ده‌نگێ كوردستانا مه‌زن ژ دوورڤه یێ خۆشه!
شێرزاد نایف
خۆیایه كوردستانا مه‌زن ژ چار پارچه‌یان پێكدهێت هه‌كه پتر نه‌بیت، هه‌ر پارچه‌ك ژی یا ل ژێر ده‌ستهه‌لاته‌كا توند و دوژار، نه‌خاسمه هێشتا ئه‌و ژی ل ژێر ویسایه‌تێن هنده‌ك لایه‌ن و وه‌لاتێن مه‌زنتر دا برێڤه‌دچن، سروشتێ ڤێ كۆژیا جوگرافی ژی هندا ئالۆزه.. میراتێ ئه‌و ژی دبیته فاكته‌رێ دیترێ مه‌زنتر ژ دژواری و دوژمناهیا وان ده‌ستهه‌لاتێن مه به‌حس ژێ كرین. ئه‌ڤجا دمینیت سه‌رده‌ریكرن ل گه‌ل ڤان هه‌موو فاكته‌ران، كا كورد چاوا سه‌ره‌ده‌ریێ د گه‌ل دا بكه‌ن، كو نه‌بنه قوربانی ده‌ستهه‌لاتێن وان، مه ژی وه‌كو كوردێن هه‌رێما كوردستانا عیراقێ ـ كو دبیته باشۆرێ كوردستانا مه‌زن ـ گه‌له‌ك باجا دژواریا رژێمێن عیراقێ یێن د ناڤا دو سه‌ده‌یێن زه‌مانی دا دایه، هه‌تا ئه‌ڤرۆ وێ سته‌ما هنده مه‌زن یا سه‌رشه‌قێن وێ گه‌هشتیه وه‌لاتێن دیتر ژی وه‌كو ئیرانا زلهێز و كۆێتا (نازدارا عه‌ره‌بان) و سووریا خووشكا عیراقێ ب رێیا (به‌عس) ڤه یان جاران خوه ل وان ژی دایه. ئێدی پشتی رۆخیانا وێ رژێمێ، به‌رهه‌مه‌كێ ب زۆری و ب خوین و گیانی و تشته‌كی كێم بده‌ست مه كه‌ڤت كو فیدارلیبوونه، هێشتا دلێن مه دبریندارن و هه‌تا ڤێ سعه‌تا نڤیسینا من یا ڤێ گۆتارێ، گۆرٍێن مه یێن ب كۆم یێن دهێنه دیتن ژن و زارۆیێن مه ب ساخی بنئاخ كرینه، و هێشتا شاندێ مه‌یێ وێ تایبه‌تمه‌ندیێ یێ ل سه‌ماوه ل بیابانا عیراقێ نه‌زڤریه ڤه دهۆكێ!. ئه‌ڤ میناكا من ئینای، چپكه‌كه ژده‌ریایه‌كێ ژ وێ نه‌خۆشیێن مه دیتین، به‌هرا مه‌زنا شێری یا كوشتنێ و تۆقاندنێ و ئه‌نفالكرنێ ژی ب به‌ر بارزانیان كه‌فتیه، چونكو ل دۆزا خوه بووینه سه‌میان!. ئه‌ڤجا هێشتا ئه‌م یێن د ناڤا ئازارێ دا و مینا دبێژن ((ئازار ب تنێ وی كه‌سی دئێشینیت یێ ئازار تێ دا)). هه‌كه نه ئه‌م ژی یێن خه‌ونێن خۆش ب كوردستانا مه‌زن ڤه دبینین، مانێ مه ئه‌و كۆپیا بچووك ئه‌نجامدا ب گۆتن و كریار و هێشتا ژی ئه‌م لێڤه‌نه‌بووینه ژ سه‌ربه‌خوه‌یێ هه‌رگاڤا ده‌لیڤه كه‌فتێ، به‌لێ ئه‌نجام مه دیتن!! هه‌موو جڤاكێ نیڤده‌ولی ل مه خائین بوو، سه‌ره‌رای وێ حنێرا مه ب شیانێن بچووك بۆ جیهانێ پێشكێشكری، تیرۆرا مه‌زنترین مه به‌ری هه‌مووان شكاندی، ب زه‌ند و باسكێن پێشمه‌رگه‌ی مه چه‌كێن موعجیزه په‌قاندن!!. ما زێده‌تر دێ بینه فلمێ هندی؟!. چ بكه‌ین زێده‌تر دا مه‌زناهیا مه و هێزا مه بزانن؟! كه‌س ل مه نه‌بوو خودان ده‌مێ مه بۆ سه‌رخوه‌بوونێ ئه‌م بزڤین! ته‌نانه‌ت ملله‌ت ب خوه ژی ب نیڤ قورچیا زكێ برسێ (نیڤ مووچه‌ی) رێژه‌یه‌ك بوونه ئاگر ل سه‌ر سه‌رێ حوكمه‌تا سه‌رخوه‌بوون كری!!، باشه پا سه‌رۆك مسعود بارزانی و نێچیرڤان بارزانی چ بكه‌ن دا هه‌میان رازی بكه‌ن و ل ده‌سپێكێ ژی رێژه‌ك ژ مله‌تی؟!. ئه‌و رێژه ژی ب لڤاندنا هه‌ر وان وه‌لاتان بوو، هاندانا خه‌لكه‌كی بۆ لێدانا دهۆلا گه‌نده‌لیێ و بێدادیێ كرن، به‌لێ مه بزاڤێن سه‌رۆك نێچیرڤان بارزانی یێن گه‌رم دیتن، پشتی وێ چه‌لتا مه‌زن یا قه‌یرانێ و ساڕیا سه‌ره‌ده‌ریا وه‌لاتێن مه‌زن و دۆرپیچێا عیراقێ و سلبوونا وێ رێژه‌یا گه‌ل، ئه‌و موعجیزه ژی كر و ته‌خسیر نه‌كر و ب ده‌مه‌كێ زوی كاروبار زڤراندنه ڤه ب حوكمێ په‌یوه‌ندیێن وی یێن ژیر ل گه‌ل گه‌له‌ك وه‌لاتێن بیانی و فره‌نسا ژی ل سه‌رێ لیستێ یه، چونكو هه‌ڤخه‌ما دۆخێ مه كورانه و هه‌ڤالێ به‌رته‌نگیانه!!. یا گرنگ ئه‌وه كو برایێن په‌كه‌كێ سترانێن خۆش یێن كوردستانا مه‌زن بۆ هه‌موو كوردێن جیهانێ گۆتینه و گه‌له‌ك خۆش و ساناهی ل به‌ر وان كریه، كو دڤێت هه‌موو كوردستان ل هه‌ر چار وه‌لاتان ببێته رزگاركرن ببیته ئێك ده‌وله‌ت و پارتی یا خرابه و ب ئه‌ڤێ خه‌ونێ نابێژیت! یا مایه ب ده‌ستهه‌لاتێ ڤه، باشه بۆچی هۆسا ژبیركرن كو پارتی بوویه مۆرا خوه ل دیرۆكێ دا و بزاڤا سه‌ربخوه‌یێ و ژێكڤه‌بوون ژ ده‌وله‌تا عیراقێ كریه ب گۆتن و كریار و ئیراده‌تا خه‌لكی ب ده‌ستخوه‌ڤه ئینایه؟! یا لۆژیكی و دروست ئه‌ڤه‌یه، هه‌كه پارتی بزاڤا سه‌رخوه‌بوونا كوردستانا مه‌زن كربا و پرۆسا ریفراندۆمێ راگه‌هاندبا (هه‌ر چه‌نده د شیان دا نه‌بوو و نابیت ژی)، گه‌لۆ ئه‌نجام دا چ بن.؟! سڤكترنه‌دبوون ژ یا ریفراندۆما هه‌رێمێ؟! دوور نه‌بوو ناڤێ پارتی و ده‌ستهه‌لاتا هه‌رێمێ ژ ئه‌نتی تیرۆر دا كه‌نه تیرۆر!! هه‌ر چاوا ناڤێ په‌كه‌كێ ژی كرینه ئه‌و!!.
و بۆ زانین ژی مسعود بارزانی ئێكه‌م كه‌سه ئه‌ڤ ناڤه ره‌تكری ل سه‌ر په‌كه‌كێ كو ئه‌و ناڤێ تیرۆرست یێ شاشه و ره‌خنه خوه ل ئه‌مریكا ژی گرت و ئه‌و ڤیدیۆ یا به‌رهه‌ڤه ل سه‌ر یۆتیۆبی هه‌كه برایێن په‌كه‌كێ بخوازن بۆ خوه شیر و سه‌بسكرایب بكه‌ن!. ژنویكا په‌كه‌كه‌یێن برا و پسمام هاتینه كو هه‌رێما كوردستانا عیراقێ یا رزگاركری رزگار كه‌ن، و جهێ خه‌باتا خوه ل پشتگوه ڤه هاڤێتیه، مینا ب كۆلانكی دبێژن: كوره بیت یێ حه‌ز نه‌كه‌ت هوون كوردستانا باكۆر ئازاد نه‌كه‌ن؟!. ئه‌ڤجا ئه‌ڤ په‌یاما من بۆ هه‌موو كوردانه نه‌مازه یێن ل دوور گوه ل سترانا په‌كه‌كێ دبن بۆ كوردستانا مه‌زن، دێ وه‌رن ببینن كا كیرا مه كوردان دئێشیت د ناڤا وێ دهۆلێ دا پاشی دێ دزانن كا رێیا كوردستانا مه‌زن دكیڤه رادچیته گۆپیتكێ؟! یێ ژ ئه‌ڤێ ئێكێ حه‌ز نه‌كه‌ت، دوژمنێ كوردینیێ یه، هه‌كه نه‌زانیت ژی دبیت ده‌ستێن دوژمنی د ناڤدا بن، بۆ ئه‌جینده‌یێن ڤه‌شارتی پرۆگرامكری یه و ده‌ستێوه‌ردانێ ب ده‌ستێن كوردی ب خوه دكه‌ن. وه‌كو دی ژی مانێ كوردستانا باكۆر ژ ملیۆنان كوردان پێكدهێت د ناڤا توركان دا، چه‌ندین حزب هه‌نه به‌رده‌وامیێ دده‌نه كارێ خوه و هه‌رێمێ و سه‌رۆك بارزانی وه‌كو مه‌رجع پیرۆز دكه‌ن، كه‌سێن كوردپه‌روه‌ر د ناڤا په‌رله‌مانی دا چاوا ره‌خنێ ل توركیا دكه‌ن و تبلا خوه دكه‌نه ناڤ چاڤێن وان دا بۆ به‌رسڤا وان هه‌ره‌شه و ره‌خنه یێن وان ل سه‌ر هه‌رێما كوردستانێ!. كه‌سێن دلسۆز مینا بایده‌میر و ده‌میرتاش و گه‌له‌كێن دیتر ..هتد. ئه‌و ژی كوردێن ئازانه، به‌لێ نه مه‌رجه ئیلا ته دڤێت نه‌ڤێت بهێیه د حزبا من دا و وه‌كو من بی، ب زۆری بچمه گوندان و كور و كچێن خه‌لكی ب ئیلزامی بكێشمه ناڤ حزبا خوه، هه‌كه ئه‌ز د ناڤ حزبا ته دا نه‌بم، به‌لێ كه‌یفا من ب خه‌باتا دهێت بۆ رزگاركرنا وه‌لاتێ من، ئه‌و ژی هه‌می هانده‌رن، ئه‌م كورد ب شیری بسورمان نه‌بووینه؟! ب لێكتێگه‌هشتن، چونكو مینا عه‌ره‌ب دبێژن، كه‌سێ كورد ل گه‌ل ناكۆك نه‌به، به‌لێ ته‌فاهمێ ل گه‌ل بكه!!. ئه‌م ژی یێن ل ڤێره لێكتێگه‌هشتنێ دكه‌ین ل گه‌ل هه‌می لایه‌نان بۆ سه‌رخستنا دۆزا خوه، و ناڤێ مه كوردان ب سه‌رره‌قیێ چوویه چونكو لێڤه‌نابین ژ ئارمانجی!!. به‌لێ ئه‌ڤه دبیته خه‌لل هه‌كه ئه‌م د ناڤبه‌را هه‌ڤدا د ناكۆك بین و نه‌بینه ئێكرێز!. دڤێت ئه‌و ئێكرێزی ژی ب لۆژیك بیت. ره‌وشا هه‌ڤدو بحه‌بینین، ئه‌و چویچكا ده‌ست مه دا (فیدالی) باشتره ژ ده‌هـ چوچكێن ل سه‌ر دارێ، هه‌كه بلڤینی هه‌موو دێ فڕن و دێ مینین بێ ده‌ستكه‌فت.
ڤێجا دبێژمه براده‌ران دڤێت هوون سۆپاسیا پارتی و بارزانی بكه‌ن كو بۆ جڤاكێ نیڤده‌ولی دیاركری كو هوون نه‌تیرۆرستن و ب دبێ نان و خوێ نه‌بن! بهێلن سه‌ربۆرا هه‌رێمێ نه‌واتا سه‌ربخوه‌یا مه‌زنا به‌ره‌بابێن داهاتی سه‌ربكه‌ڤیت!. به‌لكو كورێن مه پێ شاد ببن!!.
