پشتی تاقیکرنێن دووماھیا سالێ یێن قوتابیێن قوناغا دوازدە ئامادەیی ب دووماھی ھاتین و ب تایبەت پشتی کو پەیڤدارێ وەزارەتا پەروەردێ د کونگرەیەکێ رۆژنامەڤانی دا روونکرن ل سەر (بابەتێ زمانێ کوردی و بیرکاری داین، ھەروەسا گۆتی: بابەتێ زمانێ عەرەبی دو پرسیار ئێک یا ١٥ و یا دی ٣٧ یا گرۆپێ (A) کو دو نمرەنە دێ بۆ ھەموو قوتابیان ھێنە دان) ئەڤێ چەندێ کارڤەدان و نەرازیبوون ل دووڤ خوەدا ئینان ژ لایێ قوتابیێن قوناغا دوازدێ ئامادەیی ڤە و ل ھندەک پارێزگەھ و باژێرێن کوردستانێ قوتاببی رابووینە ب ئەنجامدانا خوەپێشاندانان و ب تایبەت ل سلێمانێ و ھەولێرێ و داخوازا قەرەبوویێ دکەن و نە ب تنێ گازندەیێن وان ژ بابەتێ زمانێ عەرەبی بوو بەلکو ل دووڤ گۆتنێن قوتابیێن قوناغا شەشێ ئامادەیی شاشی د پرسیارێن ھندەک بابەتێن دیتر ژی دا ھەبوون! و ئەڤە نە ئێکەم جارە قوتابی دبنە قوربانیێن شاشیێن وەزارەتێ د دانانا پرسیاران دا، لێ کی بەرپرسە ژ ڤان شاشیێن بەردەوام یێن پرسیارێن دھێنە دانان بۆ قوتابیان ب گشتی و یێن دوازدێ ئامادەیی ب تایبەتی؟ قوتابی یێ کێمتر خەمە یان وەزارەتا پەروەردێ؟ ژ ئەنجامێ ئەڤان شاشیێن پرسیاران زیان و زەرەر ب قوتابیان دکەڤیت و ئاست و نمرەیێن وان دادکەڤن، ئەرێ بەری ئەڤ پرسیارە دگەھنە بەر دەستێ قوتابیان پێداچوون و دیڤچوون ژلایێ کەسانێن بسپورڤە ناھێتە کرن؟ یان کی ئەڤان پرسیاران ددانیت و بەرھەڤ دکەت کەسانێن شارەزا و بسپۆرن د ھەر بابەتەکی دا یان ژی بەرۆڤاژی؟ یان ژی ئەڤە ژ ئەنجامێ کێمترخەمیا ئەوان کەسانە ئەوێن ئەڤان پرسیاران ددانن کو دبنە ئەگەرێ تێکدانا دەروون و خەون و پاشەرۆژا ھزارەھا قوتابیان؟ یان ژی بۆچی تا نوکە کەسەک نەھاتیە سزادان ب رێکێن یاسایی ل سەر ئەڤان شاشیان؟ یان دورئێخستن ژ کار و پۆستێ وی؟ ئەرێ قەرەبووکرنا وێ شاشیێ ئەوا د دانانا پرسیاران دا ب دانا نمرەیان بۆ ھەموو قوتابیان چارەیە؟ دوازدە سالێن ماندیبوون و خواندنا قوتابیان ھوسا ب ساناھی و د رۆژەکێ دا ژناڤ بچیت ئاسانە؟
باشترە وەزارەتا پەروەردێ باشتر خوە بەرھەڤ کربا بۆ ئەنجامدانا ئەزموونێن دوماھیا سالێ ب ھەموو رەنگەکێ و ب تایبەت ددانانا پرسیاران دا، و بۆ ئەزموون و سالێن داھاتی پتر کار بکەن ل سەر دانانا پرسیاران دا و لیژنەیێن ئاست بەرز ژلایێ زانستی و ناڤەرۆکێ ڤە بۆ ھەموو بابەتان بھێنە پێکئینان ل سەر دانان و پێداچوون و راستڤەکرنا شاشیێن پرسیارێن بابەتان داکو قوتابی ژی ژ مافێ خوە بێ بار نەبن ب دەستڤەئینان نمرەیان دا بێی کو بێ ھیڤی ببن ژ خواندن و پاشەرۆژا خوە و ئێدی ل چ زانکۆ و پەیمانگەھێن ئاست بەرز و حکومی نەھێنە وەرگرتن کو ل دووڤ ماف و ئاستێ وان یێ زانستی بیت، و پەنایێ بۆ زانکۆیێن ئەھلی و ب پارە بەردەوامیێ بدەنە خواندنا خوە! ئەو ژی ئەگەر د شیانێن وان یێن ئابووری دا بیت و ئەو قوتابیێن بارێ وان یێ ئابووری یێ لاواز ل ڤێرە و ڤێ قوناغێ دووماھیێ ب خواندنا خوە د ئینیت.