واقیعی نوێی کۆمەڵگای کوردستان و پێشکەوتنی کۆمەڵایەتی خەڵک، پەرەسەندنی فەردانیەت و تاکگەرایی، گۆڕانی گەورە لە مۆدێل و ستایلی خێزان و ڕێکخسنتەوەی خێزانی کوردی، باشتربوون و پێشکەوتنی ئابوری بەگشتی و کرانەوەی کۆمەڵگای کوردستان بەڕووی خۆیدا وە بەڕووی ناوچەکەدا، کاریگەریی بە جیهانیبوون، زیاتر دەست و پەنجە نەرمکردن لەگەڵ تیۆر و چەمکە هاوچەرخەکانی خۆرئاوا، لە مەدەنیەت و دیموکراسی و یەکسانی و دادپەروەریی و شەفافیەت، فرەی حیزبایەتی و پلۆرالیزمی سیاسیی، تۆلێرانس و پێکەوەژیان، زۆربوونی قوتابخانە و زانکۆکان و کەمبوونەوەی نەخوێندەواریی، باشتربوونی بژێویی و گوزەرانی خەڵک و کەم بوونەوەی بێکاری، کاریگەربوونی ڕێکخراوەکانی کۆمەڵگەی مەدەنی و دروست بوونی گروپەکانی فشار، بەرفراوانبوونی ڕووبەر و پانتاییەکانی ئازادی و ئازادی ڕادەربڕین، فرەی کەناڵەکانی ڕاگەیاندن و بەربڵاوی تۆڕە کۆمەڵایەتیەکان، هەموو ئەمانە و زۆرێکی تریش هۆکار و مۆتیڤی خولقاندنی دروست بوونی جۆرێک لە هۆشیاری دەستە جەمعین لە کۆمەڵگای کوردستان دا.
ئەو گەشەسەندنەی حکومڕانی کوردی لە مێژووی سێدەییەی ڕابردوودا هێناویەتیە بوون، زەروورەتی پارادایمێکی سیاسیی نوێی بۆ حکومڕانی هەرێمەکە بەدوایخۆیداهێناوە، دوای زیاتر لە ٢٨ ساڵ حکومڕانی کوردی و چوارخولی پەڕلەمانی و هەشت کابینەی حکومەت، دوای ئەو گۆڕانە گەورانەی بەسەر کۆمەڵگای کوردی و هاووڵاتیاندا هاتوە، حکومڕانی کوردی لەبەردەم بازێکی گەورەدایە لە گۆڕینی پارادیم و سەرجەمی ئەو تیۆر و گریمانە و مۆدێل و بیرکردنەوە و دونیابینیەی لە ڕابردوودا بەگەڕیخستبوون بۆ مۆدێل و پارادایمێکی نوێ، بەپێی هەموو ئاماژەکان کۆمەڵگای کوردستان لە ٢٠١٩دا زۆر جیاوازە بەروارد بە ٢٨ ساڵی ڕابردوو،واقعی‌ فیكری‌ و كولتووری‌ و سیاسی‌ و کۆمەڵایەتی، داواکاری و داخوازی و پێویستی و شیوازی ژیان و ئاستی هۆشیاری خەڵک، گۆڕانی قوڵ و گەورەییان بەسەرداهاتووە، داواکاری بۆ دادگەریەکی باشتر و پێدانی هەلی پێشکەوتن و گەشەسەندنی یەکسان بۆ هەمووان، خواست و داواکاری دابەشکردنەوەیەکی باشتریی سامانی نەتەوەیی، بە دیهێنانی سەقامگیرییەکی دەروونی، ئەولەویاتی داوکارییەکانی خەڵکن لە حکومڕان، لە خولی پێنجەمی پەڕلەمانی کوردستان و دووهەمین سەرۆکی هەرێم و نۆهەمین کابینەی حکومەتی هەرێمی کوردستان.