تیرۆر، ئه‌و بزاڤا تكده‌رانه‌یا كو بێ ناسنامه‌یە و هیچ ئالیه‌كێ فه‌رمى ل هه‌موو جیهانێ نكاریت خوه لێ بكه‌ته خوه‌دان، هه‌موو ده‌ما ژى ئارمانجا وێ تێكدان و خرابكرنا وێ ده‌ڤه‌رێ یه كو ب جوانى و ئارامیا خوه ناڤداره، كه‌واته هیچ نامۆ نینه كو ل هه‌ولێرا پایته‌ختێ هه‌رێما كوردستانێ بۆیه‌ره‌كا تیرۆرستى رووبده‌ت، چونكى ل وه‌لاتێن پێشكه‌فتی یێن جیهانێ ئه‌م به‌رده‌وام روودانێن تیرۆرى دبینین، لێ ئه‌وێ كو بوویه‌را هه‌ولێرێ ل گه‌ل پاریس و له‌نده‌ن و به‌رلینێ ژ هه‌ڤ جودا دكه‌ت، ده‌سته‌كێ تێكده‌رانه‌یا رێكخستنه‌كێیە كو خوه ب كورد و به‌رگریكارێ كوردان بزانیت، ئان ژى هه‌ده‌م ب درۆشمێ ئاشتیا گه‌لان خوه نیشان بده‌ت. لێ دروشم و سلۆگانێن په‌كه‌كێ و بزاڤێن ئه‌و دكه‌ت ئاشتیا گه‌لان پتر خستیه د ئالۆزى و بگره و بێكێشێن گرانتر، چونكى ئه‌و په‌فچوونێن دناڤبه‌را په‌كه‌كێ و سوپایێ توركیا ل ناڤا هه‌رێما كوردستانێ چێدبن، ژبلى و وێرانى و زیانێن گیانی یێن ب كوردینێ باشۆرێ كوردستانێ دكه‌ن، توندره‌وى و ره‌گه‌زپه‌رستیا توركان ل هه‌مبه‌ر گه‌شتیار و سه‌ردانكه‌رێن هه‌رێما كوردستانێ بۆ توركیا زێده‌تر كریه. كه‌واته ل ڤێرێ په‌كه‌كه ژ بلى مالوێرانى هیچ تشته‌كێ دى ژ بۆ هه‌رێما كوردستانێ ل گه‌ل خوه نه‌ئینایه، ژلایه‌كێ دى ڤى په‌كه‌كێ جهێ خه‌بات و شه‌ركرنا خوه به‌رزه كریه و هه‌ر جهێ هه‌ناسه‌یكێ ئازاد بۆ كوردان هه‌بیت و خوه‌دى سیمایه‌كێ شارستانى بیت، ب په‌قینه‌كێ، كوشتنه‌كێ، تیرۆركرنه‌كێ، ره‌وشه‌كا وه‌ها دروست دكه‌ت كو كاریگه‌ریا ل سه‌ر كوردان پتر ژ دوژمنێ وى كو توركیایه، چونكى هه‌موو ئالیگر و شه‌ركه‌رێن په‌كه‌كێ كو گه‌ریلانه، خه‌لكێ باكورێ كوردستانێ و رۆژئاڤا و رۆژهه‌لاتێ كوردستانێنه، ژ 20 ملیۆن كوردێن باكورێ كوردستانێ، ب تنێ 3 هزار گه‌ریلا كوردێن باكورن، قه‌د په‌كه‌كێ ژ خوه پرسیه چما كوردان هیڤى ب خه‌باتا وان یا چه‌كدارى نینه، سه‌ره‌راى كو گه‌نجێن هه‌رێما كوردستانێ ب تلێن ده‌ستان دناڤا رێكخستنا وان دا دهێنه هژمارتن، لێ رۆهن و ئاشكه‌را نینه ب گۆتن و بریارێن كیژان وه‌لاتێ دژه كورد په‌كه‌كه دناڤا هه رێما كوردستانێ كرده‌وێن چه‌كدارى دكه‌ت. سه‌یر تر ئه‌وه، پارتێن سیاسى یێ ل زۆنا دێز ب مه‌دیا خوه‌ڤه دهۆلا ڤێ دوژمناتیا دناڤا كوردان دقوتن هه‌روه‌كى ئێكى ئاگر لبن قازانا وان یا ڤالا هلكرى، بخوه حكومه‌ت و ده‌س‌تهه‌لاتدارێ ڤێ هه‌رێمێ ژى باش شاره‌زاى وێ زۆنێ و سیاسه‌تا په‌كه‌كێ یا دژى هه‌رێما كوردستانێ بوویه، ل ده‌ڤ حكومه‌تا هه‌رێما كوردستانێ په‌كه‌كه هێزه‌كا ده‌رڤه‌ى هه‌رێمێ و نه قانوونى یه، لێ ژبه‌ر وێ كوردبوونا دناڤبه‌را هه‌ردوو ئالیان دا هه‌ى، هه‌رێم خوه ژ هه ر شه‌ر پێكدادانه‌كێ ل گه‌ل په‌كه‌كێ دپارێزیت و تا نها ژى ب هزاران جاران ژێ خواستیه كو شه‌رێ خوه ببه‌نه وێ ده‌ڤه‌را كو هوون ژێ هاتین كو تا نها داگیر كریه، ده‌ما په‌كه‌كه دبێژیت دێ كوردستانێ ئازاد كه‌ین دڤێت بزانێت كیژان كوردستان بن ده‌ست و داگیر كریه و كیژان كوردستان ژى نموونه‌یا ده‌ڤه‌رێ و پرى ده‌ستكه‌فته، ل سالا 2016 نێچیرڤان بارزانى سه‌رۆكوه‌زیرێ به‌رێ یێ حكومه‌تا هه‌رێما كوردستانێ و سه‌رۆكێ نها یێ هه‌رێمێ ب فه‌رمى ژ په‌كه‌كێ خواست شه‌رێ خوه ژ كوردستانێ ده‌ربێخیت و خه‌باتا خوه بۆ وان ده‌ڤه‌ران ڤه‌گۆهیزێت كو دوژمنێ وێ لێ ئاكنجى یه و هه‌تا ئازادیێن خه‌لكێ وێ ژێ وه‌رگرتیه.
په‌كه‌كێ قه ژ خوه پرسیه ژ روویێ زمانى و ئاخفتنێ ڤه، خه‌لكێ كیژان پارچه‌یا كوردستانێ د ئازادن و ئه‌و شه‌رى بۆ ئازادیا زمانێ دایكێ ل كیژان پارچه‌ى دكه‌ت؟ په‌كه‌كه تا نها ژ خوه پرسیه كو ل وێ پارچه‌یا ئه‌و لێ هاتینه دامه‌زراندن زارۆیێ كوردان ب زمانێ توركى، دخوین، دنڤ|ێسن، د په‌یڤن و سوندێ توركبوونێ دخۆن؛ لێ چما ژبۆ ئازادكرنا هه‌رێما كوردستانێ شكه‌فت و كونێن ڤان چیایان گرتیه كو زارۆكێن وێ ب كوردى د ستریت، د په‌یڤیت و دخوینت. ئه‌گه‌ر ژ خوه ناپرسیت، پرسێن مه ژ بۆ په‌كه‌كێ گه‌له‌كن، پتر ژ 500 گوندێن هه‌رێما كوردستان، ژ به‌رهه‌مێن خوه‌یێن چاندنێ زڕ به‌هر بووینه، ئه‌ڤه كیژان جۆرێ خه‌باتێ هند زیانێ ژ خه‌لكێ خوه بدن و هند ب دوژمنێ خوه نه‌گه‌هینن.
کارزان فەقێ
