د وەلاتێن فیدرال و ھەڤگرتی و یێن ل چەند نەتەوە و زمان و ئۆل و ئەتنا پێک دھێن بەردەوام ناکۆکی و لێک تێنەگەھشتن درۆست دبن ، چ لسەر ئاستێ سیاسی یان کارگێری و جڤاکی ، نەخاسمە ئەگەر سەربۆرا وی وەلاتی یا سیستەمێ فیدرالی و دیموکراسی ل قۆناغێن دەسپێکێ بیت ، مینا عیراقێ . چونکی نە رەوشەنبیریا سیاسی یا جڤاکی لسەر ڤی سیستەمێ دێ وەلاتی بەرەڤ دووبەرەکیێ و ھەڤبڕکیەکا دژوار بەت و ژبەر لدەست نەدانا پشتەڤانیا جەماوەری دبیت حزب و کەسایەتیێن سیاسی ژی ، ل یاسا و دەستووری دەربکەڤن و پەنایێ ببەنە بەر وێ ھەڤرکیێ و بڤی رەنگی ھەردوو سالی دێ زرارمەند بن و دوور نیە بگەھیتە ئاستێ شەرەکێ دژوار ، ھەر وەکی ل عیراقێ بەرامبەر ھەرێما کوردستانێ درۆست بووی .
ژبووی نەگەھشتنا رەوشێ بڤی ئاوایی و زڤراندنێ بۆ دیالۆگ و بنەمایێن دەستووری و یاسایی ، پێتڤی ب کەسایەتیێن دووربین و ئاشتیخواز و کاریزما ھەیە کۆ بشێن رێکێ ل سەرھەلدانا کارەساتێن دژوار بگرن .
دەربارەی رەوش و پەیوەندیێن دناڤبەرا ھەرێما کوردستانێ و عیراقێ پێتڤی ب کەسایەتیەکێ کاریزما ھەیە کۆ بشێت ببیتە کەنارەک بۆ کۆمکرنا ھەردوو ئالیان لسەر سفرا دەستوور و یاسایا .
د سەربۆر و روودانێن ڤان سالێن دەربازبوویی دناڤبەرا ھەرێما کوردستانی و عیراقێ دا ، نێچیرڤان بارزانی خۆیاکریە کۆ ئەو کەسە یێ دشێت ، دناڤ کۆمەکا ئاریشە و ناکۆکیێن دناڤبەرا ھەرێما کوردستانێ و عیراقێ دا ، خالێت ھەڤپشک بۆ بەرژەوەندێن ھەردوو ئالیان ڤەببینیت و بەرنامە و ستراتیژیەکا ھەڤپشک دارێژیت بۆ گەشەکرنا رەوشا سیاسی و ئابووری و جڤاکی و پەیوەندیێن دناڤبەرا ھەردوو ئالیان خۆرت بکەت بۆ زاڵبوون بسەر ئاریشە و ناکۆکیێن دیتر ژی .
دڤان دوو سالان دا نێچیرڤان بارزانی شیایە پەیوەندیێن دناڤبەرا ھەولێر و بەغدا ل شەر و دوژواریا بۆ ئاشتی و پێکڤە کارکرنا لسەر بنەمایێن پاراستنا بەرژەوەندێن ھەردوو ئالیان ڤەگۆھێزیت .
ژبۆی خورتکرنا پەیوەندیێن ھەردوو ئالیان بۆ ڤی سەردەمی پێتڤی ب نێچیرڤان بارزانی ھەیە ، چونکی جەنابێ وی دشێت ب سیاسەت و کاریزمایا خۆ ئەو ناکۆکی و ئاریشەیێن ھەڵاویستی برەنگەکێ ئاشتیانە و لسەر بنەمایێن پێکڤە ژیانێ و رێزگرتنا دووئالی و دەستوورێ ھەردەمی چارەسەر بکەت و جارەکادی ، دەستێن نەیاران نەھێنەڤ ناڤدا بۆ سەرھەلدانەڤا شەری .
ھەرێما کوردستانێ چەند پێتڤی ب نێچیرڤان بارزانی ھەیە بۆ سەرکێشیا دووسیا دبلۆماسیا کوردستانێ چ لسەر ئاستێ عیراقێ یان ژی لسەر ئاستێ نیڤ دەولەتی وەسا عیراقێ ژی پێتڤی پێ ھەیە ، چونکی نێچیرڤان بارزانی ئەو کەسایەتی یە ئەوێ ھزر و شیانێن خۆرتکرنا پەیوەندیان و چارەسەرکرنا پرسگرێکا ھەی بێ کۆ چ ئالی زرار مەند ببن و بڤێ سیاسەت و دبلۆماسیەتا خۆ یا سەرکەفتی دێ بیتە کەسایەتیەکێ نیڤ دەولەتی .
چونکی رەوشا ئەڤرۆ یا عیراق تێدا دەرباز دبیت ، بەرژەنگێن دژواریێ لێ دیارن ، چ پێشبینیێن سەرھەلدانەڤا گرۆپەکێ دیتر یێ تیرۆرستی ھەیە چ داعش بیت یان بناڤەکێ دیتر ، ھەر وەسا ئاڵوزیێن دناڤبەرا ئەمریکا و ئیرانێ راستەوخۆ پەیوەندی ل گەل عیراقێ ھەیە و تەشەنەبوونا پەیوەندیێ، ئەمریکا و ئیرانێ بەرەڤ شەری دێ کاریگەریەکا دژوار لسەر عیراقێ ھەبن ، لەوما عیراقێ پێتڤی ب دبلۆماتکار و سیاسیێن بلیمەت ھەیە داکۆ تۆشی چ کارەساتێن مەزن نەبیت ، نێچیرڤان بارزانی ژی ئەو کەسایەتیە ئەوێ دشێت عیراقێ لڤی ئاگری بپارێزیت ، چونکی ئەو باروەریا ئەمریکا و وەلاتێن دیتر و سازیێن نیڤ دەولەتی ب نێچیرڤان بارزانی ھەی ب سیاسی و سەرکردێن عیراقێ نینە ، ژ بەر پەیوەندیێن وان دگەل ئیرانێ .
ئەڤ پێشوازیا لسەر ئاستێ جیھانێ و سازیێن نیڤ دەولەتی ل نێچیرڤان بارزانی دکەت بەڵگەنە لسەر ڤێ چەندێ ، چ پشتی روودانێن شازدێ ئکتۆبەرا سالا ٢٠١٧ لدەمێ عیراقێ و ھندەک وەلاتێن ھەرێمی ھەمی شیانێن خۆ مەزاختی بۆ داربڕینا ھەرێما کوردستانێ ل جیھانێ و گەماروودانا وێ ب ھەول و سیاسەتا نێچیرڤان بارزانی ئەو پیلان ژناڤ چۆن و پێگەھێ ھەرێما کوردستانێ پاراست و بەرەڤە بھێزیێ دبەت ، دووماھی جار نامەیا نێچیرڤان بارزانی بۆ نەتەوەیێن ئێکگرتی دەربارەی چارەسەرکرنا پرسێن دناڤبەرا ھەرێمێ و عیراقێ دا و خاندنا وێ د کۆمبوونا واندا بەڵگەیەکێ دیترە کۆ نێچیرڤان بارزانی پێگەھەکێ نیڤ دەولەتی ھەیە. ئەز باوەرم سەرکردێن عیراقێ ڤێ چەندێ باش دزانن کۆ نێچیرڤان بارزانی کەنارێ ئێمناھیا عیراقێ و کوردستانێ یە ، لەوما دێ پێشوازیەکا گەرم ل ھەلبژاردنا جەنابێ وی وەک سەرۆکێ ھەرێما کوردستانێ کەن .