌روه‌سا بچوكترین رێڤه‌به‌ریا گشتى ژى یا ئیداره‌یا گه‌رمیانه كو ژ 3 رێڤه‌به‌ریێن نه‌گشتى پێك دهێت. سه‌ره‌راى ڤان چار رێڤه‌به‌ریێن گشتى، رێڤه‌به‌ریا خواندنا كوردى ل كه‌ركوكێ ژى ب هه‌مان قه‌باره‌یا رێڤه‌به‌ریێن ناڤا هه‌رێما كوردستانێ گرنگى پێهاتیه دان، مامۆستا و پێدڤیاتى بۆ هاتینه دابینكرن. ئه‌گه‌ر چه‌ند ئه‌ڤ سێكته‌ره خوه‌دان ئاریشه و كێماسى بیت، لێ گرنگیدانا حكومه‌تێ ب وى كه‌رتى ئاماژه‌ێێن دلخوه‌شكه‌رن چونكى ئه‌ڤ ژماره و داتایه هه‌موو ژێرخانا په‌روه‌ردێنه و ل به‌رده‌ستن ژ بۆ هه‌رپلان و بیرۆكه‌یه‌كا نوو كو گهۆرینێ د سیسته‌مى دا بكه‌ت.
